ສະຫວັນນະເຂດ ຮັບນາມມະຍົດເປັນ ແຂວງ 4 ບຸກ

  ເມື່ອວັນທີ 4 ທັນວາ 2020 ທີ່ຫໍວັດທະນະທໍາ ໄກສອນ ພົມວິຫານ, ຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ ແຂວງສະຫວັນນະເຂດຈັດພິທີສະຫຼຸບການຈັດຕັ້ງປະຕິບັດການແຂ່ງຂັນ 4 ບຸກ ແລະປະກາດເປັນແຂວງ 4 ບຸກ ໂດຍການເຂົ້າຮ່ວມເປັນປະທານຂອງສະຫາຍ ກົງແກ້ວ ມີວໍລະຈັກ ຮອງເລຂາພັກແຂວງສະ ຫວັນນະເຂດ, ສະຫາຍນາງ ວິລະວອນ ພັນທະວົງ ຮອງເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ, ສະຫາຍ ພູລໍາພອນ ສີຫາວົງ ເລຂາຄະ ນະບໍລິຫານງານຊາວໜຸ່ມແຂວງພ້ອມມີຄະນະຮັບຜິດຊອບຊີ້ນໍາວຽກຂະບວນການແຂ່ງຂັນ 4 ບຸກຂັ້ນສູນກາງ,ການນໍາຂອງແຂວງ-ເມືອງ-ນະຄອນ,ຜູ້ຊີ້ນໍາອົງການຈັດ ຕັ້ງມະຫາຊົນຂັ້ນເມືອງ-ນະຄອນ, ຄະນະພັກອົງການຈັດຕັ້ງມະຫາຊົນຂັ້ນແຂວງ, ພະແນກການອ້ອມຂ້າງ ແລະບັນດາສະຫາຍເລຂາ, ຮອງເລຂາຄະນະບໍລິຫານງານຊາວໜຸ່ມແຂວງ, ເມືອງ-ນະຄອນ, ຮາກຖານຊາວໜຸ່ມພະແນກການເຂົ້າຮ່ວມ.

   ໂອກາດນີ້, ສະຫາຍ ພຸລໍາພອນ ສີຫາວົງ ກໍ່ໄດ້ຜ່ານບົດລາຍງານການຈັດຕັ້ງປະຕິບັດຂໍ້ແຂ່ງຂັນ 4 ບຸກຂອງຄະນະຊາວໜຸ່ມແຂວງສະຫວັນນະເຂດປະຈໍາປີ 2019 ແລະ 2020 ວ່າ: ໃນໄລຍະຜ່ານມາການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ 10 ຂອງພັກ, ຄັ້ງທີ 7 ຜູ້ແທນຊາວໜຸ່ມທົ່ວປະເທດກໍຄືມະຕິກອງປະຊຸມໃຫຍ່ຄັ້ງທີ 6 ຜູ້ແທນຊາວໜຸ່ມທົ່ວແຂວງສະຫວັນນະເຂດ, ຄະນະບໍລິຫານງານຊາວໜຸ່ມທຸກຂັ້ນສະມາຊິກຊາວໜຸ່ມ-ເຍົາວະຊົນທຸກຂົງເຂດໄດ້ເອົາໃຈໃສ່ປະຕິບັດແນວທາງນະໂຍບາຍປ່ຽນແປງໃໝ່ຂອງພັກ, ລະບຽບກົດໝາຍຂອງລັດຢ່າງເປັນເຈົ້າການ, ຕັ້ງໜ້າປະກອບສ່ວນເຂົ້າໃນຂະບວນການລວມຂອງຊາດ, ເອົາໃຈໃສ່ປະຕິບັດວຽກ ງານຊາວໜຸ່ມເຍົາວະຊົນໂດຍສະເພາະຂະບວນການ 4 ບຸກຂອງຄະນະຊາວໜຸ່ມປະຊາຊົນປະຕິວັດລາວ ແລະ 3 ດີ 4 ຮູ້ຂອງເຍົາວະຊົນ ທັນວາ ຢ່າງເປັນຂະບວນການໃນນີ້ ຄະນະບໍລິຫານງານຊາວໜຸ່ມ ແຂວງສະຫວັນນະເຂດມີທັງໝົດ 41 ສະຫາຍ, ຍິງ 10 ສະຫາຍ, ທົ່ວແຂວງມີເກນອາຍຸຊາວໜຸ່ມ 15 ຫາ 35 ປີ ມີທັງໝົດ 255.967 ຄົນ, ຍິງ 116.524 ຄົນ ເປັນສະມາຊິກຊາວໜຸ່ມຈໍານວນ 64.661 ສະຫາຍ, ເກນອາຍຸເຍົາວະຊົນແຕ່ 9 ຫາ 14 ປີ ມີ 85.138 ນ້ອງ, ຍິງ 42.389 ນ້ອງ, ເປັນສະມາຊິກເຍົາວະຊົນທັນວາ 47.237 ນ້ອງ, ເກນອາຍຸອະນຸຊົນ 6 ຫາ 8 ປີ ມີ 49.510 ນ້ອງ ຍິງ 24.921 ນ້ອງເປັນສະມາຊິກອະນຸຊົນ 12.991 ນ້ອງ.

  ສິ່ງພົ້ນເດັ່ນ, ຄະນະຊາວໜຸ່ມເມືອງ ແລະຄະນະຊາວໜຸ່ມພະແນກການອ້ອມຂ້າງແຂວງປະກອບສ່ວນສ້າງຫໍພັກໃຫ້ອ້າຍນ້ອງທະຫານຄໍ 35 ປືນໃຫຍ່ໜ້າດິນລວມມູນຄ່າຂອງການກໍ່ສ້າງທັງໝົດ 157 ລ້ານ 5 ແສນກວ່າກີບ, ໃນປີຜ່ານມາຄະນະຊາວໜຸ່ມແຂວງໄດ້ຮັບນາມມະຍົດເປັນຄະນະຊາວໜຸ່ມປະຊາຊົນປະຕິວັດລາວແຂວງ 4 ບຸກ ຄັ້ງທີ 1 ໃນປີ 2017 ຂັ້ນເມືອງ ມີ 14 ເມືອງ 1 ນະຄອນ ເທົ່າກັບ 100%, ມາໃນປີ 2019 ຂັ້ນຮາກຖານທີ່ຂຶ້ນກັບຄະນະຊາວໜຸ່ມແຂວງມີ 37 ຮາກ ຖານ ປະກາດໄດ້ 17 ຮາກຖານເທົ່າກັບ 45,94% ແລະ ຂັ້ນໜ່ວຍມີ 22 ໜ່ວຍ ປະກາດໄດ້ 19 ໜ່ວຍ ເທົ່າກັບ 86,36% ແລະວຽກ ງານເຍົາວະຊົນທັນວາ 3 ດີ 4 ຮູ້ ຂັ້ນເມືອງສາມາດປະກາດຮັບຮອງໄດ້ 14 ເມືອງ ແລະ 1 ນະຄອນ ເທົ່າກັບ 100% ຂອງຈໍານວນທັງໝົດປີ 2019 ຫາ 2020.

 ຈາກນັ້ນ, ໃນພິທີກໍ່ຍັງມອບ-ຮັບໃບຢັ້ງຢືນ 4 ບຸກ ຂອງຄະນະຊາວໜຸ່ມປະຊາຊົນ ປະຕິວັດລາວແຂວງສະຫວັນນະເຂດໃນຈໍານວນ 3 ປີ ແລະຮັບທຸງໄຊນໍາໜ້າຂະບວນ ການແຂ່ງຂັນ 4 ບຸກ ພ້ອມທັງເປີດປ້າຍ ແລະລັ່ນຄ້ອງ 9 ບາດ ເພື່ອຄວາມເປັນສິລິມຸງຄຸນໃຫ້ແກ່ນາມຍະຍົດແຂວງສະຫວັນນະເຂດເປັນແຂວງ 4 ບຸກ.

----------

ຂ່າວ: ສະຫວັນ

ຮູບພາບ: ໜັງສືພິມເສດຖະກິດ-ສັງຄົມ

แชร์