ຖວທ ໄຊຍະ ປະເມີນພະນັກງານ-ລັດຖະກອນ

  ໃນວັນທີ 11 ທັນວາ 2020 ພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວແຂວງໄຊຍະບູລີໄດ້ຈັດກອງປະຊຸມປະເມີນຜົນການຈັດຕັ້ງປະຕິບັດວຽກງານຂອງພະນັກງານ-ລັດຖະກອນ ໃຫ້ກຽດເຂົ້າຮ່ວມມີທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ, ທ່ານນາງ ບົວຈັນ ພັນທະວົງ ຫົວໜ້າພະແນກ ຖວທ ແຂວງ, ທ່ານ ສີລິວັດທະນາ ສົມພັນ ຫົວໜ້າພະແນກພາຍໃນແຂວງ,ມີຄະນະພະແນກ, ຫົວໜ້າ, ຮອງຫົວໜ້າຂະແໜງການ, ກອງວິຊາການ,ແຂກຖືກເຊີນພ້ອມດ້ວຍພະນັກງານ ລັດຖະກອນພາຍໃນພະແນກເຂົ້າຮ່ວມ.

   ທ່ານ ນາງ ບົວຈັນ ພັນທະວົງ ຫົວໜ້າພະແນກ ຖວທ ແຂວງໄດ້ຂຶ້ນຜ່ານຜົນການປະເມີນຜົນຂອງພະນັກງານລັດຖະກອນປະຈໍາປີ2020 ວ່າ: ພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວແຂວງປະກອບມີ 6 ຂະແໜງການ ແລະ 3 ກອງວິຊາການ, ມີພະນັກ ງານລັດຖະກອນທັງໝົດ 77 ຄົນ, ຍິງ 37 ຄົນ ນັບທັງຜູ້ຍົກລະດັບວິຊາສະເພາະ ແລະໄດ້ຈັດແບ່ງກຸ່ມປະເມີນຜົນໂດຍແບ່ງອອກເປັນ 8 ກຸ່ມຄື: ກຸ່ມຄະນະພະແນກ 3 ຄົນ, ຍິງ 1 ຄົນ, ກຸ່ມຂະແໜງບໍລິຫານມີ 10 ຄົນ, ຍິງ 5 ຄົນ, ກຸ່ມຂະແໜງວັດທະນະທໍາມີ 10 ຄົນ, ຍິງ 5 ຄົນ, ກຸ່ມຂະແໜງທ່ອງທ່ຽວມີ 10 ຄົນ, ຍິງ 6 ຄົນ, ກຸ່ມຂະແໜງຈັດຕັ້ງພະນັກງານ-ຂະແໜງກວດກາມີ 9 ຄົນ, ຍິງ 4  ຄົນ, ຂະແໜງຖະແຫຼງ ຂ່າວ-ກອງວິຊາການສະຖານີວິທະຍຸ-ໂທລະພາບມີ 21 ຄົນ, ຍິງ 10 ຄົນ, ກອງວິຊາການຫໍສະໝຸດມີ 5 ຄົນ, ຍິງ 3 ຄົນ, ຜ່ານການປະເມີນຜົນການປະຕິບັດວຽກງານຂອງພະນັກງານ-ລັດຖະກອນປິ 2020 ມີລັດຖະກອນເຂົ້າຮ່ວມປະເມີນຜົນທັງໝົດ 73 ຄົນ, ຍິງ 37 ຄົນ, ບໍ່ໄດ້ປະເມີນ 4 ຄົນ ຍ້ອນໄປຍົກລະດັບວິຊາສະເພາະ ແລະລັດຖະກອນ 95% ຜົນການປະເມີນຜົນຫົວໜ້າພະແນກ, ຮອງພະແນກ, ຂະແໜງການ, ກອງວິຊາການ ແລະລັດຖະກອນໄດ້ປະເພດດີຫຼາຍ 15 ຄົນ, ຍິງ 5 ຄົນ, ປະເພດດີມີ 58 ຄົນ, ຍິງ 32 ຄົນ.

 ໂອກາດນີ້ທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ ໄດ້ໂອ້ລົມໃຫ້ຄໍາຊີ້ແນະຊຶ່ງໄດ້ຍ້ອງຍໍຊົມເຊີຍຜົນງານຂອງຄະນະນໍາກໍ່ຄືລັດຖະກອນພາຍໃນພະແນກທີ່ຍາດມາໄດ້ໂດຍຊີ້ໃຫ້ເຫັນໃນການປະເມີນຜົນໃນຄັ້ງນີ້ຖືວ່າລັດຖະກອນໄດ້ລະດັບດີຫຼາຍ ແລະ ດີແຕ່ເຖິງຢ່າງໃດກໍ່ຕາມເພື່ອຮັບປະກັນເຮັດໃຫ້ລັດຖະກອນພາຍໃນພະແນກ ຖວທ ມີຄວາມຮູ້ຄວາມສາມາດເພື່ອຮັບປະກັນໃນການປະເມີນຜົນໃນຕໍ່ໜ້າໃຫ້ໄດ້ລະດັບດີຫຼາຍກວມເຄິ່ງໜຶ່ງຂອງລັດຖະກອນທັງໝົດນັ້ນຕ້ອງໄດ້ເອົາໃຈໃສ່ຍົກລະດັບຄວາມຮູ້ການເມືອງ-ແນວຄິດ, ຕັ້ງໜ້າເຊື່ອມຊຶມນິຕິກໍາຕ່າງໆໃຫ້ຫຼາຍ, ປັບປຸງຄວາມຮູ້ຄວາມສາມາດໃນທຸກດ້ານຫັນໄປຕາມຍຸກຂໍ້ມູນຂ່າວສານເຕັກໂນໂລຢີ, ມີຈັນຍາບັນຈັນຍາທໍາຂອງລັດຖະກອນແຕ່ສິ່ງສໍາຄັນໃນບັນຫາຫຼັກຕ້ອງມີຄວາມສາມັກຄີເປັນເອກະພາບໃນການຈັດຕັ້ງເປັນສິ່ງສໍາຄັນຕັດສິນ.

-------------

ຂ່າວ: ບຸນທີ, ຮູບພາບ: ໜັງສືພິມເສດຖະກິດ-ສັງຄົມ

แชร์