ຮອງນາຍົກ ເນັ້ນການເງິນສະຫວັນເລັ່ງເກັບທຸກລາຍຮັບໃຫ້ໄດ້ຕາມແຜນ

  ການເກັບລາຍຮັບໄດ້ຕາມແຜນ ຫຼືບໍ່ໄດ້ກໍ່ບໍ່ເປັນບັນຫາຫຍັງແຕ່ອັນທີ່ເປັນບັນຫາຢູ່ບ່ອນວ່າການເກັບລາຍຮັບນັ້ນແມ່ນເກັບໄດ້ຕາມເປົ້າໝາຍນັ້ນໄດ້ໝົດ ຫຼືບໍ? ນີ້ແມ່ນປະເດັນທີ່ ທ່ານ ສົມດີ ດວງດີ ຮອງນາຍົກລັດຖະມົນຕີລັດຖະມົນຕີກະຊວງການເງິນໄດ້ເນັ້ນໃຫ້ພະນັກງານພາຍໃນຂະແໜງການເງິນແຂວງສະຫວັນນະເຂດເພີ່ມຄວາມເອົາໃຈໃສ່ໃນການປະຕິບັດໜ້າທີ່ວິຊາສະເພາະຂອງຕົນໃຫ້ບັນລຸໃນປີ 2020 ທີ່ຈະໝົດໃນອີກບໍ່ຊ້ານີ້.

  ຊຶ່ງຄໍາຊີ້ແຈງແນະນຳນີ້ໄດ້ມີຂຶ້ນພາຍຫຼັງທີ່ທ່ານ ສົມດີ ດວງດີ ຮອງນາຍົກລັດຖະມົນຕີໄດ້ລົງຊີ້ນໍາ ແລະພົບປະໂອ້ລົມກັບພະນັກງານການເງິນແຂວງສະຫວັນນະເຂດ ໃນທ້າຍເດືອນພະຈິກຜ່ານມາ, ຢູ່ທີ່ຫ້ອງປະຊຸມພະແນກການເງິນແຂວງຊຶ່ງ ທ່ານ ແສນສັກ ສຸລິສັກ ຫົວໜ້າພະແນກການເງິນແຂວງສະຫວັນນະເຂດລາຍງານວ່າ, ເກືອບ 11 ເດືອນປີ 2020 ນີ້, ແຂວງສະຫວັນນະເຂດສາມາດເກັບລາຍຮັບໄດ້ 1.160,95 ຕື້ກີບ, ເທົ່າກັບ 84,05% ຂອງແຜນການປີ, ໃນນີ້ພູດຂອງສູນກາງປະຕິບັດຢູ່ແຂວງໄດ້ຈໍານວນ 653,70 ຕື້ກີບ, ເທົ່າກັບ 81,84% ຂອງແຜນການປີ; ລາຍຮັບພູດຂອງທ້ອງຖິ່ນປະຕິບັດໄດ້ 507 ຕື້ກີບ, ເທົ່າກັບ 87,09%. ສໍາລັບໝົດປີ 2020 ແຂວງສະຫວັນນະເຂດຈະສູ້ຊົນສ້າງລາຍຮັບໃຫ້ໄດ້ 1.319,73 ຕື້ກີບ, ເທົ່າກັບ 95,55% ຂອງແຜນການ, ທຽບໃສ່ໄລຍະດຽວຂອງປີຜ່ານມາ ຫຼຸດລົງ 4,26% ໃນນີ້ເປັນພູດຂອງສູນກາງປະຕິບັດຢູ່ແຂວງ 738,67 ຕື້ກີບ,ເທົ່າກັບ 92,47% ຂອງແຜນການປີ,ລາຍຮັບພູດຂອງທ້ອງ ຖິ່ນ 597,27 ຕື້ກີບ, ເທົ່າກັບ 99,45% ຂອງແຜນການປີ,ແຕ່ໃນເບື້ອງລາຍຈ່າຍຈະສາມາດປະຕິບັດໃຫ້ໄດ້ປະມານ 794,91 ຕື້ກີບ,ເທົ່າກັບ 98,68% ຂອງແຜນການປີຊຶ່ງຈະມີການດຸ່ນດ່ຽງງົບປະມານໝົດປີ 2020 ທີ່ເປັນແຜນງົບປະມານຂາດດຸນຕາມແຜນການດັດແກ້ 221,64 ຕຶ້ກີບ ໃນນີ້ສູນກາງໄດ້ດຸ່ນດ່ຽງໃຫ້ແລ້ວ 168,45 ຕຶ້ກີບ ແລະຈະຕ້ອງດຸ່ນດຽງໃຫ້ແຂວງຕື່ມ 53,19 ຕື້ກີບ.

  ທ່ານ ສົມດີ ດວງດີ ໄດ້ກ່າວໂອ້ລົມວ່າ: ການເກັບລາຍຮັບໃນປີນີ້ໄດ້ຕາມເປົ້າໝາຍ ຫຼືບໍ່ໄດ້ຕາມເປົ້າທີ່ວາງໄວ້ນັ້ນກໍ່ເປັນເລື່ອງທີ່ທໍາມະດາແຕ່ກໍ່ຄວນຄໍານຶງເຖິງການເກັບອີກນັ້ນແມ່ນເກັບໝົດທຸກເປົ້າໝາຍໄດ້ໝົດ ຫຼືບໍ່ນັ້ນລະເປັນບັນຫາສໍາຄັນສະນັ້ນກໍ່ໃຫ້ພາກສ່ວນກ່ຽວຂ້ອງໄດ້ຕິດຕາມການປະຕິບັດມາດຕະການຊຸກຍູ້ໃຫ້ຜູ້ປະກອບການມາແຈ້ງເສຍອາກອນ ແລະຕິດຕາມມາດຕະການຊຸກດັນໃຫ້ຫົວໜ່ວຍວິສາຫະກິດທີ່ມີລາຍຮັບຫຼາຍເຂົ້າໃນລະບົບອາກອນມູນຄ່າເພີ່ມໃນແຕ່ລະເດືອນໂດຍສະເພາະແມ່ນ ບັນດາຫົວໜ່ວຍທຸລະກິດທີ່ນະຄອນ ໄກສອນ ພົມວິຫານ ແລະເມືອງຕ່າງໆຄຸ້ມຄອງ, ຈາກນີ້ກໍ່ແມ່ນການຕິດຕາມມາດຕະການຊຸກຍູ້ ແລະສົ່ງເສີມໃຫ້ຫົວໜ່ວຍທຸລະ ກິດທີ່ມີເງື່ອນໄຂນໍາໃຊ້ເຄື່ອງບັນທຶກຂາຍ ແລະ ເຂົ້າສູ່ໃນລະບົບຄຸ້ມຄອງຂອງຂະແໜງການເງິນ ແລະ ກໍ່ຕ້ອງໃຫ້ມີຄວາມເຂັ້ມງວດໃນການຄຸ້ມຄອງສາງສິນຄ້າ, ສາງນໍ້າ ມັນ, ອາຍແກັສ ແລະກວດກາການເຄື່ອນຍ້າຍສິນຄ້າປະເພດດັ່ງກ່າວໃນຂອບເຂດລັດສະໝີຂອງແຂວງຕື່ມອີກ,ທັງສຸມໃສ່ກວດກາບັນຊີແບບຄົບຊຸດ: ສຸມໃສ່ກວດກາແບບໄວທີ່ເລັ່ງໃສ່ຫົວໜ່ວຍທຸລະກິດຂະໜາດໃຫຍ່; ບໍລິສັດຂາເຂົ້າ-ຂາອອກ, ກາຊິໂນ; ບໍລິສັດຊັນເປເປີ, ໂຮງງານຢາສູບ,ໂຮງງານນໍ້າຕານ,ໂຄງການພັດທະນາພື້ນຖານໂຄງລ່າງ, ບໍລິສັດຂົນສົ່ງສິນຄ້າຜ່ານແດນ, ເຂື່ອນໄຟຟ້າ ແລະອື່ນໆ.

----------------

ຂ່າວ: ສະຫວັນ 

ຮູບພາບ: ໜັງສືພິມເສດຖະກິດ-ສັງຄົມ

แชร์