ຜົນກອງປະຊຸມໃຫຍ່ຂອງ ອພສ ເມືອງວິລະບູລີ ສະໄໝທິີ VIII

 ກອງປະຊຸມໃຫຍ່ອົງການພຸດທະສາສະໜາສໍາພັນລາວ (ອພສ) ເມືອງວິລະບູລີ ສະໄໝທີ VIII ໄດ້ໄຂຂຶ້ນ ແລະສໍາເລັດລົງໃນວັນທີ 10 ທັນວາ 2020 ທີ່ສະໂມສອນໃຫຍ່ຂອງເມືອງວິລະບູລີໂດຍການເປັນປະທານຂອງພະຫຼັກຄໍາໄກສອນສີຫະນາທາຈານ (ຍາທ່ານ ຄຳປານ ສຸພັນໂທ) ຮອງປະທານ ອພສ ແຂວງສະຫວັນນະເຂດ, ຍາທ່ານ ສະຫວັນ ສິລະປັນໂຍເຈົ້າຄະນະສົງເມືອງວິລະບູລີ, ມີບັນດາພະມະຫາເຖຣານຸເຖຣະ, ພາຍນອກມີທ່ານ ຄໍາຜຸຍ ສີບຸນເຮືອງ ເຈົ້າເມືອງວິລະບູລີ, ມີບັນດາທ່ານໃນຄະນະບໍລິຫານງານພັກເມືອງ, ຫົວໜ້າຄະນະຫ້ອງການ, ອໍານາດການປົກຄອງບ້ານພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

 ພະອາຈານຍືດອັຄຄະວັນໂນຄະນະບໍລິຫານງານ ອພສ ເມືອງວິລະບູລີ ໄດ້ຜ່ານບົດສະຫຼຸບລາຍງານການເຄື່ອນໄຫວຜົນງານ 5 ປີ ຜ່ານມາພ້ອມທັງວາງທິດທາງແຜນ ການເຄື່ອນໄຫວ 5 ປີຕໍ່ໜ້າຂອງ ອພສ ເມືອງວິລະບູລີ ຊຶ່ງໃນໄລຍະ 5 ປີທີ່ຜ່ານມາ ອພສ ເມືອງ ວິລະບູລີ ແມ່ນໄດ້ມີການເຄື່ອນໄຫວວຽກງານຢ່າງຕັ້ງໜ້າ, ເອົາໃຈໃສ່, ມີເປົ້າໝາຍແມ່ນປັບປຸງກໍ່ສ້າງການປົກຄອງສົງໃຫ້ມີແບບແຜນວິທີເຮັດວຽກຂອງຕົນປະຕິບັດຕາມພາລະບົດບາດໜ້າທີ່ຂອງຕົນ, ພ້ອມກັນນັ້ນຍັງໄດ້ສົມທົບກັບອຳນາດການປົກຄອງບ້ານ, ເມືອງແກ້ໄຂບັນຫາພະສົງ-ສາມະເນນທີ່ປະພຶດບໍ່ສົມຄວນກັບສະມະນະເພດຜິດຕໍ່ພະທັມວິໄນ, ຂໍ້ຂັດແຍ່ງລະຫວ່າງຊຸມຊົນກັບພະສົງພ້ອມທັງຮ່ວມມືກັບແນວລາວສ້າງຊາດເມືອງເຜີຍແຜ່ກົດລະບຽບການຄຸ້ມຄອງ ແລະສົ່ງເສີມພະພຸດທະສາສະໜາ, ດ້ານສະຖິຕິການປົກຄອງທົ່ວເມືອງວິລະບູລີມີວັດ 37 ວັດ , ວັດຮ້າງ 13 ວັດ, ແບ່ງອອກເປັນ 3 ເຂດຄື: ເຂດຈຸດສຸມອ່າງຄໍາ, ຈຸດກະແຕບນາຜາດ່າງ ແລະຈຸດສຸມພັດທະນາເມືອງວັງ, ມີຄະນະ ອພສ ເມືອງ 12 ອົງ, ມີພະສົງສາມະເນນ 69 ອົງ ໃນນັ້ນມີພະ 30 ອົງ ແລະສາມະເນນ 39 ອົງ, ແມ່ຂາວ 1 ຕົນ ຈາກນັ້ນຄະນະ ອພສ ເມືອງຊຸດເກົ່າໄດ້ຜ່ານບົດສໍາຫຼວດກ່າວລາໜ້າທີ່ ແລະທາງຄະນະປະຈໍາ ອພສ ແຂວງກໍ່ໄດ້ຂຶ້ນຜ່ານບັນດາມາດຖານເງື່ອນໄຂຂອງຜູ້ທີ່ຈະຖືກຄັດເລືອກປະກອບເຂົ້າໃນຄະນະ ອພສ ເມືອງຊຸດໃໝ່.

  ຈາກນັ້ນ ພະມະຫາ ບຸນຍະຣັດ ວິສຸດໂທ ຫົວໜ້າຫ້ອງການບໍລິຫານງານ ອພສ ແຂວງສະຫວັນນະເຂດກໍ່ໄດ້ຂຶ້ນຜ່ານຂໍ້ຕົກລົງຂອງອົງການພຸດທະສາສະໜາສັມພັນລາວ ແຂວງສະຫວັນນະເຂດສະບັບເລກທີ 247/ອພສ.ສຂ, ລົງວັນທີ10 ທັນວາ 2020 ວ່າດ້ວຍການແຕ່ງຕັ້ງ ແລະຮັບຮອງເອົາຄະນະບໍລິຫານງານ ອພສ ເມືອງວິລະບູລີສະໄໝທີ VIII, ໂດຍອີງຕາມທັມມະນູນສົງລາວສະບັບປັບປຸງປີ ພສ 2561, ເລກທີ 37/ນຍ, ລົງວັນທີ 15 ກຸມພາ 2019 ໝວດທີ 7, ມາດຕາ 51 ວ່າດ້ວຍກອງປະຊຸມໃຫຍ່ ແລະ ອີງຕາມຜົນຂອງກອງປະຊຸມທາບທາມຂອງ ອພສ ເມືອງວິລະບູລີ ຄັ້ງວັນທີ 20 ສິງຫາ 2020 ທີ່ ວັດວິລະບູລີໄຊຍະຣາມເຈົ້າຄະນະ ແຂວງສະຫວັນນະເຂດຈຶ່ງຕົກລົງແຕ່ງຕັ້ງຄະນະທີ່ປຶກສາ ອພສ ເມືອງວິລະບູລີ ປະກອບດ້ວຍຍາທ່ານ ໂຈມວໍລະນາດເປັນປະທານທີ່ປຶກສາ, ຍາພໍ່ນ້ອຍ ໄຊສົມບັດ ແລະຍາພໍ່ພອນໄຊມະນີວົງ ເປັນຮອງປະທານ; ແຕ່ງຕັ້ງຄະນະບໍລິຫານງານ ອພສ ເມືອງປະກອບມີ: ຍາທ່ານ ສະຫວັນ ສິລະປັນໂຍ ເປັນຫົວໜ້າ, ພະອາຈານຍືດອັຄຄະວັນໂນ, ພະອາຈານສົມກຽດ ສິຣິປັນໂນ ເປັນຮອງ ແລະພະເຖຣາອີກ 9 ອົງເປັນຄະນະ; ແຕ່ງຕັ້ງເຈົ້າຄະນະເມືອງ  ແລະຮອງເຈົ້າຄະນະເມືອງປະກອບມີຍາທ່ານ ສະຫວັນສິລະປັນໂຍເປັນຫົວໜ້າ, ພະອາຈານ ຍືດອັດຄະວັນໂນ ແລະພະອາຈານຂວັນຕາ ຂັນຕິຍຸດໂທເປັນຮອງ, ພ້ອມນັ້ນກໍ່ຍັງໄດ້ແຕ່ງຕັ້ງຄະນະບໍລິຫານງານປະຈຳການ ອພສ ເມືອງ, ແຕ່ງຕັ້ງຄະນະຫ້ອງການບໍລິຫານ ອພສ ເມືອງ ແລະແຕ່ງຕັ້ງກັມມາທິການຕ່າງມີຄື: ກັມມາທິການປົກຄອງສົງ, ກັມມາທິການເຜີຍແຜ່ສີລະທັມ ແລະປະຕິບັດກັມມະຖານ, ກັມມາທິການທາຣະນູປະການ ແລະກັມມາທິການສຶກສາສົງຕື່ມອີກ.

 

แชร์