ຄືບໜ້າ 43% ໂຄງການສ້າງລະບົບນໍ້າປະປາເມືອງນອງ

   ວັນທີ 9 ທັນວາ 2020 ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າ ແຂວງສະຫວັນນະເຂດ ພ້ອມຄະນະໄດ້ລົງຢ້ຽມຢາມເບິ່ງໂຄງການກໍ່ສ້າງລະບົບນໍ້າປະປາ ໃນເທສະບານເມືອງນອງຊຶ່ງມາຮອດປະຈຸບັນສາມາດປະຕິບັດໄດ້ແລ້ວ 43% ຂອງແຜນການ ແລະຄາດວ່າຈະປະຕິບັດໃຫ້ສຳເລັດຕາມແຜນການໃນ 6 ເດືອນຕໍ່ໜ້າ.

  ຕາມການລາຍງານຂອງວິຊາການປະຈໍາໂຄງການໄດ້ໃຫ້ຮູ້ວ່າ: ໂຄງການຊັນວິດ ຫຼືໂຄງການຂະຫຍາຍໂຄງລ່າງນໍ້າສະອາດ ແລະໂພຊະນາການແມ່ນໄດ້ຮັບທຶນຈາກສະ ຫະພາບເອີຣົບໂດຍຜ່ານທະນາຄານພັດທະນາ (KFW)ຂອງປະເທດເຢຍລະມັນໂດຍລັດຖະບານລາວສົມທົບທຶນ 15%,ໂຄງການແມ່ນພາຍໃຕ້ການຊີ້ນຳຂອງກະຊວງໂຍທາທິການ ແລະຂົນສົ່ງໃນນັ້ນແມ່ນຕ້ອງຂະຫຍາຍໂຄງລ່າງນໍ້າສະອາດ ແລະໂພຊະນາການ, ສະເພາະການຈັດຕັ້ງປະຕິບັດການກໍ່ສ້າງລະບົບອ່າງນໍ້າ ແລະລະບົບວາງທໍ່ຕ່າງໆຂອງໂຄງການທີ່ເມືອງນອງແມ່ນບໍລິສັດໜູຄຳກໍ່ສ້າງເປັນຜູ້ຮັບເໝົາໃນມູນຄ່າ 9,5 ຕື້ກີບ, ປະກອບມີ 2 ສັນຍາຄື: ສັນຍາທີ 1 ສຳລັບເຂດບ້ານອ້ອມຮອບຕົວເມືອງແມ່ນປະກອບມີ 6 ບ້ານເປົ້າ ໝາຍຄື: ບ້ານສະດິ, ບ້ານດົງນາສານ, ບ້ານຫີນສະຫວ່າງ, ບ້ານປູນຕົງ, ບ້ານປູນຍາງ ແລະບ້ານປູນສິເຢີງ, ຜ່ານການກໍ່ສ້າງຕົວຈິງໄດ້ເລີ່ມແຕ່ວັນທີ 1 ເມສາ 2020 ຮອດປະຈຸບັນສາມາດປະຕິບັດໄດ້ 43% ຂອງມູນຄ່າລວມທັງໝົດ 5,2 ຕື້ກີບ ໃນນັ້ນປະກອບມີວຽກວາງທໍ່ປະຕິບັດໄດ້ 65%, ວຽກກໍ່ສ້າງອ່າງຂະໜາດ 25 ແມັດກ້ອນ ຈຳນວນ 6 ອ່າງ ປະຕິບັດໄດ້ 45%, ວຽກເຈາະນໍ້າບາດານຈຳນວນ 12 ບໍ່ປະຕິບັດໄດ້ 100%, ວຽກຕິດຕັ້ງລະບົບໄຟຟ້າປະຕິບັດໄດ້ 25%.

  ສ່ວນອີກສັນຍາໜຶ່ງແມ່ນບ້ານໃນຕົວເມືອງນອງແມ່ນປະກອບມີ 1 ບ້ານ ເປົ້າໜາຍຄື: ບ້ານນອງວິໄລ, ຜ່ານການກໍ່ສ້າງຕົງຈິງເລີ່ມແຕ່ວັນທີ 1 ເມສາ 2020 ຮອດປະຈຸບັນສາມາດປະຕິບັດໄດ້: 31% ຂອງມູນຄ່າລວມ 4,3 ຕື້ກີບ ໃນນັ້ນປະກອບມີວຽກກໍ່ສ້າງຫ້ອງການປະຕິບັດໄດ້ 60%, ວາງທໍ່ປະຕິບັດໄດ້ 13%, ກໍ່ສ້າງອ່າງຂະໜາດ 150 ແມັດກ້ອນ ຈຳນວນ 1 ອ່າງ, ປະຕິບັດໄດ້ 58%, ເຈາະນໍ້າບາດານຈຳນວນ 12 ບໍ່ປະຕິບັດໄດ້ 100%, ຕິດຕັ້ງລະບົບໄຟຟ້າປະຕິບັດໄດ້ 45%, ຊຶ່ງຄາດວ່າໂຄງການຈະສຳເລັດໃນເດືອນພຶດສະພາ 2021.

   ໂອກາດນີ້ທ່ານຮອງເຈົ້າແຂວງສະຫວັນນະເຂດກໍ່ໄດ້ເນັ້ນໃຫ້ບໍລິສັດຮັບເໝົາບໍລິສັດໜູຄຳກໍ່ສ້າງຕ້ອງໄດ້ເອົາໃຈໃສ່ເຮັດໃຫ້ຖືກຕ້ອງຕາມຫຼັກວິຊາການ ແລະ ເຮັດໃຫ້ສຳ ເລັດຕາມຄາດໝາຍທີ່ວາງໄວ້ທັງນີ້ກໍ່ເພື່ອເປັນການປະກອບສ່ວນພັດທະນາໃຫ້ເມືອງນອງມີໃບໜ້າໃໝ່ມີລະບົບນໍ້າປະປາທີ່ສະອາດໃຊ້ ແລະພັດທະນາໄດ້ຕາມແຜນງານຂອງກອງປະຊຸມໃຫຍ່ຂັ້ນຂອງຕົນທີ່ວາງໄວ້.

แชร์