ສາລະວັນເກັບລາຍຮັບໄດ້ 119 ຕື້ກວ່າກີບ

  ໃນວັນທີ 10 ທັນວາ 20 20 ທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນພ້ອມຄະນະໄດ້ເຄື່ອນໄຫວຢ້ຽມຢາມແລະເຮັດວຽກຢູ່ແຂວງສາລະວັນ, ໂດຍການຕ້ອນຮັບຂອງທ່ານ ຫົງແກ້ວ ມະລີຈັນສີ ຮອງຫົວໜ້າພະແນກການເງິນແຂວງພ້ອມຄະນະ, ມີຫົວໜ້າ-ຮອງຫົວໜ້າພະແນກການເງິນເມືອງ 8 ຕົວ ເມືອງ ແລະພາກສ່ວນທີ່ກ່ຽວຂ້ອງເຂົ້າຮ່ວມ. 

 ໃນໂອກາດນີ້ທ່ານ ຫົງແກ້ວ ມະລີຈັນສີ ຮອງຫົວໜ້າພະແນກການເງິນແຂວງກໍ່ໄດ້ຜ່ານບົດລາຍງານການຈັດຕັ້ງປະຕິບັດວຽກງານແຜນງົບປະມານແຫ່ງລັດໃນໄລຍະຜ່ານມາໄດ້ມີຄວາມຫຍຸ້ງຍາກ ແລະສິ່ງທ້າທາຍຫຼາຍຢ່າງເນື່ອງຈາກສະພາບເສດຖະກິດທັງພາຍນອກ ແລະພາຍໃນປະເທດມີການຜັນແປໂດຍສະເພາະແມ່ນຜົນກະທົບຈາກການລະບາດຂອງພະຍາດໂຄວິດ-19 ແລະຜົນກະທົບຈາກໄພທຳມະຊາດ. ການຜະລິດກະສິກຳ, ໂຮງຈັກໂຮງງານກໍ່ມີແຕ່ຂະໜາດນ້ອຍ ແລະກາງລາຍຮັບທີ່ໝັ້ນຄົງກໍ່ໄດ້ຈາກລັດວິສາຫະກິດຂອງລັດ ແລະໂຮງງານຊີມັງທີ່ເປັນລາຍຮັບໃຫຍ່ ແລະ ໝັ້ນຄົງ. ສຳລັບແຜນລາຍຮັບປີ 2020 ຕາມແຜນດັດແກ້ 144,6 ຕື້ກີບ, ຜ່ານ ການຈັດຕັ້ງປະຕິບັດມາຮອດປະຈຸບັນສາມາດເກັບລາຍຮັບໄດ້ 119,72ຕື້ກີບ ເທົ່າກັບ 82,79%ຂອງແຜນການດັດແກ້,ທຽບໃສ່ໄລຍະປີຜ່ານມາຫຼຸດລົງ 19,42%, ຄາດຄະເນໝົດປີຈະໄດ້ 134,4 ຕື້ກີບ ເທົ່າກັບ 92,94% ຂອງແຜນການ, ຫຼຸດແຜນ 7,06% ຫຼື 10,2 ຕື້ກີບ, ສຳລັບວຽກງານທີ່ພົ້ນເດັ່ນໃນການຈັດເກັບລາຍຮັບຄື: ໄດ້ສຳເລັດການເຜີຍແຜ່ເສຍຄ່າທຳນຽມທາງຕາມແຈ້ງການຂອງກະຊວງການເງິນໄດ້ເກືອບ 1 ຕື້ກີບ ແລະໄດ້ແຕ່ງຕັ້ງພະນັກງານລົງຊຸກຍູ້ລາຍຮັບຊ່ວຍເມືອງ 8 ຕົວເມືອງ.

  ໃນໂອກາດດຽວກັນ ທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນກໍ່ໄດ້ສະແດງຄວາມຊົມເຊີຍຕໍ່ຜົນງານທີ່ຍາດມາໄດ້ໂດຍສະເພາະການຈັດຕັ້ງປະຕິ ບັດແຜນງົບປະມານແຫ່ງລັດປີ 2020, ພ້ອມທັງໄດ້ເນັ້ນບາງບັນຫາຄື: ໄດ້ເນັ້ນໃຫ້ສ່ວຍສາອາກອນແຂວງ ແລະເມືອງແຕ່ງຕັ້ງຄະນະກຳມະການລົງສຳຫຼວດ, ກວດກາ, ປະເມີນ, ໃນການຈັດອັນດັບທຸລະກິດໃຫ້ຖືກຕ້ອງສອດຄ່ອງ ແລະໃຫ້ເຂົ້າສູ່ລະບົບ, ເອົາໃຈໃສ່ປັບປຸງກົງຈັກການຈັດຕັ້ງ, ຍົກລະດັບການສຶກສາ, ການຝຶກອົບຮົມໃຫ້ກັບພະນັກງານໃຫ້ໄດ້ຮັບຄວາມຮູ້ ແລະສາມາດນໍາໃຊ້ເຂົ້າໃນວຽກງານວິຊາສະເພາະໃຫ້ຖືກຕ້ອງ, ທັງນີ້ກໍ່ເພື່ອເປັນການຍົກລະດັບຄວາມສາມາດໃນການຮັບຜິດຊອບດ້ານວຽກງານວິຊາສະເພາະ ແລະເພີ່ມທະວີຄວາມສາມັກຄີພາຍໃນກົງຈັກໃຫ້ໜັກແໜ້ນ.

------------------

ຂ່າວ: ນາງ ທິດລານີ ໂຄດໂຍທາ.

ຮູບພາບ: ໜັງສືພິມເສດຖະກິດ-ສັງຄົມ

แชร์