ກາຍ 90% ແລ້ວຈຳປາສັກສຳຫຼວດສະຖິຕິກະສິກຳ

  ການສໍາຫຼວດສະຖິຕິກະສິກໍາທົ່ວປະເທດຄັ້ງທີ III ຢູ່ແຂວງຈໍາປາສັກແມ່ນໄດ້ເລີ່ມມາແຕ່ວັນທີ 15 ພະຈິກ ຫາວັນທີ 1 ທັນວາ2020 ໂດຍທີມສຳຫຼວດໄດ້ສໍາພາດສໍາເລັດ 178 ບ້ານ ຕົວແທນ ເທົ່າກັບ 2.582 ຄົວເຮືອນ ກວມເອົາ 93% ຂອງຈໍານວນບ້ານທັງໝົດ, ຍັງບໍ່ທັນສໍາເລັດ 14 ບ້ານ ເທົ່າກັບ 7%.

  ວັນທີ 4 ທັນວາຜ່ານມາ ກອງປະຊຸມຄະນະຊີ້ນໍາລະດັບຊາດ, ຄະນະຊີ້ນໍາຂັ້ນແຂວງ ແລະເມືອງກ່ຽວກັບການລາຍງານຄວາມຄືບໜ້າການສໍາຫຼວດສະຖິຕິກະສິກໍາທົ່ວປະເທດຂັ້ນແຂວງຄັ້ງທີ III, ຈັດຂຶ້ນທີ່ຫ້ອງວ່າການແຂວງຈຳປາສັກໃນວັນທີ 4 ທັນວາ 2020 ໂດຍໃຫ້ກຽດເປັນປະທານຂອງທ່ານ ສົມດີ ດວງດີ ຮອງນາຍົກລັດຖະ ມົນຕີ, ລັດຖະມົນຕີກະຊວງການເງິນ, ຫົວໜ້າຄະນະຊີ້ນໍາການສໍາຫຼວດສະຖິຕິກະສິກໍາລະດັບຊາດ, ມີ ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ, ມີຄະນະຊີ້ນໍາຂັ້ນແຂວງ, ພະແນກແຜນການແລະການລົງທຶນແຂວງ, ເມືອງ, ນະຄອນປາກເຊ, ພະແນກການ, ຂະແໜງການກ່ຽວຂ້ອງເຂົ້າຮ່ວມ.

 ໃນກອງປະຊຸມທ່ານ ຄໍາມ່ານ ຄູນວັນນະສີ ຫົວໜ້າສູນສະຖິຕິແຂວງຈໍາປາສັກ, ຫົວໜ້າຫ້ອງການສໍາຫຼວດສະຖິຕິກະສິກໍາແຂວງລາຍງານວ່າ: ສະພາບການສໍາຫຼວດສະຖິຕິກະສິກໍາທົ່ວປະເທດຄັ້ງທີ III ຢູ່ແຂວງຈໍາປາສັກເບື້ອງຕົ້ນໄດ້ມີການຝຶກອົບຮົມນັກເດີນສໍາຫຼວດແລະນັກກວດກາໃນວັນທີ 26 ຕຸລາ 2020 ຫາວັນທີ 6 ພະ ຈິກ 2020, ໃຊ້ເວລາຝຶກອົບຮົມ 12 ວັນມີຜູ້ເຂົ້າຮ່ວມທັງໝົດ 58 ທ່ານ,ໄດ້ລົງທົດລອງພາກສະໜາມ 2 ວັນ ຢູ່ບ້ານນາຫວ້າ ແລະບ້ານໂນນຊາດ ເມືອງໂພນ ທອງກ່ຽວກັບພາກໂຄສະນາເຜີຍແຜ່: ໄດ້ຈັດກອງປະຊຸມປຶກສາຫາລືກັບພະແນກໂຍທາທິການ ແລະຂົນສົ່ງ,ວິທະຍຸ,ໜັງສືພິມ ແລະໂທລະພາບເພື່ອອອກຂ່າວໂຄສະນາເຜີຍ ແຜ່ຕໍ່ກັບວຽກງານການສໍາຫຼວດ, ມີການຕິດຕັ້ງປ້າຍໂຄສະນາຂ້າມທາງຂັ້ນແຂວງ 2 ຈຸດ ຫຼັກ 8 ເໜືອ, ຫຼັກ 8 ໃຕ້, ຂັ້ນເມືອງ 18 ຈຸດ ຕາມຕະຫຼາດ ຫຼືສະຖານທີ່ຊຸມຊົນໜາແໜ້ນ.

  ພ້ອມດຽວກັນນັ້ນກໍຍົກໃຫ້ເຫັນການຈັດຕັ້ງປະຕິບັດການສໍາຫຼວດຕົວຈິງຢູ່ພາກສະໜາມ: ມີແຜນການເດີນສໍາຫຼວດຈໍານວນ 192 ບ້ານທີ່ເປັນຕົວແທນ, ເລີ່ມຈັດ ຕັ້ງປະຕິບັດແຕ່ວັນທີ 15 ພະຈິກ ຫາວັນທີ 15 ທັນວາ 2020, ນັກກວດກາ ແລະນັກເດີນສໍາຫຼວດລົງພາກສະໜາມໃນວັນທີ 14 ພະຈິກ 2020 ໃນ 1 ນະຄອນ 9 ເມືອງ ເພື່ອປະສານ ສົມທົບກັບອຳນາດການປົກຄອງ, ນັກເດີນສໍາຫຼວດປະກອບມີ 23 ທີມ , ບ້ານໜຶ່ງນັດຄົວເຮືອນຕົວແທນ 20 ຄົວເຮືອນ ໃນນັ້ນ: ຄົວເຮືອນສໍາຮອງ 4 ຄົວເຮືອນ, ສໍາພາດຕົວຈິງ 16 ຄົວເຮືອນ, ການເດີນສໍາຫຼວດພຽງແຕ່ 3 ວັນຕໍ່ບ້ານ,ສະເລ່ຍນັກເດີນສໍາຫຼວດ 1 ທີມຮັບຜິດຊອບ 8-9 ບ້ານຕົວແທນ, ໂດຍຖືເອົາຄົວເຮືອນຕົວແທນທີ່ໄດ້ຂຶ້ນບັນຊີໄວ້ແລ້ວໃນປີ 2019 ແລະມີນັກກວດກາທັງໝົດ 10 ທ່ານ, ນັກກວດກາຜູ້ໜຶ່ງຮັບຜິດຊອບສະເລ່ຍ 2 ຫາ 3 ທີມ (ທີມໜຶ່ງມີ 2 ຄົນ).

   ແຕ່ວັນທີ 15 ພະຈິກຫາວັນທີ 1 ທັນວາ 2020 ໄດ້ສໍາພາດສໍາເລັດ 178 ບ້ານຕົວແທນ ເທົ່າກັບ 2.582 ຄົວເຮືອນ ກວມເອົາ 93% ຂອງຈໍານວນບ້ານທັງ ໝົດ, ຍັງບໍ່ທັນສໍາເລັດ 14 ບ້ານເທົ່າກັບ 7%ເມືອງທີ່ສໍາເລັດແລ້ວມີ 5 ເມືອງ, 1 ນະຄອນຄື: ນະຄອນປາກເຊ, ເມືອງຊະນະສົມບູນ,ປາກຊ່ອງ,ປະທຸມພອນ, ໂພນທອງ ແລະເມືອງຈໍາປາສັກ, ຍັງບໍ່ທັນສໍາເລັດ 4 ເມືອງຄື: ເມືອງສຸຂຸມາ, ໂຂງ,ມຸນລະປາໂມກ ແລະເມືອງບາຈຽງຈະເລີນສຸກໂດຍການສຳຫຼວດຄັ້ງນີ້ໃຊ້ງົບປະມານຈາກສູນສະຖິຕິແຫ່ງຊາດ, ກະຊວງແຜນການ ແລະການລົງທຶນຈໍານວນ 567,2 ລ້ານກີບ, ງົບປະມານຈາກແຂວງປະກອບສ່ວນຈໍານວນ 150 ລ້ານກີບ, ລວມທັງໝົດ 726,2 ລ້ານກີບ.

แชร์