3 ໂຄງການຖືກຄົ້ນຄວ້າກຽມສະເໜີອະນຸຍາດລົງທຶນ

  ຫ້ອງການບໍລິຫານການລົງທຶນປະຕູດຽວໄດ້ຄົ້ນຄວ້າປຶກສາຫາລື 3 ໂຄງການທີ່ສະເໜີຂໍລົງທຶນເພື່ອນຳສະເໜີຕໍ່ຄະນະກຳມະການສົ່ງເສີ່ມ ແລະຄຸ້ມຄອງການລົງທຶນຂັ້ນນະຄອນຫຼວງວຽງຈັນ (ຄລທ.ນວ) ພິຈາລະນາຕົກລົງອະນຸຍາດໃນຕໍ່ໜ້າ.

 ກອງປະຊຸມວິຊາການດັ່ງກ່າວໄດ້ຈັດຂຶ້ນໃນຕອນເຊົ້າຂອງວັນທີ 1 ທັນວາ ຜ່ານມາທີ່ພະແນກແຜນການ ແລະການລົງທຶນນະຄອນຫຼວງວຽງຈັນໂດຍເປັນປະທານຂອງທ່ານ ພູຂົງ ບັນນະວົງ ຮອງເຈົ້າຄອງນະຄອນຫຼວງວຽງຈັນ, ທັງເປັນຫົວໜ້າພະແນກແຜນການ ແລະການລົງທຶນນະຄອນຫຼວງວຽງຈັນ,  ພ້ອມຮອງປະທານຄະນະ ຄລທ, ຫົວໜ້າຫ້ອງການບໍລິການການລົງທຶນປະຕູດຽວ ແລະແຂກຈາກທີ່ມາຈາກພະແນກການທີ່ກ່ຽວຂ້ອງຕ່າງໆໄດ້ເຂົ້າຮ່ວມ.

 ກອງປະຊຸມວິຊາການເພື່ອຄົ້ນຄວ້າປຶກສາຫາລືບັນດາໂຄງການທີ່ກະກຽມນຳສະເໜີເຂົ້າລາຍງານຕໍ່ກອງປະຊຸມ ຄລທ.ນວ ພິຈາລະນາຈຳນວນ 3 ໂຄງ ການນີປະກອບມີ 1. ໂຄງການເປັນຫຸ້ນສ່ວນລົງທຶນໃນການພັດທະນາໂຄງການລະບົບຄຸ້ມຄອງທີ່ດິນ-ວັດແທກທີ່ດິນ ແລະການຂຶ້ນທະບຽນທີ່ດິນດ້ວຍຮູບແບບ (BOT ຫຼື PPP) ທີ່ຕິດພັນໃນ ນະຄອນຫຼວງວຽງຈັນ, ໂດຍບໍລິສັດກຸ່ມ ຄຳໄພຊະນະ ກໍ່ສ້າງຈຳກັດຜູ້ດຽວ; 2. ໂຄງການການນຳໃຊ້ລະບົບເຕັກໂນໂລຢີເຂົ້າໃນການຈັດເກັບຄ່າຂີ້ເຫຍື້ອຂອງບໍລິສັດອາໂລເຕັກໂນໂລຢີ ຈຳກັດ, ໂດຍບໍລິສັດ ອາໂລເຕັກໂນໂລຍີ; 3. ໂຄງການໆ ສະເໜີຂໍລົງທຶນພັດທະນາລະບົບບໍລິຫານຈັດການ ແລະ ຊຳລະການເກັບຄ່າຂີ້ເຫຍື້ອ (Waste Collect) ຢູ່ນະຄອນຫຼວງວຽງຈັນ, ໂດຍບໍລິສັດ ໄອພິຊີ ທີປືກສາການລົງທຶນ ແລະພັດທະນາຄົບວົງຈອນຈຳກັດ.

  ແນວໃດກໍດີຕາມຂໍ້ມູນການເປີດເຜີຍຈາກພະແນກແຜນການ ແລະການລົງທຶນນະຄອນຫຼວງວຽງຈັນ ລະບຸວ່າ: ທັງ 3 ໂຄງການທີ່ຂໍສະເໜີລົງທຶນໃນຄັ້ງນີ້ແມ່ນເປັນໂຄງການທີ່ຫັນເປັນທັນສະໄໝໃຊ້ລະບົບບໍລິການແບບອອນລາຍ (ຊຳລະຄ່າບໍລິການທາງອິນເຕີເນັດ) ຈະເຮັດໃຫ້ຜູ້ຄຸ້ມຄອງ ແລະຜູ້ນຳໃຊ້ເກີດຄວາມສະດວກສະບາຍຫຼາຍຂຶ້ນ.

แชร์