ຜູ້ວ່າການ ທຫລ ພົບປະຮັກສາການເຈົ້າແຂວງຄຳມ່ວນ

   ທ່ານ ສອນໄຊ ສິດພະໄຊ ກຳມະການສຳຮອງສູນກາງພັກ, ຜູ້ວ່າການທະນາຄານແຫ່ງ ສປປ ລາວ ພ້ອມຄະນະໄດ້ພົບປະ ແລະປຶກສາຫາລືວຽກງານກັບທ່ານ ວັນໄຊ ພອງສະຫວັນ ເລຂາພັກແຂວງ, ຮັກສາການເຈົ້າ ແຂວງຄໍາມ່ວນ ທີ່ຫ້ອງວ່າການປົກຄອງແຂວງດັ່ງກ່າວໃນວັນທີ 14 ທັນວາ 2020 ເນື່ອງໃນໂອກາດທີ່ທ່ານໄດ້ຮັບໜ້າທີ່ເປັນເລຂາພັກແຂວງ ແລະຮັບຊາບບັນຫາສຳຄັນຕ່າງໆ ໂດຍສະເພາະສະພາບການຈັດຕັ້ງປະຕິບັດການດຳເນີນທຸລະກຳການເງິນຂອງຂະແໜງການທະນາຄານແລະສະຖາບັນການເງິນຈຸລະພາກຢູ່ແຂວງດັ່ງກ່າວ.

 ການພົບປະກັນໃນຄັ້ງນີ້, ທັງແຂກ ແລະເຈົ້າພາບຍັງຕີລາຄາສູງຕໍ່ໝາກຜົນແຫ່ງການເຄື່ອນໄຫວຂອງທັງ 2 ຝ່າຍ ໃນຜ່ານມາ ແລະຍັງຈະພ້ອມກັນຮ່ວມມື, ປະກອບສ່ວນເຂົ້າໃນການແກ້ໄຂບັນຫາຂໍ້ຄົງຄ້າງທີ່ຕິດພັນກັບວຽກງານທະນາຄານ ແລະ ສະຖາບັນການເງິນຈຸລະພາກຢູ່ແຂວງຄຳມ່ວນໃຫ້ດີຂຶ້ນເປັນກ້າວໆແນໃສ່ເພື່ອນຳໃຊ້ແຫຼ່ງທຶນທະນາຄານ ແລະ ສະຖາບັນການເງິນຈຸລະພາກປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງແຂວງຄຳມ່ວນເຮັດໃຫ້ຊາວແຂວງຄຳມ່ວນມີຊີວິດການເປັນຢູ່ຂອງປະຊາຊົນດີຂຶ້ນເປັນກ້າວໆ.

  ໄລຍະດຽວກັນນີ້, ທ່ານຜູ້ວ່າການທະນາຄານແຫ່ງ ສປປ ລາວ ຍັງໄດ້ພົບປະໂອ້ລົມກັບບັນດາສາຂາ/ໜ່ວຍບໍລິການທະນາຄານທີ່ດຳເນີນທຸລະກິດຢູ່ແຂວງດັ່ງກ່າວຊຶ່ງໃນປະຈຸບັນມີ 5 ສາຂາທະນາຄານ 23 ໜ່ວຍບໍລິການ (ລວມໜ່ວຍບໍລິການທະນາຄານຮ່ວມພັດທະນາ, ນະໂຍບາຍ, ພັດທະນາລາວສາຂາຫຼັກ 20 ແລະທະນາຄານອິນໂດຈີນ; 4 ໜ່ວຍແລກປ່ຽນ, ຕູ້ຝາກເງິນ 1 ຕູ້ ແລະຕູ້ATM 51 ໜ່ວຍ; ມີຍອດຊັບສິນທັງໝົດເພີ່ມຂຶ້ນ 22,52% ທຽບ  ໃສ່ 10 ເດືອນປີ 2019,ຍອດສິນເຊື່ອທັງໝົດ 395,35 ຕື້ກີບ ທຽບໃສ່ປີ 2019 ເພີ່ມຂຶ້ນ 15,24%; NPLs ກວມອັດຕາສ່ວນ2,11% ຂອງຍອດສິນເຊື່ອທັງຫມົດເມື່ອທຽບໃສ່ປີ 2019 ຫຼຸດ ລົງ 69,47%; ສາຂາທະນະຄານທຸລະກິດສາມາດສ້າງລາຍຮັບທັງໝົດ 35 1,01 ຕື້ກີບ, ສົ່ງຜົນໃຫ້ການດໍາເນີນທຸລະກິດກໍາໄລຈໍານວນ 71,10 ຕື້ກີບ (ເດືອນ 10 ປີ2009 ກໍາໄລ 17,62 ຕື້ກີບ) ທຽບໃສປີ 2019 ກໍາໄລເພີ່ມຂຶ້ນ 303,46%.

  ທ່ານຜູ້ວ່າການທະນາຄານແຫ່ງ ສປປ ລາວ ຍັງໃຫ້ກຽດຊີ້ນຳພະນັກງານທະນາຄານໂດຍຮຽກຮ້ອງໃຫ້ທຸກຄົນເສີມຂະຫຍາຍຜົນງານທີ່ຕັ້ງໜ້າ; ແກ້ໄຂບັນຫາອ່ອນ, ຂໍ້ຄົງຄ້າງໃນຜ່ານມາໂດຍສະເພາະແມ່ນສະໜອງແຫຼ່ງທຶນໃຫ້ຖືກເປົ້າໝາຍ, ຫຼີກເວັ້ນການປ່ອຍສິນເຊື່ອທີ່ຂາດການວິເຄາະວິໃຈແນໃສ່ເຮັດໃຫ້ປະຊາຊົນບັນດາເຜົ່າໄດ້ມີທຶນຮອນເຂົ້າໃນ ການຜະລິດ, ທຸລະກິດແລະການບໍລິການຕາມແນວທາງຂອງພັກແລະລັດຖະບານ.

-------------------

ຂ່າວ: ຣັດສະໝີ ດວງສັດຈະ

ຮູບພາບ: ໜັງສືພິມເສດຖະກິດ-ສັງຄົມ

แชร์