ມສ ນາຂ້ອຍສາວ ການແຂ່ງຂັນກີລາ-ສິລະປະ

   ວັນທີ 10 ທັນວາ 2020 ໂຮງຮຽນມັດທະຍົມສົມບູນນາຂ້ອຍສາວ (ມສ ນາຂ້ອຍສາວ)ໄດ້ຈັດພິທີເປີດລະແຂ່ງຂັນກີລາ-ສິລະປະໂດຍເປັນປະທານຂອງ ທ່ານ ສີບຸນເທືອງ ອິນທະວົງ ຮອງຫົວໜ້າຫ້ອງການສຶກສາທິການ ແລະກີລາເມືອງສາລະວັນ, ທ່ານ ສົມພອນ ວິໄລສອນຜູ້ອຳນວຍການໂຮງຮຽນ ມສ ນາຂ້ອຍສາວ, ທ່ານ ບຸນວັດ ແກ້ວມະນີແສງປະທານສະມາຄົມພໍ່ແມ່ນັກຮຽນບ້ານນາຂ້ອຍສາວ, ມີຫ້ອງການອ້ອມຂ້າງເມືອງ,ອົງການປົກຄອງບ້ານ,ຄະນະອຳນວຍການ,ຄູ-ອາຈານ-ນັກຮຽນ, ແລະປະຊາຊົນພາຍໃນບ້ານເຂົ້າຮ່ວມ.

  ທ່ານ ສົມພອນ ວິໄລສອນ ໄດ້ຜ່ານບົດສະຫຼຸບວຽກງານກີລາ-ສິລະປະໃນສົກຮຽນຜ່ານມາ ມສ ນາຂ້ອຍສາວ ກໍ່ໄດ້ເຂົ້າຮ່ວມການແຂ່ງກີລາ-ສິລະປະໃນແຕ່ລະປະເພດທີ່ເມືອງຈັດຂຶ້ນ ແລະກໍ່ສາມາດໄດ້ຂັນລາງວັນກີລາປະເພດເປຕັງຍິງ-ຊາຍ ແລະ ປະເພດລະຄອນໃນງານດັ່ງກ່າວຍັງໄດ້ຊົມການສະແດງມວຍລາຍລາວ, ການສະແດງສິລະປະຂອງໂຮງຮຽນ ແລະຟ້ອນລຳສາລະວັນ, ການເຕັ້ນແອໂຣບິກຈາກນ້ອງນັກຮຽນ.

  ທ່ານ ສີບຸນເທືອງ ອິນທະວົງ ໄດ້ກ່າວຄໍາຊົມເຊີຍທີ່ໂຮງຮຽນໄດ້ເອົາໃຈໃສ່ຈົນສາມາດໄດ້ຂັນລາງວັນກີລາປະເພດເປຕັງຍິງ-ຊາຍ ແລະປະເພດລະຄອນ ແລະໄດ້ປຸກລະ ດົມໃຫ້ນ້ອງນັກຮຽນໃຫ້ເອົາໃຈໃສ່ໃນການສຶກສາຮໍ່າຮຽນ ແລະຫັນໜ້າມາຫຼິ້ນກີລາເພື່ອໃຫ້ມີສຸຂະພາບທີ່ແຂງແຮງ ແລະຫ່າງໄກຈາກຢາເສດຕິດທີ່ເປັນໄພຕໍ່ຊີວິດເປັນພິດຕໍ່ສັງຄົມພ້ອມກັນນັ້ນກໍ່ໄດ້ມອບໃບຂອບໃຈໃຫ້ແກ່ພາກສ່ວນຕ່າງໆທີ່ໄດ້ປະກອບສ່ວນທາງອຸປະກອນກີລາຕ່າງໆ.

• 14/12/2020