ເຕັກນິກການປູກຜັກຫອມເປ

  ຜັກຫອມເປ ເປັນພືດຜັກຊະນິດໜຶ່ງທີ່ມີວິຕາມິນ ແລະແຮ່ທາດຫຼາຍຢ່າງທີ່ສຳຄັນຕໍ່ຮ່າງກາຍທັງຍັງມີສັບພະຄຸນທາງຢາຊ່ວຍປິ່ນປົວພະຍາດໄດ້, ຊຶ່ງຜັກດັ່ງກ່າວນີ້ສາ ມາດປູກໄດ້ 2 ວິທີຄື: ການຫວ່ານແກ່ນ ແລະການແຍກເຫງົ້າ.

 ອີງຕາມຂໍ້ມູນຈາກສະຖາບັນຄົ້ນຄວ້າກະສິກຳ-ປ່າໄມ້ແຫ່ງຊາດໃຫ້ຮູ້ວ່າ: ຜັກຫອມເປແມ່ນມີລັກສະນະເປັນລຳຕົ້ນຫຼືເຫງົ້າໃຕ້ດິນ ແລະອາດຢູ່ເໜືອດິນເລັກນ້ອຍ,ຮາກເປັນລະບົບຮາກແກ້ວມີຮາກຝອຍແຕກຍ່ອຍອອກຮອບໆໃບແທງອອກຈາກເຫງົ້າທີ່ເປັນລຳຕົ້ນລຽນວຽນຮອບເຫງົ້າແໜ້ນເປັນຈຸກ, ກ້ານໃບມີລັກສະນະສັ້ນ-ຍາວປາຍໃບແຫຼມ, ຂອບໃບແຂ້ວເລື່ອຍ, ແຂງກະດ້າງ, ໃບອ່ອນມີສີຂຽວສົດເມື່ອແກ່ມີສີຂຽວເຂັ້ມ, ດອກເກີດຢູ່ປາຍຍອດເຄິ່ງກາງຂອງລໍາຕົ້ນ; ສໍາລັບການປູກແມ່ນສາມາດປູກໄດ້ 2 ວິທີຄື: ການຫວ່ານແກ່ນ ແລະການແຍກເຫງົ້າ.

  ສໍາລັບການປູກດ້ວຍການຫວ່ານແກ່ນຊຶ່ງກ່ອນຫວ່ານແກ່ນຄວນກຳຈັດວັດສະພືດ ແລະໄຖພວນດິນໃຫ້ຍ່ອຍລະອຽດຕາກໄວ້ປະມານ 5-7 ວັນ ໂດຍເຮັດແບບນັ້ນ 2 ຄັ້ງ ແລ້ວຈຶ່ງປັບດິນໃຫ້ສະເໝີກັນພ້ອມທັງປະສົມຝຸ່ນຄອກ ຫຼືປຸ໋ຍໝັກລົງໄປໃຫ້ເຂົ້າກັນດີເພື່ອເພີ່ມຄວາມອຸດົມສົມບູນໃຫ້ແກ່ດິນ, ຊຶ່ງໃນພື້ນທີ່ 1 ໄລ່ ແກ່ນພັນປະມານ 5 ກິໂລ ກ່ອນຫວ່ານແກ່ນຄວນໃຊ້ນໍ້າພົມເສຍກ່ອນເພື່ອໃຫ້ຈະເລີນງອກງາມໄດ້ດີແລ້ວຖົມດິນບາງໆ ແລະຫົດນໍ້າໃນປະລິ ມານທີ່ພໍເໝາະ, ຢ່າໃຫ້ນໍ້າຂັງ, ການໃຫ້ນໍ້າແມ່ນວັນລະສອງຄັ້ງເຊົ້າແລງ, ສຳລັບປຸ໋ຍແມ່ນໃຊ້ສູດ 20-20-0 ປະສົມກັບສູດ 46-0-0 ໃນອັດຕາ 50 ກິໂລຕໍ່ໄລ່ເມື່ອປູກໄດ້ປະມານ 2 ເດືອນ ແລະເລີ່ມມີຊໍ່ດອກຄວນບຳລຸງຕົ້ນໃຫ້ຈະເລີນເຕີບໂຕດ້ວຍການເດັດຊໍ່ດອກຖີ້ມ.

  ສ່ວນການປູກດ້ວຍການແຍກເຫງົ້າກ່ອນຍົກປູກຄວນໄຖພວນດິນ ແລະກຳຈັດວັດສະພືດເຊັ່ນດຽວກັບການຫວ່ານແກ່ນສ່ວນຂະໜາດໜານປູກທີ່ເໝາະສົມຄວນມີຄວາມກວ້າງປະມານ 1 ແມັດ, ຍາວປະມານ 20 ແມັດ, ໄລຍະຫ່າງລະຫວ່າງຂຸມປູກປະມານ 20 ຄູນ 20 ຊັງຕີແມັດຫຼັງຈາກນັ້ນນຳເຫງົ້າພັນທີ່ກຽມໄວ້ມາປູກຈຶ່ງຫົດນໍ້າໃຫ້ຊຸ່ມພໍດີ, ເມື່ອຕົ້ນຜັກເລີມຕັ້ງໂຕໄດ້ແລ້ວຄວນກຳຈັດວັດສະພືດ ແລະພວນດິນອີກຄັ້ງຫຼັງຈາກນັ້ນໃຫ້ໃສ່ຝຸ່ນຄອກ, ທີ່ສຳຄັນຄວນກັນແສງໃຫ້ຜັກໂດຍການໃຊ້ໃບໝາກພ້າວ ຫຼືຕາໜ່າງກັນແສງແດດປະມານ 60-80 ເປີເຊັນບໍ່ວ່າຈະປູກດ້ວຍວິທີໃດກໍຕາມ.

 ຫຼັງຈາກທີ່ປູກຫອມເປໄດ້ປະມານ 4 ເດືອນ ກໍສາມາດເກັບກ່ຽວຜົນຜະລິດໄດ້ແລ້ວເພື່ອໃຫ້ຫຼົກໄດ້ສະດວກຄວນຫົດນໍ້າໃຫ້ຊຸ່ມເສຍກ່ອນໂດຍຫຼົກໝົດຕົ້ນໃຫ້ມີຮາກຕິດຂຶ້ນມານຳ ຫຼືຈະໃຊ້ມີດຕັດເທື່ອລະຕົ້ນກໍໄດ້ແລ້ວນຳໄປລ້າງໃຫ້ສະອາດ ແລະເລືອກໃບທີ່ບໍ່ງາມຖີ້ມແລ້ວນຳໄປມັດເພື່ອຈຳໜ່າຍ.

 

แชร์