ກອງທຶນ SME ໃຫ້ຜົນດີແກ່ສັງຄົມ

  ກອງປະຊຸມສົ່ງເສີມເຂົ້າເຖິງການບໍລິການທາງດ້ານການເງິນໃນ ສປປ ລາວ ປະຈໍາປີ 2020 ຫວ່າງທ້າຍເດືອນພະຈິກຜ່ານມານີ້; ທ່ານນາງ ລັດທະນາ ດວງບຸບຜາ ຮອງຫົວໜ້າກົມສົ່ງເສີມວິສາຫະກິດຂະໜາດນ້ອຍແລະກາງ (ທສວ ຫຼື SME) ກະຊວງອຸດສາຫະກຳ ແລະການຄ້າ, ຜູ້ອຳນວຍການກອງທຶນສົ່ງເສີມ SME ໄດ້ນຳສະເໜີການເຂົ້າເຖິງແຫຼ່ງທຶນດອກເບ້ຍທີ່ເໝາະສົມຕາມນະໂຍບາຍຂອງລັດຖະບານໂດຍກອງທຶນດັ່ງກ່າວເປັນບ່ອນລະດົມທຶນຈາກແຫຼ່ງຕ່າງໆ ຢ່າງລວມສູນ; ມີທຶນຮອນທີ່ໝັ້ນຄົງ ແລະຕໍ່ເນື່ອງເຂົ້າໃນວຽກງານສົ່ງເສີມຈຸນລະວິສາຫະກິດ-ວິສາຫະກິດຂະໜາດນ້ອຍ ແລະກາງ ຫຼື MSME ໃຫ້ເຕີບໃຫຍ່ເຂັ້ມແຂງ ແລະຂະຫຍາຍຕົວຕາມດຳລັດ25/ລບ.

 ທ່ານຜູ້ອຳນວຍການກອງທຶນດັ່ງກ່າວແຈ້ງໃຫ້ຮູ້ກ່ຽວກັບການສະໜອງສິນເຊື່ອແກ່ SME ຂອງທສວຜ່ານມາໂດຍມີທຶນຂອງລັດຖະບານປະກອບເບື້ອງຕົ້ນ 32 ຕື້ກີບ; ໂຄງການເຂົ້າເຖິງແຫຼ່ງທຶນຂອງ SME 111,68 ຕື້ກີບ; ບ້ວງເງິນສະສົມຂອງທສວທີ່ໄດ້ຈາກດອກເບ້ຍ 6,32 ຕື້ກີບ ແລະລັດຖະບານປະກອບທຶນເພີ່ມ 182 ຕື້ກີບ ລວມເປັນທຶນທັງໝົດ 332 ຕື້ກີບ ໃນນີ້ບ້ວງເງິນຂອງລັດຖະບານສະໜອງໃຫ້ແກ່ກອງທຶນສົ່ງເສີມ SME ຊຶ່ງຈັດສັນມາຈາກບ້ວງດັດແກ້ມະຫາພາກພາຍໃຕ້ການສະ ໜັບສະໜູນຈາກ ADB ມູນຄ່າ 32 ຕື້ກີບ; ບ້ວງເງິນຊ່ວຍເຫຼືອລ້າ ແລະ ກູ້ຢືມຈາກທະນາຄານໂລກພາຍໃຕ້ໂຄງການເຂົ້າເຖິງແຫຼ່ງທຶນ SME ມູນຄ່າ 111,68 ຕື້ກີບ; ບ້ວງເງິນສະສົມຂອງ ທສວ ຂອງກອງທຶນ SME ທີ່ ໄດ້ຈາກດອກເບ້ຍທະນາຄານ ແລະເງິນດອກເບ້ຍທີ່ເກັບຄືນຈາກໂຄງການ; ບ້ວງເງິນທີ່ລັດຖະບານປະກອບທຶນໃຫ້ກອງທຶນ SME 117 ຕື້ກີບ ໂດຍຜ່ານທະນາຄານຊຶ່ງບ້ວງເງິນລ້າສຸດ (117 ຕື້ກີບ) ມີອັດຕາດອກເບ້ຍທະນາຄານປ່ອຍກູ້ 3% ໄລຍະປອດຕົ້ນທຶນສູງສຸດ 2 ປີ, ມີໄລຍະກູ້ຢືມ 1-10 ປີໂດຍມີທະນາພັດທະນາລາວ, ໄຊງ່ອນເທືອງຕິ່ນລາວ, ຮ່ວມທຸລະກິດລາວ-ຫວຽດ ແລະທະນາຄານມາຣູຮານເຈແປນລາວ.

  ທ່ານນາງ ລັດທະນາ ດວງບຸບຜາ ເນັ້ນໃຫ້ເຫັນໂຄງການສິນເຊື່ອໃຫ້ແກ່ຈຸລະວິສາຫະກິດ (ຈວກ) ໂດຍມີແຜນພັດທະນາ SME 2016-2020; ສ້າງຄວາມຫຼາກຫຼາຍການບໍລິການດ້ານການເງິນໃຫ້ແກ່ SME; ຈວກທີ່ມີແຮງງານ 1-5 ຄົນທີ່ເຂົ້າບໍ່ເຖິງສິນເຊື່ອໄລຍະຍາວ; ຈວກບໍ່ສາມາດເຂົ້າເຖິງສິນເຊື່ອທະນາຄານ (ບໍ່ຂຶ້ນທະບຽນ) ແລະຈວກຂາດຄວາມຮູ້ໃນການບໍລິຫານການເງິນ. ກ່ຽວກັບສະຖາບັນການເງິນຈຸລະພາກ (ສກຈ) ແມ່ນມີຈຸດປະສົງຊ່ວຍຫຼຸດຕົ້ນທຶນຂອງ ສກຈ; ສະໜອງທຶນໄລຍະຍາວ; ຊ່ວຍ ສກຈ ສົ່ງເສີມດ້ານວິຊາການ ແລະສ້າງເງື່ອນໄຂໃຫ້ຈວກໄດ້ຮັບສິນເຊື່ອທີ່ເໝາະສົມທັງອັດຕາດອກເບ້ຍ ແລະໄລຍະກູ້. ສຳລັບລູກຄ້າຂອງ ສກຈ 60% ວິສາຫະກິດຄ້າຂາຍ ແລະບໍລິການ; 20% ສິນເຊື່ອສ່ວນບຸກຄົນ ແລະ 10% ສິນເຊື່ອສຳລັບການຜະລິດ. ດ້ານເງື່ອນໄຂ ແລະໄລຍະປ່ອຍກູ້ຂອງ ສກຈ ແມ່ນມີອັດຕາດອກເບ້ຍ 2,5-3,5% ຕໍ່ເດືອນ; ປ່ອຍກູ້ຕໍ່າສຸດ 1 ເດືອນ, ສູງສຸດ 60 ເດືອນ; ວົງ ເງິນກູ້ຕໍ່າສຸດ 1 ລ້ານກີບ, ສູງສຸດ 50 ລ້ານກີບ ແລະ ວົງເງິນກູ້ 10 ລ້ານກີບລົງມາບໍ່ຈໍາເປັນມີຫຼັກຊັບຄໍ້າປະກັນ.

  ຂະນະດຽວກັນ; ກໍ່ມີຂໍ້ຈໍາກັດ ແລະສິ່ງທ້າທາຍຂອງສກຈເປັນຕົ້ນຂາດຂໍ້ມູນ ແລະປະຫວັດການເງິນຂອງລູກຄ້າໃນການປະເມີນຄວາມສ່ຽງ; ຕົ້ນທຶນໃນການດຳເນີນງານສູງ (16-22%) ເປັນທຸລະກິດທີ່ເຂັ້ມງານ; ບໍ່ເຂົ້າເຖິງແຫຼ່ງທຶນໄລຍະຍາວ (ສກຈບ); ຂອບເຂດເນື້ອທີ່ບໍລິການດ້ານການເງິນກໍ່ຄືຄວາມສາມາດບໍລິການປຶກສາໃຫ້ລູກຄ້າຍັງມີຈຳກັດ; ແຕ່ມີຄວາມຕ້ອງການສິນເຊື່ອຂອງຈວກ ໃນແຫຼ່ງທຶນໄລຍະຍາວເພື່ອລົງທຶນໃສ່ໂຄງລ່າງ, ເຄື່ອງຈັກແລະເຄື່ອງມືການຜະລິດ; ລູກຄ້າຂອງ ສກຈ ໃນຂະແໜງການຜະລິດມີປະມານ 10%; ຈວກທີ່ຂຶ້ນທະບຽນຢ່າງເປັນທາງການ ແລະມີຫຼັກຊັບຄໍ້າປະກັນຈະເລືອກກູ້ເງິນກັບທະນາຄານທຸລະກິດ. ແຕ່ພ້ອມນີ້ຈວກກໍ່ມີອຸປະສັກ, ຂໍ້ຈໍາກັດຊຶ່ງສ່ວນຫຼາຍບໍ່ຂຶ້ນທະບຽນບໍ່ສາມາດເຂົ້າເຖິງແຫຼ່ງທຶນດອກເບ້ຍຕໍ່າໄດ້; ອັດຕາດອກເບ້ຍສູງສໍາລັບລົງທຶນໄລຍະຍາວຂາດແຫຼ່ງທຶນໃນການປັບປຸງ ແລະຂະຫຍາຍທຸລະກິດ; ມີຄວາມສ່ຽງໃນການຕະຫຼາດ, ລາຄາ, ໄພທໍາມະຊາດ, ສຸຂະພາບ ແລະອື່ນໆ; ການນໍາໃຊ້ເງິນກູ້ບໍ່ຖືກເປົ້າໝາຍ ແລະຄວາມຮູ້ດ້ານການເງິນຍັງຈໍາກັດ.

  ແຜນດໍາເນີນງານຂອງໂຄງການໄດ້ເລືອກເອົາ 4 ສກຈ ເຂົ້າຮ່ວມໂຄງການມີ ສກຈ ບໍ່ຮັບຝາກເງິນ (ສກຈບ) 2 ແຫ່ງ ແລະ ສກຈ ຮັບຝາກເງິນ (ສກຈຮ)2 ແຫ່ງ ໂດຍມີມາດຕະຖານ, ເງື່ອນໄຂຂອງສກຈຕ້ອງຂຶ້ນທະບຽນຖືກຕ້ອງຕາມກົດໝາຍວ່າດ້ວຍວິສາຫະກິດຂອງສປປລາວ, ປະຕິບັດສອດຄ່ອງກັບກົດໝາຍທີ່ກ່ຽວຂ້ອງຂອງ ສປປ ລາວ; ມີຜົນກໍາໄລ 2 ປີຜ່ານມາ; ມີ NPL ຫຼື Par >30 ມື້ບໍ່ເກີນ 5%; ມີບົດລາຍງານການກວດສອບ 2 ປີຜ່ານມາ; ມີປະສົບການໃນການສະໜອງສິນເຊື່ອໃຫ້ຂະແໜງການຜະລິດ; ມີຮູບແບບ ແລະລະບົບສະໜອງສິນເຊື່ອທີ່ມີປະສິດທິພາບ; ມີປະສົບການໃນການ ໃຫ້ການຊ່ວຍເຫຼືອດ້ານວິຊາການແກ່ຈວກ ແລະມີກິດຈະກໍາຊ່ວຍເຫຼືອສັງຄົມທີ່ດີ. ດ້ານເງື່ອນໄຂພື້ນຖານໃນການສະໜອງທຶນ/ສິນເຊື່ອໂດຍສະໜອງທຶນໃຫ້ ສກຈ 4 ແຫ່ງໆລະ 540 ລ້ານກີບ, 500 ລ້ານກີບເປັນສິນເຊື່ອ ແລະ 40 ລ້ານກີບ ເປັນງົບປະມານສໍາລັບໂຄງການຊ່ວຍເຫຼືອວິຊາການ; ອັດຕາດອກເບ້ຍສະໜອງໃຫ້ສກຈ 4%ຕໍ່ປີ, ໄລຍະ 6 ປີ; ອັດຕາດອກເບ້ຍປ່ອຍຕໍ່ໃຫ້ຈວກບໍ່ເກີນ 1% ຕໍ່ເດືອນ ໄລຍະປ່ອຍກູ້ໃຫ້ຈວກມີທຶນໝູນວຽນ 3, 6, 9, 12 ເດືອນ; ທຶນເພື່ອລົງທຶນໃຫ້ໂຄງການເຄື່ອງຈັກ ແລະ ປັບປຸງທຸລະກິດ1-5 ປີ; ມີ 70% ເປັນສິນເຊື່ອໄລຍະຍາວ 2-5 ປີ ສໍາລັບທຶນຄົງທີ່ ແລະ 30% ເປັນສິນເຊື່ອໄລຍະສັ້ນ 3 ເດືອນຫາ 1 ປີສໍາລັບທຶນໝູນວຽນ; 70% ຂອງທຶນສະໜອງໃຫ້ຈວກ ໃນຂະແໜງການຜະລິດ, 30% ຂະແໜງບໍລິການແລະການຄ້າ ແລະຕໍ່ຂະແໜງບູລິມະສິດໃນການປ່ອຍສິນເຊື່ອແມ່ນມີຂະແໜງກະສິກໍາ (ປູກຝັງ-ລ້ຽງສັດ), ຫັດຖະກໍາ, ອຸດສາຫະກໍາ-ປຸງແຕ່ງ ແລະຂະແໜງການຄ້າ-ການບໍລິການ.

--------------

ຂ່າວ: ຣັດສະໝີ ດວງສັດຈະ 

ຮູບພາບ: ໜັງສືພິມເສດຖະກິດ-ສັງຄົມ

แชร์