ກຸ່ມຊາວນາບ້ານຜັກອີ່ຕູ່ ຂະຫຍາຍແນວພັນເຂົ້າເປັນສິນຄ້າ

  ກຸ່ມຊາວນາຂະຫຍາຍແນວພັນເຂົ້າບ້ານຜັກອີ່ຕູ່ ເມືອງໜອງບົກ ແຂວງຄຳມ່ວນ ເປັນຕົວແບບໃນການຂະຫຍາຍແນວພັນເຂົ້າທີ່ມີຄຸນນະພາບດີສະໜອງໃຫ້ແກ່ຊາວ ນານໍາໄປຜະລິດເຂົ້າທີ່ມີຄຸນນະພາບປະກອບສ່ວນໃນວຽກງານການຜະລິດສະບຽງອາຫານ ແລະຜະລິດເປັນສິນຄ້າສ້າງລາຍຮັບໃຫ້ແກ່ຄອບຄົວເພື່ອຫຼຸດພົ້ນຈາກຄວາມທຸກຍາກເທື່ອລະກ້າວ.

  ທ່ານ ສີຮອງ ໂຄດຕະວົງ ຕາງໜ້າກຸ່ມຊາວນາບ້ານຜັກອີ່ຕູ່ໄດ້ລາຍງານຕໍ່ກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງຄໍາມ່ວນກ່ຽວກັບການຂະຫຍາຍແນວພັນ ເຂົ້າເປັນສິນຄ້າຊຶ່ງສະຫາຍໄດ້ກ່າວວ່າ: ກຸ່ມຂະຫຍາຍແນວພັນເຂົ້າບ້ານຜັກອີ່ຕູ່ ເມືອງໜອງບົກ ໄດ້ສ້າງຕັ້ງຂຶ້ນໃນປີ 2011, ມີສະມາຊິກກຸ່ມຈຳນວນ 11 ຄອບຄົວ, ມີເນື້ອທີ່ການຜະລິດນາແຊງ 22, 5ເຮັກຕາ, ນາປີ 38,5 ເຮັກຕາ, ຈຸດປະສົງຕົ້ນຕໍຂອງກຸ່ມແມ່ນຂະ ຫຍາຍແນວພັນເຂົ້າລຸ້ນ 3 ທີ່ມີຄຸນ ນະພາບດີສະໜອງໃຫ້ແກ່ຊາວນານໍາໄປຜະລິດເຂົ້າຄຸນນະພາບເພື່ອບໍລິໂພກ ແລະຂາຍເປັນສິນຄ້າ, ຈໍາໜ່າຍຢູ່ພາຍໃນກຸ່ມ ແລະສະໜອງໃຫ້ຜູ້ປະກອບ, ບັນດາໂຄງການຕ່າງໆ, ນອກຈາກການຂະຫຍາຍແນວພັນເຂົ້າແລ້ວ, ປະຈຸບັນກຸ່ມຂອງພວກເຮົາຍັງໄດ້ຜະລິດເຂົ້າຕາມມາດຕະຖານກະສິກໍາທີ່ດີ (GMP) ຊຶ່ງໄດ້ຮັບການສະໜັບສະໜູນຈາກໂຄງການຜະລິດເຂົ້າສະອາດເປັນມິດກັບສິ່ງແວດລ້ອມໃນມູນຄ່າ 50.000 ໂດລາ, ນອກນັ້ນບັນດາສະມາຊິກພາຍໃນກຸ່ມຍັງໄດ້ມີການລ້ຽງສັດ ແລະປູກພືດອື່ນໆ, ເພື່ອບໍລິໂພກ ແລະຂາຍເປັນລາຍຮັບເພີ່ມໃຫ້ແກ່ຄອບຄົວ,ສິ່ງໜຶ່ງທີ່ເປັນການຢັ້ງຢືນວ່າ: ກຸ່ມຂະຫຍາຍແນວພັນເຂົ້າຂອງພວກເຮົາມີຜົນສໍາເລັດນັ້ນກໍ່ຄື: ໃນປີ 2017 ສະມາຊິກຂອງກຸ່ມໄດ້ຮັບຫຼຽນກາຊາວນາດີເດັ່ນຂອງອາຊຽນຊຶ່ງເປັນຄົນທໍາອິດຂອງ ສປປ ລາວ ແລະພິທີມອບ-ຮັບຫຼຽນດັ່ງກ່າວໄດ້ຈັດຂຶ້ນທີ່ປະເທດຟີລິບປິນ.

  ຜົນສໍາເລັດທັງໝົດຂອງກຸ່ມທີ່ໄດ້ກ່າວມານັ້ນກໍ່ຍ້ອນວ່າ: ໄດ້ຮັບຄວາມເອົາໃຈໃສ່ຊີ້ນໍາຢ່າງໃກ້ຊິດຈາກຂັ້ນເທິງ ແລະພາກສ່ວນກ່ຽວຂ້ອງໂດຍສະເພາະແມ່ນພະແນກກະສິກໍາ ແລະ ປ່າໄມ້ແຂວງ, ຫ້ອງການກະສິກໍາ ແລະ ປ່າໄມ້ເມືອງຊຶ່ງໄດ້ເອົາໃຈໃສ່ຢ່າງຕໍ່ເນື່ອງໃນການຊຸກຍູ້ສົ່ງເສີມ, ສ້າງຄວາມເຂັ້ມແຂງໃຫ້ແກ່ກຸ່ມຂອງພວກເຮົາເຊັ່ນ: ການຝຶກອົບຮົມ, ການນໍາພາໄປທັດສະນະສຶກສາທັງພາຍໃນ-ສາກົນເພື່ອນໍາເອົາຄວາມຮູ້-ບົດຮຽນທີ່ດີມານໍາໃຊ້ເຂົ້າໃນການຈັດຕັ້ງປະຕິບັດຕົວຈິງ.

   ພ້ອມນັ້ນຍັງໄດ້ຮັບການສະໜັບສະໜູນເຄື່ອງອຸປະກອນຮັບໃຊ້ການຜະລິດທີ່ຈໍາເປັນຈໍານວນໜຶ່ງເຊັ່ນ: ລົດດໍານາ, ເຄື່ອງຄັດເຂົ້າ, ເຄື່ອງອົບເຂົ້າ, ລົດປັ່ນເຂົ້າ, ໂຮງ ຮຽນຊາວນາໂດຍການສົມທົບທຶນຂອງກຸ່ມ 50% ແລະອີກສິ່ງໜຶ່ງທີ່ເຮັດໃຫ້ກຸ່ມຂອງພວກເຮົາມີຄວາມເຂັ້ມແຂງ ແລະ ຍືນຍົງມາໄດ້ຮອດປະຈຸບັນນີ້ກໍ່ຄືຄວາມສາມາຄີເປັນຈິດໜຶ່ງໃຈດຽວຂອງບັນດາສະມາຊິກທັງໝົດພາຍໃນກຸ່ມ, ໃນຊຸມປີຜ່ານມາສາມາດຂະຫຍາຍແນວພັນເຂົ້າລຸ້ນ 3 ໄດ້ໂດຍສະເລ່ຍປະມານ 142 ໂຕນຕໍ່ປີ, ສາມາດສ້າງລາຍຮັບໃຫ້ແກ່ຄອບຄົວຂອງສະມາຊິກກຸ່ມໄດ້ປະມານ 20 ລ້ານກີບ ຕໍ່ຄອບຄົວຕໍ່ປີ ແລະ ໄດ້ສ້າງເປັນກອງທຶນລວມຂອງກຸ່ມຕື່ມອີກ, ປະຈຸບັນມີເງິນກອງທຶນ 55 ລ້ານກີບ ສັງລວມແລ້ວການຂະຫຍາຍແນວພັນໃນ 1 ເຮັກຕາຈະໃຊ້ຕົ້ນທຶນປະມານ 9 ຫາ 10 ລ້ານກີບ ແລະມີກໍາໄລປະມານ 8 ຫາ 10 ລ້ານກີບ.

แชร์