ໂຮງໝໍຟູຢູ້ທ້າງມອບເງິນ ແລະອຸປະກອນການແພດໃຫ້ຫຼວງນໍ້າທາ

  ວັນທີ 6 ທັນວາ 2020 ໂຮງໝໍຟູຢູ້ທ້າງນໍາເອົາເງິນ ແລະອຸປະກອນການແພດມອບໃຫ້ແຂວງຫຼວງນໍ້າທາເພື່ອນໍາໃຊ້ເຂົ້າໃນວຽກງານຕ້ານ,ສະກັດກັ້ນ ແລະຄວບຄຸມການລະບາດພະຍາດໂຄວິດ-19 ລວມທັງໝົດ 370  ລ້ານກີບ, ໃນນັ້ນເງິນສົດຈໍານວນ 200 ລ້ານກີບ ແລະອຸປະກອນການແພດນໍາໃຊ້ເຂົ້າໃນວຽກງານປ້ອງກັນພະຍາດໂຄວິດ-19 ໃນໄລຍະຜ່ານມາມູນຄ່າ 170 ລ້ານກີບ ໂດຍການມອບຂອງ ທ່ານ ຄໍາພັນ ຜູ້ອໍານວຍການໂຮງໝໍຟູຢູ້ທ້າງ ແລະ ຮັບໂດຍ ທ່ານ ຄໍາໄຫຼ ສີປະເສີດ ເຈົ້າແຂວງໆຫຼວງນໍ້າທາ,ຊ້ອງໜ້າທ່ານ ຄໍາຟອງ ອິນມະນີ ຫົວໜ້າຄະນະປ້ອງກັນ, ຄວບຄຸມ ແລະແກ້ໄຂການລະບາດເຊື້ອພະຍາດໂຄວິດ-19 ຂັ້ນແຂວງພ້ອມດ້ວຍຄະນະເຂົ້າຮ່ວມເປັນສັກຂີພິຍານ.

  ທ່ານ ຄໍາໄຫຼ ສີປະເສີດ ເຈົ້າແຂວງໆຫຼວງນໍ້າທາໄດ້ສະແດງຄວາມຂອບໃຈມາຍັງໂຮງໝໍຟູຢູ້ທ້າງຊຶ່ງແມ່ນໂຮງໝໍເອກະຊົນຂອງຄົນຈີນມາຕັ້ງບໍລິການຢູ່ແຂວງຫຼວງນໍ້າທາ ແລະໄດ້ຮັບອະນຸຍາດຈາກລັດໃນການກັກກັນແຮງງານຕ່າງປະເທດທີ່ເຂົ້າມາ ແລະຜ່ານແຂວງຫຼວງນໍ້າທາໃຫ້ຖືກຕ້ອງຕາມຫຼັກວິຊາການຈົ່ງປະສົບຜົນສໍາເລັດໃນທຸ ລະກິດວຽກງານຂອງທ່ານ, ພ້ອມທີ່ຈະເອົາເງິນຊ່ວຍເຫຼືອດັ່ງກ່າວນໍາໄປໝູນໃຊ້ເຂົ້າໃນໜ້າທີ່ວຽກງານໃຫ້ຖືກຕ້ອງຕາມເປົ້າໝາຍເປັນຕົ້ນແມ່ນການຕ້ານ, ສະກັດກັ້ນ ແລະຄວບຄຸມການລະບາດພະຍາດໂຄວິດ-19 ຢູ່ແຂວງຫຼວງນໍ້າທາໃຫ້ດີຂຶ້ນກວ່າເກົ່າ. 

---------------

ຂ່າວ ສົມພອນ ຂຸນດາວົງ

ຮູບພາບ: #ຫນັງສືພິມເສດຖະກິດສັງຄົມ

 

แชร์