ເຟຊບຸກຮ່ວມມືກັບນັກສ້າງວິດີໂອ ສ້າງໂຄງການ #ລາວຊ່ວຍລາວ

 ໃນວັນທີ 9 ທັນວາ 2020 ທີ່ນະຄອນຫຼວງວຽງຈັນ ເຟຊບຸກ (Facebook) ໄດ້ເປີດໂຕແຄມເປນ ໂຄງການ #ລາວຊ່ວຍລາວ ຊຶ່ງເນັ້ນໜັກການເຮັດວິດີໂອຢູ່ ສປປ ລາວ ໂດຍມີການເຮັດວຽກຮ່ວມກັບ 3 ນັກສ້າງວິດີໂອອັນດັບຕົ້ນໆ ຂອງປະເທດລາວເພື່ອສ້າງເນື້ອຫາກ່ຽວກັບປະສົບການການທ່ອງທ່ຽວພາຍໃນປະເທດທີ່ຈະຊ່ວຍສົ່ງ ເສີມການຟື້ນຟູເສດຖະກິດໃນໄລຍະທ້າຍປີນີ້. 

  ທ່ານ ແພັກເດ ເຮັງ ຫົວໜ້ານະໂຍບາຍສາທາລະນະກຳປູເຈຍ ແລະ ສປປ ລາວ ໄດ້ກ່າວເປີດແຄມເປນໂຄງການ #ລາວຊ່ວຍລາວ ຊຸກຍູ້ໃຫ້ຄົນລາວຄົ້ນຫາປະເທດລາວຕື່ມ ແລະຊ່ວຍສະໜັບສະໜູນເສດຖະກິດທ້ອງຖິ່ນຜ່ານທາງອອນລາຍວ່າ: ເຟຊບຸກ ມີຄວາມມຸ້ງໝັ້ນທີ່ຈະໃຫ້ການສະໜັບສະໜູນທຸລະກິດ ແລະຊຸມຊົນທ້ອງຖິ່ນໃນລາວໃຫ້ໄດ້ຫຼາຍທີ່ສຸດເນື່ອງຈາກວ່າທຸລະກິດຫຼາຍແຫ່ງໂດຍສະເພາະແມ່ນຂະແໜງການທ່ອງທ່ຽວແມ່ນຖືກກະທົບໂດຍກົງ ແລະ ໜັກທີ່ສຸດຈາກການແຜ່ລະບາດຂອງພະຍາດໂຄວິດ-19, ສໍາລັບແຄມເປນອອນລາຍ #ລາວຊ່ວຍລາວ ຈະໄດ້ເຜີຍແຜ່ເນື້ອຫາວິດີໂອທີ່ຜະລິດ ແລະ ແຕ່ງໂດຍນັກສ້າງວິດີໂອການທ່ອງທ່ຽວຊັ້ນນຳໃນເຟຊບຸກຂອງລາວປະກອບມີ: ເພຈປີລະທ່ຽວ, ເພຈໝໍແຂ້ວພາທ່ຽວ ແລະເພຈທ້ອງແຕກ ຜ່ານ Facebook Watch-ແຫຼ່ງວິດີໂອໃນແພັດຟອມເຟຊບຸກ, ໂດຍແຕ່ລະເພຈຈະມີການນຳສະເໜີເນື້ອຫາທີ່ແຕກຕ່າງກັນໃນຮູບແບບຂອງຕົນຊຶ່ງມີການທ່ຽວຊົມສະຖານທີ່ທ່ອງທ່ຽວພາຍໃນທ້ອງຖິ່ນ, ສະຖານທີ່ເໝາະກັບການຖ່າຍຮູບລົງ Instagram ລວມທັງອາຫານ ແລະເຄື່ອງດື່ມຈົນເຖິງທຸລະກິດຂະໜາດນ້ອຍທີ່ທຸກຄົນສາມາດຄົ້ນຫາໃນເຟຊບຸກ.

 

 ຈຸດປະສົງແມ່ນເພື່ອກະຕຸ້ນຊຸມຊົນໃຫ້ສະໜັບສະໜູນທຸລະກິດທ້ອງຖິ່ນ ແລະເຊື່ອມຕໍ່ພວກເຂົາໂດຍຜ່ານເນື້ອຫາວິດີໂອທີ່ໜ້າສົນໃຈ, ການເບິ່ງວິດີໂອເປັນປະກົດການທີ່ທົ່ວໂລກເຮົາສັງເກດເຫັນວ່າເປັນທີ່ນິຍົມຫຼາຍໃນນັ້ນກໍມີປະເທດລາວຊຶ່ງປະຊາຊົນຫຼາຍກ່ວາ 1,25 ພັນລ້ານຄົນ ກໍາລັງເຂົ້າເບິ່ງ Facebook Watch ແລະ ຫຼາຍກວ່າ 720 ລ້ານຄົນທົ່ວໂລກໃຊ້ເວລາເປັນຢ່າງຕໍ່າໜຶ່ງນາທີຕໍ່ເດືອນໃນການເບິ່ງວິດີໂອໃນເຟຊບຸກ, ເພາະແນວນັ້ນພວກເຮົາຈຶ່ງມີຄວາມຕື່ນເຕັ້ນທີ່ຈະເຮັດວຽກກັບນັກສ້າງວີດີໂອໃນລາວ ແລະໄວໜຸ່ມຍຸກໃໝ່ຄືກັບປີລະທ່ຽວ, ໝໍແຂ້ວພາທ່ຽວ ແລະທ້ອງແຕກ” ທ່ານ ແພັກເດ ເຮັງ ໄດ້ກ່າວ.

  ແຄມເປນວິດີໂອ #ລາວຊ່ວຍລາວ ຂອງ ເຟຊບຸກ ໄດ້ມີສື່ມວນຊົນອອນລາຍອັນດັບຕົ້ນເຂົ້າຮ່ວມເຊັ່ນ InsideLaos ແລະໂທລະພາບແຫ່ງຊາດລາວຊຶ່ງຈະເປັນພາກ ສ່ວນທີ່ຈະນຳສະເໜີເນື້ອຫາວິດີໂອ,ສອນທັກສະທາງດ້ານດີຈີຕອນ ແລະໃຫ້ຕົວຢ່າງດີໆ ພ້ອມໃຫ້ທັງເຄັດລັບຕ່າງໆ ໃນການຊ່ວຍໃຫ້ SME ທ້ອງຖິ່ນໃນຂະແໜງການທ່ອງທ່ຽວ ແລະໂຮງແຮມສາມາດນຳໃຊ້ເຄື່ອງມືທາງທຸລະກິດໃນເຟຊບຸກໃຫ້ເປັນຜົນປະໂຫຍດຫຼາຍທີ່ສຸດ.

    ແນວໃດກໍດີທຸກຄົນສາມາດມ່ວນຊື່ນ ແລະຕິດຕາມແຄມເປນອອນລາຍ #LaoHelpLao ເລີ່ມຕັ້ງແຕ່ວັນທີ 9-26 ທັນວາ 2020 ຜ່ານເພຈ Pee La Thiao, Dentist Adventure, Thong Taek ໃນເຟຊບຸກແລະ http://www.facebook.com/hashtag/laohelplao, ຊາວລາວທຸກຄົນຍັງສາມາດເຂົ້າມາມີສ່ວນຮ່ວມໃນແຄມເປນດ້ວຍການໂພສຮູບພາບ ແລະ ວິດີໂອກ່ຽວກັບສະຖານທີ່, ຜະລິດຕະພັນ ຫຼືການບໍລິການໃນທ້ອງຖິ່ນທີ່ມັກລົງໃນ Facebook ຫຼື Instagram ພ້ອມດ້ວຍ hashtag #LaoHelpLao ແລະ # ລາວຊ່ວຍລາວ.

แชร์