ກຽມພົບງານໃຫຍ່ສະແດງຜະລິດຕະພັນລາວ 25 ທັນວານີ້

   ວັນທີ 10 ທັນວາ 2020 ທີ່ສະພາການຄ້າ ແລະອຸດສາຫະກຳ (ສຄອຊ) ໄດ້ຈັດພິທີຖະແຫຼງຂ່າວງານຜະລິດຕະພັນລາວ 2020 ພາຍໃຕ້ຫົວຂໍ້ “ລາວ ທ່ຽວລາວ ຊົມໃຊ້ຜະລິດຕະພັນລາວ” ໂດຍເປັນກຽດຖະແຫຼງຂອງທ່ານນາງ ຈັນທະຈອນ ວົງໄຊ ຮອງປະທານ ສຄອຊ, ມີທ່ານ ຄໍາຫຼ້າ ນາກຄະວົງ ຮອງປະທານ ສຄອ ນະຄອນ ຫຼວງ, ທ່ານ ມາກ ລູວັນ ຜູ້ຈັດການທົ່ວໄປບໍລິສັດປີໂຕຣລ້ຽມເທຣດດີງລາວມະຫາຊົນ, ທ່ານ ສີບຸນທໍາ ສີບຸນມີ ຜູ້ອໍານວຍການໃຫຍ່ບໍລິສັດ ລາວເວີນ ມະຫາຊົນພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.


   ທ່ານນາງ ຈັນທະຈອນ ກ່າວວ່າ: ປີນີ້ລາວແມ່ນໄດ້ຮັບຜົນກະທົບຫຼາຍພໍສົມຄວນຈາກການແຜ່ລະບາດຂອງເຊື້ອພະຍາດໂຄວິດ-19 ຊຶ່ງລັດຖະບານໄດ້ວາງມາດຕະການ ແລະເງື່ອນໄຂເພື່ອສະກັດກັ້ນການແຜ່ລະບາດໄດ້ເປັນຢ່າງດີ ແລະກໍ່ໄດ້ມີການຜ່ອນຜັນເພື່ອຟື້ນຟູເສດຖະກິດໃນແຕ່ໄລຍະ. ດັ່ງນັ້ນ, ເພື່ອປະຕິບັດຕາມນະໂຍບາຍພັດທະນາເສດຖະກິດ-ສັງຄົມ ຂອງພັກ-ລັດຖະບານຕໍ່ກັບການກະຕຸ້ນເສດຖະກິດພາຍໃນ, ຊຸກຍູ້ໃຫ້ມີການໃຊ້ຈ່າຍ ແລະການບໍລິການພາຍໃນປະເທດຫຼາຍຂຶ້ນພ້ອມທັງເປັນການກະຕຸກຊຸກຍູ້ສົ່ງເສີມການຜະລິດເປັນສິນຄ້າພາຍໃນປະເທດ ແລະເພື່ອຊຸກຍູ້ສົ່ງເສີມສ້າງຄວາມເຂັ້ມແຂງໃຫ້ຜູ້ປະກອບການ.


  ຊຶ່ງງານດັ່ງກ່າວຈະໄດ້ຈັດຂຶ້ນໃນລະຫວ່າງວັນທີ 25 ທັນວາ 2020 ຫາ 3 ມັງກອນ 2021 ທີ່ສູນການຄ້າລາວ-ໄອເຕັກຕຶກເກົ່ານະຄອນຫຼວງວຽງຈັນ.


  ງານໃນຄັ້ງນີ້ຈະໄດ້ລະດົມຂົນຂວາຍຜູ້ປະກອບການ, ຜູ້ຜະລິດສິນຄ້າໃນທຸກຂະແໜງໃນທົ່ວປະເທດເພື່ອນຳເອົາຜະລິດຕະພັນເປັນເອກະລັກຂອງແຕ່ລະແຂວງມາວາງສະແດງ ແລະ ຜະລິດຕະພັນໃໝ່ໆ, ໂຄສະນາ ແລະ ຈຳໜ່າຍຫຼາຍກ່ວາ 200 ຫ້ອງວາງສະແດງ ແລະ ຍັງມີກິດຈະກໍາແຈກຖາມຄັ້ງຍິ່ງໃຫຍ່ຈາກຫຼາຍບໍລິສັດທີ່ເຂົ້າ ຮ່ວມໃນງານຄັ້ງນີ້ພ້ອມດຽວກັນນັ້ນກໍຈະມີກິດຈະກໍາຕ່າງໆເຊັ່ນ: ກອງປະຊຸມສໍາມະນາໃຫ້ຄວາມຮູ້ແກ່ຜູ້ປະກອບການທາງດ້ານ E Commerce,ການເຂົ້າຫາແຫຼ່ງທຶນ, ການປັບຕົວໃນສະພາບ New Normal, ກອງປະຊຸມພົບປະທຸລະກິດ ແລະອື່ນໆ. ນອກຈາກນີ້ພາຍໃນງານຜູ້ປະກອບການທີ່ມີຜະລິດຕະພັນສາມາດສະເໜີລົງທຽນນໍາໃຊ້ກາໝາຍ Mede in Lao ນໍາສະພາການຄ້າ ແລະອຸດສາຫະກໍາແຫ່ງຊາດລາວໂດຍບໍ່ເສຍຄ່າໃດໆ.

แชร์