ສທຄ ເລັ່ງສ້າງນັກວິຊາຊີບການເງິນຈຸລະພາກຍຸກ 4.0

  ສະຖາບັນການທະນາຄານ (ສທຄ) ເປັນສະຖາບັນການສຶກສາຂັ້ນສູງຂອງຊາດທີ່ຂຶ້ນກັບທະນາຄານແຫ່ງ ສປປ ລາວ (ທຫລ) ຊຶ່ງມີວິໄສທັດພັດທະນາເປັນສະຖາບັນການສຶກສາທີ່ມີຄຸນນະພາບທາງດ້ານການເງິນ-ການທະນາຄານ ແລະ ສາມາດເຊື່ອມໂຍງກັບພາກພື້ນ ແລະ ສາກົນ; ມີພາລະກິດນຳໃຊ້ວິທະຍາສາດການສຶກສາ ແລະ
ເຕັກໂນໂລຊີທີ່ກ້າວໜ້າເພື່ອສ້າງ ແລະຍົກລະດັບບຸກຄະລາກອນດ້ານການເງິນ-ການທະນາຄານໃຫ້ມີຄຸນນະພາບ; ພ້ອມນີ້, ຍັງປະຕິບັດຍຸດທະສາດໃນການພັດທະນາຄູແລະຫຼັກສູດການຮຽນ-ການສອນໃຫ້ມີລັກສະນະຊາດ, ລັກສະນະວິທະຍາສາດ (ກ້າວໜ້າທັນສະໄໝ) ແລະລັກສະນະມະຫາຊົນ; ນອກນີ້, ຍັງຮ່ວມມືກັບສະຖາບັນການທະນາຄານຮ່າໂນຍ,ມະຫາວິທະຍາໄລການທະນາຄານນະຄອນໂຮ່ຈິມິນ,ມະຫາວິທະຍາໄລຫົວບິ່ງ, NIDA,ມະຫາວິທະຍາໄລຊຽງໃໝ່,ວິທະຍາໄລ Oxbridge, ໂຄງການລາວ 16 ຈາກປະເທດລຸກຊຳບວກ ແລະສະຖາບັນຕ່າງໆ.

  ທ່ານ ປອ. ສັນຕິ ພົນເມືອງລາວ ຫົວໜ້າ ສທຄ ໄດ້ກ່າວໃນເວທີສົນທະນາວຽກງານການເງິນຈຸລະພາກໃນທ້າຍເດືອນພະຈິກຜ່ານມາວ່າ: ສທຄ ຮັບການສ້າງຕັ້ງຂຶ້ນໃນປີ 1979 ຊຶ່ງດຳເນີນການຮຽນ-ການສອນສາຂາການທະນາຄານ, ການເງິນ, ການບັນຊີ, ການເງິນຈຸລະພາກ ແລະ ສາຂາການບັນຊີ ແລະ ກວດສອບໂດຍມີຄູ-ອາຈານທີ່ມີຄວາມຮູ້-ຄວາມສາມາດໃນລະດັບທີ່ແນ່ນອນ; ມີນັກສຶກສາລະດັບຊັ້ນສູງ ແລະປະລິນຍາຕີໃນແຕ່ລະປີປະມານ 3.700 ຄົນສາມາດອອກຮັບໃຊ້ສັງຄົມປະ ມານ 1.200 ຄົນ; ສຳລັບຜົນການເຄື່ອນໄຫວ ແລະແຜນພັດທະນາຊັບພະຍາກອນມະນຸດສາຂາການເງິນຈຸລະພາກໂດຍເລີ່ມແຕ່ປີ 2011 ທຫລ ກໍ່ຄືກົມຄຸ້ມຄອງສະຖາບັນການເງິນ ແລະ ສທຄ ໄດ້ຄົ້ນຄວ້າສ້າງຫຼັກສູດສາຂາການເງິນຈຸລະພາກຊຶ່ງໄດ້ຮັບການຊ່ວຍເຫຼືອລ້າຈາກໂຄງການ MAFIPP (ການສ້າງຄູ-ສ້າງຫຼັກສູດ, ສະ ໜອງປຶ້ມແບບຮຽນ, ຝຶກອົບຮົມ-ສຳມະນາ) ໂດຍມີນັກສຶກສາທີ່ຮຽນຈົບໃນຂະແໜງການເງິນຈຸລະພາກ, ທະນາຄານທຸລະກິດ, ສະຫະກອນສິນເຊື່ອ-ເງິນຝາກປະຢັດ ແລະຂະແໜງການກ່ຽວຂ້ອງຈຳນວນ 248 ຄົນ; ຄາດຄະເນແຜນຮັບນັກສຶກສາສາຂາການເງິນຈຸລະພາກລະດັບປະລິນຍາຕີສົກປີ 2021-2022 ຈຳນວນ 100-150 ຄົນ. ພ້ອມນັ້ນ,ຍັງກະກຽມຄວາມພ້ອມສຳລັບການສອນຜ່ານທາງໄກ ແລະຫັນເປັນທັນສະໄໝໂດຍເນັ້ນພັດທະນາຄູ-ອາຈານ, ຫຼັກສູດ,ແຜນການສອນ, ເຄື່ອງ ມື-ອຸປະກອນຮັບໃຊ້ ແລະຫ້ອງປະຕິບັດການສອນທາງໄກ. ມີຄູ-ອາຈານຈຳນວນໜຶ່ງຍັງເປັນຄູຝຶກຊ່ວຍສອນກ່ຽວກັບປະຊາສຶກສາທາງດ້ານການເງິນ, ນຳພານັກສຶກສາໄປທັດສະນະ ແລະສືບຕໍ່ຮ່ວມມືກັບບັນດາກົມພາຍໃນ ທຫລ, ສະຖາບັນການສຶກສາທັງພາຍໃນ ແລະຕ່າງປະເທດ, ສະມາຄົມການເງິນຈຸລະພາກ ແລະ ພາກສ່ວນກ່ຽວ ຂ້ອງ.
   ທ່ານຫົວໜ້າ ສທຄ ໄດ້ແຈ້ງໃຫ້ເຫັນສິ່ງທ້າທາຍບາງດ້ານໃນການພັດທະນາຊັບພະຍາກອນມະນຸດຜ່ານມາຄູ-ອາຈານຍັງບໍ່ພຽງພໍ, ຈໍານວນໜຶ່ງເປັນຄູ-ອາຈານໃໝ່ມີປະສົບການໃນການສອນໜ້ອຍ; ການຄົ້ນຄວ້າວິໄຈຍັງເຮັດບໍ່ທັນໄດ້ຫຼາຍໂດຍສະເພາະການຄົ້ນຄວ້າວິໄຈປະກອບເຂົ້າໃນການຮຽນ-ການສອນ; ນັກສຶກສາຈໍານວນໜຶ່ງມີຄວາມພ້ອມໃນການຮຽນມີຄວາມແຕກຕ່າງກັນ;ການນໍາໃຊ້ເຕັກໂນໂລຊີຂອງຄູ-ອາຈານ ແລະນັກສຶກສາຈໍານວນໜຶ່ງຍັງຈໍາກັດໃນຄວາມຮັບຮູ້ການໃຊ້ Application ແລະໂປຣແກຣມບໍ່ໄດ້ດີເທົ່າທີ່ຄວນໂດຍສະເພາະໄລຍະພະຍາດໂຄວິດ-19 ໃນ ການດໍາເນີນການສອນຜ່ານທາງໄກ (Distance Learning) ຜ່ານ Zoom App,Facebook, Whatsapp, Google Classroom, Microsoft_Teams ແລະອື່ນໆກວມເອົາ 96% ຂອງຈໍານວນວິຊາໃນພາກຮຽນທີ 2 ແລະ ໃນກໍລະນີທີ່ພະຍາດດັ່ງກ່າວຍັງເກີດຂຶ້ນ ສທຄ ຈະປັບປຸງພັດທະນາການສອນໂດຍຫັນສູ່ການສອນຜ່ານທາງໄກ ແລະ ທັນສະໄໝ, ສອບເສັງຜ່ານທາງອອນລາຍ, ຫ້ອງປະຕິບັດການສອນທາງໄກ ແລະ ຈະມີການປັບຕົວ ແລະ ນໍາໃຊ້ Fintect (ເຕັກໂນໂລຊີທາງການເງິນ) ຂອງບັນດາສະຖາບັນການເງິນເພື່ອຕອບສະໜອງຕາມ ຄວາມຕ້ອງການຂອງຜູ້ບໍລິໂພກໃນຍຸກດິຈິຕອນ ແລະ ປ່ຽນພຶດຕິກໍາຜູ້ບໍລິໂພກຈາກແບບເກົ່າໄປສູ່ແບບໃໝ່ດ້ວຍຮູບແບບບໍ່ໃຊ້ເງິນສົດ (ຊໍາລະສະສາງຜ່ານອິນເຕີເນັດ ຫຼື Application); ທັງໝົດເປັນການປະກອບສ່ວນເຂົ້າໃນການກໍ່ສ້າງຊັບພະຍາກອນມະນຸດໃຫ້ເປັນມືອາຊີບ,ມີຄວາມໂປ່ງໃສເຮັດໃຫ້ກົງຈັກການເງິນຈຸລະພາກມີຄຸນ ນະພາບ, ມີປະສິດຜົນສູງແນໃສ່ໃຫ້ສັງຄົມໄດ້ເຂົ້າເຖິງ ແລະນໍາໃຊ້ ແຫຼ່ງທຶນເຂົ້າຖືກເປົ້າໝາຍເພື່ອຜົນປະໂຫຍດຂອງປະຊາຊົນ ແລະເປັນການຕີຖອຍປະກົດການຫຍໍ້ທໍ້ ໂດຍສະເພາະການເງິນນອກລະບົບດອກເບ້ຍສູງທີ່ກຸ່ມຄົນບໍ່ດີສ້າງຂຶ້ນໃນຜ່ານມາ.

---------------

ຂ່າວ: ຣັດສະໝີ ດວງສັດຈະ 

ຮູບພາບ: ໜັງສືພິມເສດຖະກິດ-ສັງຄົມ

แชร์