ບ້ານປ່າໜໍ່ ຮັບເຄື່ອງຊ່ວຍເຫຼືອຈາກທີມງານຈິດອາສາ ນວ

  ນັບ 10 ກວ່າປີ ທີ່ທາງທີມງານຈິດອາສາຈາກນະຄອນຫຼວງວຽງຈັນ ຮ່ວມກັບທີມງານ ບໍລິສັດ ສົມຄິດ ຕານສະຫວັດ ຈໍາກັດ ໄດ້ຮ່ວມກັນລະດົມທຶນຊື້ອຸປະກອບການຮຽນ, ເຄື່ອງນຸ່ງຫົ່ມ, ຜ້າຮົ່ມໂຕໂຕ້ ເພື່ອນໍາໄປຊ່ວຍເຫຼືອປະຊາຊົນເຂດບ້ານທີ່ທຸກຍາກຂາດເຂີນທຸລະກັນດານຢູ່ບັນດາແຂວງຕ່າງໆຂອງລາວສໍາລັບຊຸດນີ້ແມ່ນໄດ້ນໍາຜ້າ ຫົ່ມ, ຊຸດນັກ ຮຽນ ແລະອຸປະກອນກີລາໃຫ້ບ້ານປ່າໜໍ່ ນະຄອນຫຼວງພະບາງ ແຂວງຫຼວງພະບາງ ລວມມູນຄ່າ 9 ລ້ານກວ່າກີບ.

 ທ່ານ ສົມຄິດ ຕານສະຫວັດ ປະທານ ບໍລິສັດ ສົມຄິດ ຕານສະຫວັດ ຈໍາກັດ ໄດ້ໃຫ້ສໍາພາດຕໍ່ທີມຂ່າວຂອງພວກເຮົາໃນວັນທີ 7 ທັນວາ 2020 ມື້ມອບເຄື່ອງວ່າ: ກິດຈະກໍາໃນການມອບເຄື່ອງຊ່ວຍເຫຼືອໃຫ້ບັນດາບ້ານທຸກຍາກເຂດຊົນນະບົດທຸລະກັນດານແມ່ນເປັນຄວາມທ້າທາຍມັກຮັກກັບການພະຈົນໄພນໍາເອົາເຄື່ອງທີ່ປະຊາຊົນຕ້ອງການນໍາໃຊ້ເຂົ້າໃນຊີວິດປະຈໍາວັນ ແລະເປັນມູມໜຶ່ງທີ່ທີມງານຢາກຈະໄປເຫັນຄວາມເປັນຢູ່ຂອງປະຊາຊົນເຂດດັ່ງກ່າວໂດຍໄດ້ຮັບການລາຍງານຂໍ້ມູນຄວາມຈິງຂອງນາຍບ້ານເຂດດັ່ງກ່າວທີ່ໄດ້ຂໍຄວາມຊ່ວຍເຫຼືອໄປຫາທາງທິມງານ.

  ທ່ານກ່າວຕື່ມວ່າຜ່ານມາຫຼາຍປີການປະກອບສ່ວນຊ່ວຍເຫຼືອສັງຄົມແຕ່ເໜືອຮອດພາກໃຕ້ຂອງລາວທີມງານຂອງຈິດອາສາກັບທິມງານບໍລິສັດ ສົມຄິດ ຕານສະຫວັດ ຈໍາກັດ ກໍໄດ້ເປັນສ່ວນໜຶ່ງທີ່ໄດ້ເຂົ້າເຖິງປະຊາຊົນເພື່ອນໍາເອົາສິ່ງຂອງວັດຖຸຕ່າງໆທີ່ມີຄວາມຈໍາເປັນຕໍ່ການດໍາລົງຊີວິດຂອງເຂົາເຈົ້າໄປມອບໃຫ້ເຖິງທີ່ເຖິງເສັ້ນທາງບໍ່ອໍາ ນວຍຄວາມສະດວກແຕ່ທີມງານກໍຕ້ອງໄປໃຫ້ເຖິງຈຸດໝາຍດັ່ງກ່າວ.ຈາກນໍ້າໃຈທີມງານຈິດອາສາ ແລະທີມງານຂອງບໍລິສັດ ສົມຄິດ ຕານສະຫວັດ ທີ່ຍາມໃດກໍຄິດຮອດປະຊາຊົນຜູ້ດໍາລົງຊີວິດຢູ່ເຂດທຸລະກັນດານຫ່າງໄກຊອກຫຼີກຄວາມຈະເລີນກາຍເປັນແຮງບັນດານໃຈທີ່ຢາກຊ່ວຍເຫຼືອດ້ວຍໃຈຈິງ.

  ສໍາລັບຊຸດນີ້ທາງທີມງານໄດ້ນໍາເອົາເຄື່ອງນຸ່ງຊຸດນ້ອງນັກຮຽນ ແລະອຸປະກອນກີລາມອບໃຫ້ໂຮງຮຽນປະຖົມ ແລະຜ້າຫົ່ມໂຕໂຕ້ຈໍານວນ 78 ຄອບຄົວ ໃຫ້ບ້ານປ່າໜໍ່ ລວມມູນຄ່າທັງໝົດ 9 ລ້ານກວ່າກີບ ໃນການມາຄັ້ງນີ້ທາງທີມງານຍັງໄດ້ມອບເຄື່ອງໃຫ້ບ້ານທຸກຍາກຂອງແຂວງໄຊຍະບູລີຕື່ມອີກລວມມູນຄ່າທັງສອງແຂວງແມ່ນ 35 ລ້ານກວ່າກີບ.

  ພ້ອມນີ້ທາງຄະນະນໍາຂອງບ້ານປ່າໜໍ່ຍັງໄດ້ມອບໃບກຽດຕິຄຸນໃຫ້ກັບທີມງານຈິດອາສາ ແລະສະແດງຄວາມຂອບໃຈເປັນຢ່າງສູງຕໍ່ການຊ່ວຍເຫຼືອຄັ້ງນີ້ ແລະໄດ້ຕ້ອນຮັບທີມງານດ້ວຍຄວາມອົບອຸ່ນ.

  ສະນັ້ນບັນດາບ້ານໃດທີ່ຕ້ອງການຄວາມຊ່ວຍເຫຼືອ (ບ້ານທຸກຍາກ) ເຂດທຸລະກັນດານແມ່ນຂໍພຽງນາຍບ້ານຂອງບ້ານດັ່ງກ່າວໃຫ້ຂໍ້ມູນລະອຽດຂອງບ້ານກັບທີມງານຈິດອາສາກັບທີມງານ ບໍລິສັດ ສົມຄິດ ຕານສະຫວັດ ຈໍາກັດ ຈາກນະຄອນຫຼວງວຽງຈັນເຖິງຄວາມຂາດເຂີນຂອງລູກບ້ານ (ປະຊາຊົນ) ທາງທີມງານຈະນໍາເຄື່ອງໄປຊ່ວຍເຫຼືອເຖິງທີ່ເລີຍ.

------------------

ຂ່າວ: ສີສຸວັນ, ຮູບພາບ: ໜັງສືພິມເສດຖະກິດ-ສັງຄົມ

แชร์