ກະຊວງ ຍທຂ ຢືນຢັນທາງດ່ວນວຽງຈັນ-ວັງວຽງ ກຽມມອບ-ຮັບພ້ອມເປີດໃຊ້ທ້າຍເດືອນນີ້ ລົດທົ່ວໄປເກັບ 557 ກີບຕໍ່ກິໂລ

 ກະຊວງໂຍທາທິການ ແລະຂົນສົ່ງເປີດເຜີຍວ່າ: ເວລານີ້ໂຄງງການກໍ່ສ້າງເສັ້ນທາງດ່ວນນະຄອນຫຼວງວຽງຈັນ-ວັງວຽງກຳລັງຂຸ້ນຂ້ຽວຫ້າງຫະກະກຽມຄວາມພ້ອມໃຫ້ແກ່ພິທີການມອບ-ຮັບ ແລະເປີດນຳໃຊ້ເສັ້ນທາງດັ່ງກ່າວຢ່າງເປັນທາງການໃນທ້າຍເດືອນທັນວານີ້ໂດຍໜ້າວຽກການກໍ່ສ້າງທັງໝົດໃນຂະນະນີ້ແມ່ນສຳເລັດແລ້ວ  99% ຂະນະທີ່ໃນວັນທີ 8 ທັນວາ ຜ່ານມາທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະ ຂົນສົ່ງ, ທ່ານ ສຸພັນ ແກ້ວມີໄຊ ອາດີດລັດຖະມົນຕີກະຊວງແຜນການ ແລະການລົງທຶນພ້ອມດ້ວຍຄະນະກໍໄດ້ລົງຊຸກຍູ້ຕິດຕາມກວດກາໃຫ້ແກ່ການກະກຽມຄວາມພ້ອມດັ່ງກ່າວ.

  ໃນໂອກາດນີ້ລັດຖະມົນຕີກະຊວງໂຍທາທິການ ແລະຂົນສົ່ງພ້ອມຄະນະໄດ້ລົງຕິດຕາມກວດກາເສັ້ນທາງ,ຫ້ອງຄວບຄຸ້ມບັນຊາ,ຂົວ ແລະສະຖານີເກັບເງິນຕາມຈຸດຕ່າງໆເຊັ່ນ: ສະຖານີເກັບເງິນ 8 ແຫ່ງ (ເປັນຕົ້ນ: ສະຖານີເກັບເງິນນະຄອນຫຼວງວຽງຈັນ, ນາຊອນ, ບ້ານບົວ, ສະກ້າ, ໂພນໂຮງ, ຫີນເຫີບ, ນໍ້າງື່ມ ແລະສະຖານີເກັບເງິນວັງວຽງ) ຊຶ່ງມາຮອດປະຈຸບັນເສັ້ນທາງໆດ່ວນນະຄອນຫຼວງວຽງຈັນ-ວັງວຽງ ໄດ້ສຳເລັດ 99% ເຫຼືອພຽງການອະນາໄມໃສ່ປ້າຍ ແລະປັບປຸງບາງຈຸດຕື່ມກໍຈະສຳ ເລັດ 100% ຄາດວ່າຈະສາມາດຈັດພິທີມອບ-ຮັບໂຄງການໃນທ້າຍເດືອນທັນວາ 2020 ນີ້ ແລະໃນການລົງກວດກາຄັ້ງນີ້ທາງຄະນະທີ່ໄດ້ລົງມາກວດກາກໍໄດ້ຊີ້ນຳໃຫ້ຜູ້ຮັບເໝົາໂຄງການເອົາໃຈໃສ່ສືບຕໍ່ວຽກທີ່ຍັງເຫຼືອໃຫ້ສຳເລັດທັນຕາມເວລາທີ່ກຳນົດເພື່ອເປັນການກະກຽມໃຫ້ກັບການຈັດພິທີມອບ-ຮັບໂຄງການດັ່ງກ່າວ.

 ໂຄງການກໍ່ສ້າງທາງດ່ວນດັ່ງກ່າວໄດ້ເຊັນສັນຍາສຳປະທານໃນຕົ້ນເດືອນເມສາ 2018 ຫຼັງຈາກນັ້ນແມ່ນໄດ້ເລີ່ມກໍ່ສ້າງ ແລະມາຮອດປະຈຸບັນໄດ້ກໍ່ສ້າງສຳເລັດ 99% ຊຶ່ງໂຄງການໄດ້ກໍ່ສ້າງສຳເລັດກ່ອນສັນຍາ 5 ເດືອນ ໃນນັ້ນໄດ້ສຳເລັດການກໍ່ສ້າງທໍ່ລອດທາງ 100%, ການກໍ່ສ້າງຂົວໄດ້ 100%,ການກໍ່ສ້າງອຸໂມງ 100%, ຊຶ່ງຄວາມຍາວອຸໂມງເບື້ອງຂວາ 845 ແມັດ ແລະເບື້ອງຊ້າຍ  875 ແມັດ, ການກໍ່ສ້າງຊັ້ນພື້ນທາງສຳເລັດ 100%, ການກໍ່ສ້າງທາງປູຢາງຂົວຊັ້ນ 1 ສຳເລັດ100% ແລະຂົວຊັ້ນທີ 2 ສຳເລັດ 100%, ການແຕ້ມເສັ້ນແບ່ງຊ່ອງຈະລາຈອນສຳເລັດ 98%, ການຕິດຕັ້ງລະບົບເກັບເງິນສຳເລັດ95%, ການຕິດຕັ້ງລະບົບຄວບຄຸມກວດກາສຳເລັດ 95% ການຕິດຕັ້ງປ້າຍສັນຍານຈະລາຈອນສຳເລັດ 98%,ການສ້ອມແປງບາງຈຸດທີ່ເປ່ເພສຳເລັດ 98%ແລະການກໍ່ສ້າງລະບົບຕ້ານຕາຝັ່ງເຈື່ອນສຳເລັດ 98% ແລະຄາດວ່າຈະໃຫ້ສຳເລັດໃນໄວໆນີ້ເພື່ອໃຫ້ທັນກັບພິທີມອບ-ຮັບແລະເປີດນຳໃຊ້ໃນທ້າຍເດືອນທັນວານີ້.

  ສຳລັບເສັ້ນທາງດ່ວນນະຄອນຫຼວງວຽງຈັນ-ວັງວຽງ ມີຄວາມຍາວທັງໝົດ 109,1 ກິໂລແມັດ, ຕັດຜ່ານ 4 ເມືອງ ຄື: ເມືອງນາຊາຍທອງ, ໂພນໂຮງ, ຫິນເຫີບ ແລະເມືອງວັງວຽງຄວາມກວ້າງຂອງທາງ 23 ແມັດ ອອກແບບໂດຍມາດຕະຖານເຕັກນິກທາງດ່ວນ ສປ ຈີນ  ແລະມາດຕະຖານເຕັກນິກຂອງອາຊຽນເປັນພື້ນຖານມີອຸໂມງ 1 ແຫ່ງ, ຂົວ 45 ແຫ່ງ ຍາວທັງໝົດ 2.408 ແມັດ; ຄວາມໄວອອກແບບ 100 ກິໂລແມັດ ຕໍ່ຊົ່ວໂມງຕອນທາງດັ່ງກ່າວປະກອບມີຈຸດເຊື່ອມຕໍ່ທັງໝົດ 7 ແຫ່ງ ແລະສະຖານີເກັບເງິນ 8 ແຫ່ງ (ນະຄອນຫຼວງວຽງຈັນ, ບ້ານນາຊອນ, ບ້ານບົວ, ບ້ານສະກ້າໂພນໂຮງ, ຫີນເຫີບ, ນໍ້າງື່ມ ແລະ ວັງວຽງ) ຈຸດພັກລົດມີ 2 ຈຸດ, ສູນຄວບຄຸມ 2 ບ່ອນ ແລະສູນສ້ອມແປງ 2 ບ່ອນ ລົງທຶນທັງໝົດ 1.293 ລ້ານໂດລາ ໃນການເກັບຄ່າຜ່ານທາງນັ້ນສຳລັບລົດທົ່ວໄປແມ່ນເກັບໃນລາຄາ  0,06 ໂດລາຕໍ່ກິໂລແມັດ ຫຼືປະມານ  557,16 ກີບຕໍ່ກິໂລ ແມ່ນຕາມອັດຕາສ່ວນແລກປ່ຽນ 9.286 ກີບຕໍ່ໂດລາ ໃນປະຈຳວັນທີ 9 ທັນວາ 2020 ສ່ວນປະເພດລົດບັນ ທຸກແມ່ນຈະມີເຄື່ອງຕິດຊັງນໍ້າໜັກເກັບຕາມການຄິດໄລ່ຂອງນໍ້າໜັກ, ສ່ວນປະເພດພາຫະນະທີ່ບໍ່ສາມາດຂຶ້ນໄປນຳໃຊ້ໃນເສັ້ນທາງດັ່ງກ່າວໄດ້ນັ້ນແມ່ນພາຫະນະທີມີແຮງຈັກຕໍ່າກ່ວາ 350 ຊີຊີ.

แชร์