ແຂວງວຽງຈັນ ເປີດຫ້ອງການປະສານງານຊາຍແດນ

  ວັນທີ 8 ທັນວາຜ່ານມານີ້ທີ່ເມືອງໝື່ນ ແຂວງວຽງຈັນ ໄດ້ຈັດພິທີມອບ-ຮັບຫ້ອງການປະສານງານຊາຍແດນ (BLO) ທີ່ບ້ານວັງໂດຍການເປັນປະທານຂອງທ່ານ ພັທ ຄຳຟອງ ວົງດາລາແສນ ຮອງຫົວໜ້າກອງບັນຊາການ ປກສ ແຂວງພ້ອມນີ້ກໍມີທ່ານ ພັອ ອານຸເດດ ຄູນຄຳ ຄະນະປະຈຳຫ້ອງວ່າການຮອງຫົວໜ້າຫ້ອງວ່າການກະຊວງ ປກສ, ທ່ານ ແສງເດືອນ ໂພມະວົງສາ ເຈົ້າໜ້າທີ່ຂອງອົງການສະຫະປະຊາຊາດເພື່ອຕ້ານຢາເສບຕິດ ແລະອາຊະຍາກຳປະຈຳ ສປປ ລາວ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ພັທ ຄໍາຟອງ ວົງດາລາແສນ ກ່າວວ່າ: ຫ້ອງການ BL0 ໄດ້ຖືກສ້າງຂຶ້ນດ້ວຍທຶນຊ່ວຍເຫຼືອຂອງອົງການສະຫະປະຊາຊາດເພື່ອຕ້ານຢາເສບຕິດ ແລະອາຊະຍາກໍາ (UNODC) ແລະ ບໍລິສັດຈິດຕະລາດກໍ່ສ້າງສ້ອມແປງເຄຫາສະຖານຈໍາກັດເປັນຜູ້ຮັບເໝົາກໍ່ສ້າງຊຶ່ງໄດ້ລິເລີ່ມສ້ອມແປງກໍ່ສ້າງນັບແຕ່ວັນທີ 7 ກັນຍາ 2020- 30 ຕຸລາ 2020 ຈຶ່ງໄດ້ສໍາເລັດລວມມູນຄ່າ 178,2 ຕື້ກີບ.

  ການສ້າງຫ້ອງ BLO ທີ່ບ້ານວັງ ເມືອງໝື່ນ ຈຸດປະສົງເພື່ອຕ້ານການຜະລິດ, ການປຸງແຕ່ງ, ການຊົມໃຊ້ຢາເສບຕິດ ແລະຕ້ານການລັກລອບຊື້-ຂາຍ,ລໍາລຽງຂົນສົ່ງຢາເສບຕິດຜິດກົດໝາຍຕາມແນວຊາຍເເດນເພື່ອປ້ອງກັນບໍ່ໃຫ້ຄົນໃນທົ່ວສັງຄົມທໍາຜິດກົດໝາຍໂດຍສະເພາະຊາວໜຸ່ມ, ເຍົາວະຊົນຂອງຊາດລຸ້ນສືບທອດຕົກເປັນທາດຂອງຢາເສບຕິດ, ເຮັດໃຫ້ສັງຄົມມີຄວາມສະຫງົບສຸກ, ປອດໄພ ແລະເປັນລະບຽບຮຽບຮ້ອຍດີ, ບໍ່ໃຫ້ມີປະກົດການຫຍໍ້ທໍ້ເກີດຈາກບັນຫາຢາເສບຕິດກາຍເປັນໄພຂົ່ມຂູ່ຕໍ່ຄວາມໝັ້ນຄົງ, ຕໍ່ສະຖຽນລະພາບທາງດ້ານການເມືອງກໍຄືແນວທາງປ່ຽນໃໝ່ຮອບດ້ານຂອງພັກ.

----------------

ຂ່າວ: ດວງມະນີ 

ຮູບພາບ: ໜັງສືພິມເສດຖະກິດ-ສັງຄົມ

แชร์