45 ປີ ສປປ ລາວ ອະນຸມັດການລົງທຶນທັງໝົດ 4.635 ໂຄງການ

  ພາຍຫຼັງປະເທດຊາດໄດ້ຮັບການປົດປ່ອຍ ແລະປະກາດສ້າງຕັ້ງ ສປປ ລາວ ຂຶ້ນວັນທີ 2 ທັນວາ 1975 ນັບນັ້ນມາເຖິງປະຈຸບັນກໍຄົບຮອບ 45 ປີພໍດີຊຶ່ງພັກ ແລະລັດຖະບານຍາມໃດກໍສຸມທຸກກຳລັງແຮງລວມຂອງຊາດໃນການປົກປັກຮັກສາ ແລະ ສ້າງສາພັດທະນາປະເທດຊາດ,ເຮັດໃຫ້ມີສະຖຽນລະພາບທາງດ້ານການເມືອງ, ສັງ ຄົມມີຄວາມສະຫງົບ, ເປັນລະບຽບຮຽບຮ້ອຍກາຍເປັນເງື່ອນໄຂອັນສຳຄັນເອື້ອອໍານວຍໃຫ້ເສດຖະກິດເຕີບໂຕຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນໄດ້ຮັບການປັບ ປຸງດີຂຶ້ນເປັນກ້າວໆທີ່ສຳຄັນຄືນັກລົງທຶນໄດ້ຫຼັ່ງໄຫຼເຂົ້າມາລົງທຶນໃສ່ຂົງເຂດຕ່າງໆເພີ່ມຂຶ້ນຢ່າງຕໍ່ເນື່ອງລວມຮອດຂະນະນີ້ລັດຖະບານໄດ້ອະນຸຍາດແລ້ວທັງໝົດ4.635 ໂຄງການມູນຄ່າ 40,3 ຕື້ໂດລາ.

  ທ່ານ ສອນໄຊ ສີພັນດອນ ຮອງນາຍົກລັດຖະມົນຕີລັດຖະມົນຕີກະຊວງແຜນການ ແລະການລົງທຶນໄດ້ໃຫ້ສຳພາດຕໍ່ສື່ມວນຊົນໃນວັນທີ 1 ທັນວາຜ່ານມາເນື່ອງໃນໂອກາດສະເຫຼີມສະຫຼອງວັນຊາດທີ 2 ທັນວາວ່າ: ຕະຫຼອດໄລຍະ 45 ປີທີ່ຜ່ານມາຂະແໜງແຜນການ ແລະການລົງທຶນໄດ້ປະກອບສ່ວນເຂົ້າໃນຜົນສໍາເລັດລວມຂອງຊາດໃນການປົກປັກຮັກສາ ແລະສ້າງສາພັດທະນາປະເທດຊາດ,ເຮັດໃຫ້ປະເທດເຮົາມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ,ເປັນລະບຽບຮຽບ ຮ້ອຍ, ປອດໄພ ແລະ ປວງຊົນລາວມີຄວາມສາມັກຄີເປັນປຶກແຜ່ນແໜ້ນໜາສ້າງເງື່ອນໄຂເອື້ອອໍານວຍໃຫ້ເສດຖະກິດມີການເຕີບໂຕຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນເປັນກ້າວໆ.


   ການເຕີບໂຕທາງດ້ານເສດຖະກິດນັບແຕ່ປີ 1991 ເຖິງ 2020 ເສດຖະກິດໄດ້ເຕີບໂຕສະເລ່ຍ 6,6% ຕໍ່ປີ ເປັນຕົ້ນໄລຍະ 1991-1995 ເຕີບໂຕ 6,4% ຕໍ່ປີ, ໄລຍະ 1996-2000 ເຕີບໂຕ 6,2% ຕໍ່ປີ, ໄລຍະ 2001-2005 ເຕີບໂຕ 6,3% ຕໍ່ປີ, ໄລຍະ 2006-2010 ເຕີບໂຕ 7,9% ຕໍ່ປີ, ໄລຍະ 2011-2015 ເຕີບໂຕ 7,9%, ໄລຍະ 2016-2020 ເຕີບໂຕ 5,8% ຕໍ່ປີ. ລວມຍອດຜະລິດຕະພັນພາຍໃນ (GDP) ຕໍ່ຫົວຄົນໄດ້ເພີ່ມຂຶ້ນ 13 ເທື່ອຈາກລະດັບ 207 ໂດລາ ຕໍ່ຄົນ ໃນປີ 1990 ເປັນ 2.664 ໂດລາ/ຕໍ່/ຄົນໃນປີ 2020.

ໂຄງປະກອບເສດຖະກິດຂອງປະເທດໄດ້ມີການຫັນປ່ຽນຕາມທິດການຫັນເປັນອຸດສາຫະກໍາ ແລະທັນສະໄໝເທື່ອລະກ້າວຄື: ໂຄງປະກອບຂອງຂະແໜງກະສິກໍາ-ປ່າໄມ້ຫຼຸດລົງຈາກ 60,7% ໃນປີ 1990 ເປັນ 15,1% ຂອງລວມຍອດຜະລິດຕະພັນພາຍໃນທັງໝົດໃນປີ 2020, ຂະແໜງອຸດສາຫະກໍາເພີ່ມຂຶ້ນຈາກ 14,4% ໃນປີ 1990 ເປັນ 32% ໃນປີ 2020 ແລະຂະແໜງບໍລິການເພີ່ມຂຶ້ນຈາກ 24,1% ໃນປີ 1990 ເປັນ 41,7% ໃນປີ 2020; ວຽກງານການລົງທຶນຂອງເອກະ ຊົນພາຍໃນ ແລະຕ່າງປະເທດໄດ້ເປັນແຫຼ່ງທຶນທີ່ສໍາຄັນປະກອບສ່ວນຕໍ່ການພັດທະນາເສດຖະກິດ-ສັງຄົມຂອງປະເທດ, ມູນຄ່າອະນຸມັດການລົງທຶນຂອງເອກະຊົນທັງພາຍໃນ ແລະຕ່າງປະເທດແຕ່ປີ 1988 ເຖິງປີ 2020 ບັນລຸ 40,3 ຕື້ໂດລາ ແລະມີ 4.635 ໂຄງການຈາກ 53 ປະເທດ ແລະເຂດແຄວ້ນ.


 ສ່ວນການພັດທະນາເຂດເສດຖະກິດພິເສດໄດ້ມີຄວາມຄືບໜ້າເປັນກ້າວໆມາຮອດປັດຈຸບັນມີເຂດເສດຖະກິດພິເສດທັງໝົດ 12 ແຫ່ງ, ມີບໍລິສັດມາລົງທຶນ 848 ບໍລິ ສັດມີທຶນຈົດທະບຽນ 13,9 ຕື້ໂດລາ ໃນນີ້ເປັນການລົງທຶນຕົວຈິງ 5,69 ຕື້ໂດລາ, ໃນນັ້ນ, ໄດ້ກວມເອົາຂະແໜງອຸດສາຫະກໍາ 18%, ການຄ້າ 26% ແລະການບໍລິການ 56%, ສ້າງວຽກເຮັດງານທໍາໄດ້ 55,7 ພັນຄົນ, ສາມາດດຶງດູດເອົາບໍລິສັດທີ່ມີຊື່ສຽງ ແລະປະສົບການຈາກຕ່າງປະເທດເຮັດໃຫ້ການຜະລິດຂອງລາວເປັນສ່ວນໜຶ່ງຂອງຕ່ອງໂສ້ການສະໜອງຂອງພາກພື້ນ ແລະສາກົນ.

แชร์