ອັດຕະປື ປະກາດແຕ່ງຕັ້ງພະນັກງານຫຼາຍຕໍາແໜ່ງ

  ວັນທີ 11 ທັນວາ 2020 ແຂວງອັດຕະປື ໄດ້ຈັດພິທີປະກາດພະນັກງານການນໍາອອກພັກຜ່ອນຮັບອຸດໜູນບຳນານ ແລະປະກາດການຍົກຍ້າຍແຕ່ງຕັ້ງພະນັກງານການນຳຂັ້ນສູງຂອງແຂວງຫຼາຍຕໍາແໜ່ງໂດຍການເປັນປະທານຂອງທ່ານ ເລັດ ໄຊຍະພອນ ເຈົ້າແຂວງອັດຕະປື, ມີຄະນະນໍາຂອງແຂວງ, ພ້ອມດ້ວຍບັນດາທ່ານພະ ແນກການອ້ອມຂ້າງແຂວງ ແລະເມືອງເຂົ້າຮ່ວມ.

  ທ່ານ ບຸນຮຽນ ແກ້ວບົວພາດ ຮອງເຈົ້າແຂວງໄດ້ຜ່ານມະຕິຕົກລົງຂອງຄະນະເລຂາທິການສູນກາງພັກວ່າດ້ວຍການອະນຸມັດພະນັກງານພັກຜ່ອນຮັບອຸດໜູນບຳນານ ຊຶ່ງໄດ້ຕົກລົງໃຫ້ທ່ານ ອຸ່ນຫຼ້າ ໄຊຍະສິດ ຄະນະປະຈຳພັກແຂວງ, ຮອງເຈົ້າແຂວງອອກພັກຜ່ອນຮັບອຸດໜູນບຳນານ, ຜ່ານຂໍ້ຕົກລົງແຕ່ງຕັ້ງ ທ່ານ ທະນູໄຊ ບັນຊາລິດ ຄະນະປະຈໍາພັກ, ເປັນຮອງເຈົ້າແຂວງ, ຜ່ານຂໍ້ຕົກລົງຂອງເຈົ້າແຂວງວ່າດ້ວຍການຍົກຍ້າຍ ແລະແຕ່ງຕັ້ງພະນັກງານຊຶ່ງໄດ້ຕົກລົງຍົກຍ້າຍ ທ່ານ ບຸນເສີດ ເສດທິລາດ ຄະນະປະຈໍາພັກ, ຫົວໜ້າພະແນກກະສິກຳ ແລະປ່າໄມ້ແຂວງມາຮັບໜ້າທີ່ໃໝ່ເປັນຮອງເຈົ້າແຂວງ, ທ່ານ ເພັດມີໄຊ ຄຳພັກດີ ຫົວໜ້າພະແນກພາຍໃນແຂວງມາຮັບໜ້າທີ່ໃໝ່ເປັນເຈົ້າເມືອງສາມັກຄີໄຊ, ທ່ານ ບຸນທະມາລີ ໝັ້ນອານົງ ເຈົ້າເມືອງສາມັກຄີໄຊມາຮັບໜ້າທີ່ໃໝ່ເປັນຫົວໜ້າພະແນກພາຍໃນແຂວງ, ທ່ານ ສຸລິຈັນ ພອນແກ້ວ ຫົວໜ້າພະແນກແຜນການ ແລະການລົງທຶນແຂວງເປັນຫົວໜ້າຫ້ອງວ່າການປົກຄອງແຂວງ, ທ່ານ ສູນນະຄອນ ແກ້ວວຽງຄຳ ຫົວໜ້າພະແນກໄປສະນີ, ໂທລະຄົມມະນາຄົມມະນາຄົມ ແລະການສື່ສານມາເປັນຫົວໜ້າພະແນກແຜນການ ແລະການລົງທຶນແຂວງ,ຜ່ານຂໍ້ຕົກລົງວ່າດ້ວຍການອະນຸມັດທ່ານ ຄຳພູນ ແກ້ວມາລາ ຫົວໜ້າພະແນກສຶກສາທິການ ແລະກີລາແຂວງອອກພັກຜ່ອນບຳນານ, ຜ່ານຂໍ້ ຕົກລົງວ່າດ້ວຍການແຕ່ງຕັ້ງພະນັກງານໄດ້ຕົກລົງແຕ່ງຕັ້ງ ທ່ານ ອຸດົມສິນ ສີຊານົນ ເປັນຫົວໜ້າພະແນກສຶກສາທິການ ແລະກີລາແຂວງ, ທ່ານ ຂັນທອງ ຍີ້ນດາວົງ ຮອງຄະນະຈັດຕັ້ງແຂວງເປັນ ຫົວໜ້າພະແນກໄປສະນີ, ໂທລະຄົມມະນາຄົມ ແລະການສື່ສານ, ທ່ານ ພອນປະເສີດ ທອງສີທາວົງ ຮອງພະແນກກະສິກໍາ ແລະປ່າໄມ້ແຂວງເປັນຫົວໜ້າພະແນກກະສິກຳ ແລະປ່າໄມ້ແຂວງ.

   ໃນພິທີກໍ່ໄດ້ມີການເຊັນບົດບັນທຶກມອບ-ຮັບ ໜ້າທີ່ກັນຢ່າງເປັນທາງການໂດຍຊ້ອງໜ້າພາກສ່ວນທີ່ກ່ຽວຂ້ອງເຂົ້າຮ່ວມ, ພ້ອມທັງໄດ້ຮັບຟັງການໂອ້ລົມຂອງທ່ານເຈົ້າແຂວງອັດຕະປືເພື່ອເປັນທິດໃຫ້ຜູ້ທີ່ໄດ້ຮັບການຊັບຊ້ອນໜ້າທີ່ໃໝ່ຄັ້ງນີ້ໄດ້ນໍາໄປຈັດຕັ້ງປະຕິບັດໃຫ້ເຂົ້າໃນໜ້າທີ່ຄວາມຮັບຜິດຊອບໃຫ້ເກີດດອກອອກຜົນ.

----------------

ຂ່າວ: ສິດຕິພອນ ສຸວັນນະວົງ

ຮູບພາບ: ໜັງສືພິມເສດຖະກິດ-ສັງຄົມ

• 16/12/2020