ຮອງນາຍົກ ເຄື່ອນໄຫວຢ້ຽມຢາມ ແລະເຮັດວຽກຢູ່ຄຳມ່ວນ

 ໃນລະຫວ່າງວັນທີ 13-14 ທັນວາ 2020 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະການລົງທຶນພ້ອມດ້ວຍຄະນະໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຄຳມ່ວນ, ໂດຍມີ ທ່ານ ວັນໄຊ ພອງສະຫວັນຮັກສາການເຈົ້າແຂວງໆຄຳມ່ວນພ້ອມດ້ວຍຄະນະການນໍາຂັ້ນແຂວງ, ຂັ້ນເມືອງ, ບັນດາພະແນກການ, ອົງການຈັດຕັ້ງຕ່າງໆອ້ອມຂ້າງແຂວງໃຫ້ການຕ້ອນຮັບ ແລະເຂົ້າຮ່ວມຮັບຟັງການໂອ້ລົມຢູ່ເຮືອນພັກເລກ 1 ຂອງແຂວງ.

  ໃນໂອກາດນີ້ທ່ານຮັກສາການເຈົ້າແຂວງຄໍາມ່ວນໄດ້ລາຍງານກ່ຽວກັບຜົນການຈັດຕັ້ງປະຕິບັດບັນດາວຽກງານ ໃນຂົງເຂດຕ່າງໆ ໂດຍສະເພາະແຜນພັດທະນາເສດຖະ ກິດ-ສັງຄົມຂອງແຂວງໃນໄລຍະ 11 ເດືອນຜ່ານມາວ່າ: ທົ່ວແຂວງສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະເປັນລະບຽບຮຽບຮ້ອຍໂດຍພື້ນຖານ, ເສດຖະກິດຂອງແຂວງຂະຫຍາຍຕົວໃນລະດັບ 4,45% (ແຜນການ 6,76%), ລວມຍອດຜະລິດຕະພັນບັນລຸ 8.476 ຕື້ກີບ (ແຜນການ 9 ພັນກວ່າຕື້ກີບ), ສະເລ່ຍລາຍຮັບຕໍ່ຫົວຄົນ 2.199 ໂດລາສະຫະລັດ, ດ້ານການລົງທຶນຂອງລັດໃນປີ 2020 ໄດ້ຮັບການອະນຸມັດໂຄງການລົງທຶນຂອງລັດ 332 ໂຄງ ການລວມມູນຄ່າ 250 ຕື້ກີບ, ສາມາດຈັດຕັ້ງປະຕິບັດໄດ້ 223 ໂຄງການລວມມູນຄ່າ 102,92 ຕື້ກີບ ເທົ່າກັບ 74%,ດ້ານການລົງທຶນເອກະຊົນໄດ້ຊຸກຍູ້ການລົງ ທຶນທັງພາຍໃນ ແລະຕ່າງປະເທດທັງກິດຈະການສຳປະທານ ແລະກິດຈະການທົ່ວໄປມີທັງໝົດ 78 ໂຄງການ, ທຶນຈົດທະບຽນ 7.018 ຕື້ກີບ, ການເກັບລາຍຮັບເຂົ້າງົບປະມານມາຮອດວັນທີ 10 ທັນວາ 2020 ປະຕິບັດໄດ້567,82 ຕື້ກີບເທົ່າກັບ 84,11%, ໃນນີ້ພູດສູນກາງປະຕິບັດໄດ້ 349,49  ຕື້ກີບ ເທົ່າກັບ 83,97% ຂອງແຜນປີ, ພູດຂອງແຂວງປະຕິບັດໄດ້ 217,62  ຕື້ກີບ ເທົ່າກັບ 84,37% ຂອງແຜນປີສ່ວນດ້ານລາຍຈ່າຍປະຕິບັດໄດ້ 464,14 ຕື້ກີບ ເທົ່າກັບ 85,55% ຂອງແຜນ.

ໃນໂອກາດດຽວກັນທ່ານຮອງນາຍົກລັດຖະມົນຕີ ໄດ້ມີຄໍາເຫັນໂອ້ລົມ ແລະໃຫ້ທິດຊີ້ນໍາຕໍ່ການນໍາຫຼັກແຫຼ່ງຂອງແຂວງ, ອັນສຳຄັນທ່ານໄດ້ສະເໜີແລກປ່ຽນຄຳຄິດເຫັນ ແລະຊີ້ນຳໃຫ້ເອົາໃຈໃສ່ບາງບັນຫາຕື່ມເປັນຕົ້ນ: ສືບຕໍ່ເອົາໃຈໃສ່ຢ່າງເຂັ້ມງວດກ່ຽວກັບການສະກັດກັ້ນການແຜ່ລະບາດຂອງພະຍາດໂຄວິດ-19 ແລະ ພະຍາດຕາມລະດູການ,ສ້າງເງື່ອນໄຂອໍານວຍຄວາມສະດວກໃຫ້ແກ່ການລົງທຶນຕິດພັນກັບການປັບປຸງລະບຽບການຕ່າງໆໃຫ້ແທດເໝາະກັບການລົງທຶນ,ສືບຕໍ່ພັດທະນາຊັບພະຍາ ກອນມະນຸດເພື່ອຕອບສະໜອງໄດ້ກັບການຈັດຕັ້ງປະຕິບັດໜ້າທີ່ວຽກງານໃນໄລຍະໃໝ່,ປະຕິບັດນະໂຍບາຍການຫັນອຸດສາຫະກຳເປັນທັນສະໄໝເທື່ອລະກ້າວ, ເອົາໃຈໃສ່ຂົນຂວາຍດຶງດູດເອົາການລົງທຶນຈາກຕ່າງປະເທດເພື່ອສ້າງວຽກເຮັດງານທຳໃຫ້ແກ່ປະຊາຊົນບັນດາເຜົ່າ, ເພີ່ມທະວີການຮ່ວມມືກັບປະເທດເພື່ອມິດ ແລະ ສືບຕໍ່ສ້າງສັງຄົມໃຫ້ມີການປ່ຽນແປງທາງດ້ານການດຳລົງຊີວິດແບບໃໝ່ໃນສະພາບການທີ່ມີການລະບາດຂອງພະຍາດໂຄວິດ-19 ນຳໃຊ້ທ່າແຮງບົ່ມຊ້ອນຕົວຈິງຂອງແຂວງໃນປະ ຈຸບັນ ແລະສະເພາະໜ້າໃຫ້ເກີດປະໂຫຍດສູງສຸດເພື່ອພັດທະນາແຂວງໃຫ້ມີທ່າກ້າວຂະຫຍາຍຕົວກໍ່ຄືພັດທະນາຊີວິດການເປັນຢູ່ຂອງປະຊາຊົນບັນດາເຜົ່າໃຫ້ດີຂຶ້ນເປັນກ້າວໆ.

  ໃນໂອກາດເຄື່ອນໄຫວຢ້ຽມຢາມ ແລະເຮັດວຽກຢູ່ແຂວງຄໍາມ່ວນຄັ້ງນີ້ທ່ານຮອງນາຍົກລັດຖະມົນຕີໄດ້ມອບເງິນຈຳນວນ 100 ລ້ານກີບ ເພື່ອປະກອບສ່ວນພັດທະນາ ແລະແກ້ໄຂຄວາມທຸກຍາກຢູ່ພາຍໃນແຂວງ, ເດີນທາງໄປ ຢ້ຽມຢາມປະຊາຊົນບ້ານນາຫຍ້າຫວາຍ ເມືອງທ່າແຂກ ພ້ອມທັງມອບເງິນຈຳນວນ 10 ລ້ານກີບ ໃຫ້ແກ່ກຸ່ມຫັດຖະກຳ-ຈັກສານບ້ານນາຫຍ້າຫວາຍ-ໂພນສີທ່າ ແລະໄປຢ້ຽມຢາມໂຮງສີເຂົ້າສາຍບົວ ບ້ານໜອງຫ້າງ ເມືອງທ່າແຂກຕື່ມອີກ. 

----------------

ຂ່າວ: ແຂວງຄຳມ່ວນ

ຮູບພາບ: ໜັງສືພິມເສດຖະກິດ-ສັງຄົມ

แชร์