ອານຸລັກ ນຳທັບຖ່າຍຮູບເງົາ “ສະບາຍດີຊຳເໜືອ”

ໃນວັນທີ 10 ທັນວາຜ່ານມາທີມງານບໍລິສັດໄຕ໋ບ້ານໂປຣດັກຊັ່ນເລີ່ມລົງມືຖ່າຍຮູບເງົາ ສະບາຍດີຊຳເໜືອ ນຳທີມໂດຍທ່ານ ອານຸລັກ ລໍມະນີຈັນ ຫົວໜ້າທີມງານບໍລິສັດໄຕ໋ບ້ານໂປຣດັກຊັ່ນ ພ້ອມນັກສະແດງຕາກ້ອງຊຶ່ງໃນກອງຖ່າຍແມ່ນເຕັມໄປດ້ວຍບັນຍາກາດຄຶກຄື້ນ.

 ສຳລັບບົດເນື້ອໃນລະຄອນຮູບເງົາໂດຍລວມແລ້ວສ່ອງແສງເຖິງການໃຊ້ຊີວິດໃຫ້ມີຄວາມສຸກບໍ່ຈຳເປັນຕ້ອງຂຶ້ນກັບເງິນທອງຫຼືວ່າສັງຄົມທີ່ສີວິໄລສະເໝີໄປ ແລະສື່ໃຫ້ເຫັນເຖິງການໃຊ້ຊີວິດແບບບ້ານໆຂອງປະຊາຊົນບາງເຂດໃນ ແຂວງຫົວພັນ ໂດຍຈະສື່ໃຫ້ເຫັນວິຖີຊີວິດການເປັນຢູ່ວັດທະນະທຳການປາກເວົ້າ ແລະສຳນຽງທີ່ເປັນເອກະລັກທັງສະຖານທີ່ ແລະຄວາມເປັນເອກະລັກຫຼາຍໆດ້ານຂອງປະຊາຊົນໃນຂອງແຂວງຫົວພັນ.

  ເພື່ອເປັນການເຜີຍແຜ່ໃຫ້ຄົນລາວໃນປະເທດໄດ້ຮູ້ຈັກວັດທະນະທຳຂອງພາກເໜືອຫຼາຍຂຶ້ນໃນອີກມູມໜຶ່ງຍັງສ່ອງແສງເຖິງການທີ່ຄົນເຮົາຮຽນຮູ້ກັບຊີວິດໂຕຈິງໂດຍ ການອອກໄປຄົ້ນພົບສິ່ງໃໝ່ໆດ້ວຍຕົນເອງເພື່ອປ່ຽນແປງແນວຄິດ ຫຼືທັດສະນະຄະຕິຂອງເຮົາເອງໃຫ້ເປີດກ້ວາງຫຼາຍຂຶ້ນ.

   ສຳລັບຕົວລະຄອນຫຼັກແມ່ນມີ 5 ຄົນ ສ່ວນນັກສະແດງຮັບເຊີນແມ່ນ 12 ແລະຍັງມີຫຼາຍໆຕົວລະຄອນທີ່ເປັນນັກສະແດງສົມທົບຊຶ່ງຜູ້ກຳກັບແມ່ນທ່ານ ອານຸລັກ ລໍມະນີຈັນ ຫຼືອານຸລັກໄຕ໋ບ້ານສ່ວນຜູ້ຂຽນບົດ ແລະຮຽບຮຽງແມ່ນທ່ານ ດາວພະຫັດ ພັນທະລາວົງ (ຈອນນີ້) ເລີ່ມເປີດກອງແມ່ນວັນທີ 20 ທັນວາ 2020 ຢູ່ນະຄອນ ຫຼວງວຽງຈັນ ແລະວັນທີ 5 ມັງກອງ 2020 ແມ່ນຖ່າຍທຳຢູ່ແຂວງຫົວພັນ (ຊຳເໜືອ) ລວມທັງໝົດໃນການຖ່າຍທຳແມ່ນ 30 ມື້.

แชร์