ເປີດໂຕຜະລິດຕະພັນໂອນເງິນຂ້າມທະນາຄານເທິງມືຖື

  ບໍລິສັດ ລາວເນເຊີນນໍ ເພເມັ້ນ ເນັດເວີກ ຈຳກັດ (LAPNet) ຈັດພິທີເປີດໂຕຜະລິດຕະພັນໂອນເງິນຂ້າມທະນາຄານເທິງມືຖືຢ່າງເປັນທາງການທີ່ໂຮງແຮມແລນມາກນະຄອນຫຼວງວຽງຈັນ ໃນວັນທີ 8 ທັນວາ 2020 ແລະມອບໃບຍ້ອງຍໍໃຫ້ແກ່ 7 ທະນາຄານແບບຢ່າງທີ່ສາມາດເປີດໃຫ້ບໍລິການຜະລິດຕະພັນໂອນເງິນຂ້າມທະ ນາຄານເທິງມືຖືໃຫ້ແກ່ມວນຊົນນຳໃຊ້ໃນທົ່ວສັງຄົມໂດຍການໃຫ້ກຽດເຂົ້າຮ່ວມຂອງທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ (ທຫລ) ພ້ອມນີ້, ກໍ່ມີບັນດາຕາງໜ້າຜູ້ຖືຮຸ້ນຂອງບໍລິສັດ, ບັນດາກົມພາຍໃນ, ບັນດາກະຊວງຈຳນວນໜຶ່ງ, ທະນາຄານທຸລະກິດ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

   ການດຳເນີນທຸລະກິດຂອງ LAPNet ຊຶ່ງເປັນຜູ້ຄວບຄຸມລະບົບການຊຳລະທຸລະກຳຍ່ອຍແຫ່ງຊາດໃນ ສປປ ລາວ ທີ່ ມີເຮັດໜ້າທີ່ເປັນສື່ກາງໃນການເຮັດທຸລະກຳຮ່ວມກັນດ້ວຍຫຼາຍຮູບແບບ ແລະ ຫຼາກຫຼາຍຊ່ອງທາງ. LAPNet ໄດ້ພັດທະນາລະບົບເພື່ອສ້າງຜະລິດຕະພັນໂອນເງິນຂ້າມທະນາຄານເທິງມືຖືທີ່ຈະຊ່ວຍອຳນວຍຄວາມສະດວກໃຫ້ມວນຊົນເຮັດທຸລະກຳທາງການເງິນຢູ່ເທິງມືຖືຕາມຄຳຂວັນທີ່ວ່າ: “ທຸກທີ່ ທຸກເວລາທຸກຊ່ອງທາງການຊຳລະ”.

  ປະຈຸບັນ LAPNet ມີເຄືອຂ່າຍເຮັດທຸລະກໍາການນຳໃຊ້ບັດທະນາຄານຮ່ວມກັນ ຫຼືນຳໃຊ້ຕູ້ ATM ຮ່ວມກັນໃນການຖອນເງິນສົດ, ກວດຍອດເງິນໃນບັນຊີຮ່ວມກັນໄດ້16 ທະນາຄານໃນນີ້ມີທະນາຄານການຄ້າຕ່າງປະເທດລາວມະຫາຊົນ; ທະນາຄານພັດທະນາລາວ;ທະນາຄານ ຫວຽດຕິນ ລາວ ຈຳກັດ; ທະນາຄານ ອິນໂດຈີນ ຈຳກັດ; ທະນາຄານຮ່ວມພັດທະ ນາ; ທະນາຄານ ເອຊີລີດາລາວ ຈຳກັດ; ທະນາຄານສົ່ງເສີມກະສິກຳ; ທະນາຄານ ບີໄອຊີ ລາວ ຈຳກັດ; ທະນາຄານມາຣູ ຮານເຈແປນລາວ; ທະນາຄານຊາຄອມແບັງລາວ; ທະນາຄານຮ່ວມທຸລະກິດ ລາວ-ຫວຽດ; ທະນາຄານເອັສທີ ຈຳກັດ; ທະນາຄານອຸດສະຫະກຳ ແລະ ການຄ້າຈີນ; ທະນາ ຄານ ພາບລິກ ສາຂານະຄອນຫຼວງ; ທະນາຄານແຫ່ງປະເທດຈີນຈຳກັດ ແລະທະນາຄານກະສິກອນໄທສາຂານະຄອນຫຼວງ.

 ສຳລັບການໂອນເງິນຂ້າມທະນາຄານໂດຍຜ່ານຕູ້ ATM ໄດ້ມີ 10 ທະນາຄານຄື: ທະນາຄານພັດທະນາລາວ; ທະນາຄານການຄ້າຕ່າງປະເທດລາວມະຫາຊົນ; ທະ ນາຄານສົ່ງເສີມກະສິກຳ; ທະນາຄານ ເອັສທີ ຈຳກັດ; ທະນາຄານ ບີໄອຊີລາວ ຈຳກັດ; ທະນາຄານຮ່ວມທຸລະກິດລາວ-ຫວຽດ; ທະນາຄານຮ່ວມພັດທະນາ; ທະນາ ຄານ ພາບລິກ ສາຂານະຄອນຫຼວງ; ທະນາຄານມາຣູ ຮານເຈແປນລາວ ແລະທະນາຄານກະສິກອນໄທສາຂານະຄອນຫຼວງ.

   ໃນດ້ານຜະລິດຕະພັນໃໝ່ຫຼ້າສຸດທີ່ໄດ້ອອກໃຫ້ມວນຊົນເລີ່ມນຳໃຊ້ແຕ່ວັນທີ 08/12/2020 ເປັນຕົ້ນໄປແມ່ນການໂອນເງິນເທິງມືຖືໂດຍນໍາໃຊ້ຮູບແບບສ້າງເປັນ QR Code ແມ່ນມີ 2 ທະນາຄານຄື: ທະນາຄານ ພັດທະນາລາວ ແລະທະນາຄານ ເອັສທີ ຈຳກັດ; ສ່ວນການໂອນເງິນເທິງມືຖືໂດຍນຳໃຊ້ຮູບແບບການໂອນບັນຊີຫາບັນຊີ ຫຼື ເອີ້ນວ່າ Account Fund transfer ແມ່ນແລ້ວ 5 ທະນາຄານຄື: ທະນາຄານການຄ້າຕ່າງປະເທດລາວມະຫາຊົນ, ທະນາຄານຮ່ວມທຸລະກິດລາວ-ຫວຽດ, ທະນາຄານຮ່ວມພັດທະນາ ແລະທະນາຄານ ບີໄອຊີລາວ ຈຳກັດ ຊຶ່ງໃນນັ້ນ ທະນາຄານ ສົ່ງເສີມກະສິກຳ ແມ່ນກຳລັງດຳເນີນການ ແລະຄາດວ່າຈະໃຫ້ສຳເລັດໃນໄຕມາດທີ 1 ຂອງປີ 2021.

  ທ່ານ ຫົງຄຳ ເພັດດາວົງ ຜູ້ອຳນວຍການບໍລິສັດ LAPNetໄດ້ໃຫ້ຮູ້ວ່າ:“ໃນຕໍ່ໜ້າຈະໃຫ້ສາມາດຊຳລະຄ່າສິນຄ້າ ແລະຄ່າບໍລິການຕ່າງໆຢູ່ຮ້ານຄ້າໂດຍຜ່ານເຄື່ອງພີໂອເອສ, ຜ່ານ QR Code ຮ່ວມກັນໄດ້ຂອງບັນດາທະນາຄານທຸລະກິດ ແລະບໍລິສັດ Fintech ອື່ນທີ່ເປັນສະມາຊິກຂອງບໍລິສັດ LAPNet. ບໍລິສັດ LAPNet ຍັງໄດ້ຕັ້ງເປົ້າຜັນຂະຫຍາຍທຸລະກິດ ແລະວາງແຜນພັດທະນາລະບົບໂຄງລ່າງພື້ນຖານດ້ານການຊຳລະໃຫ້ມວນຊົນສາມາດເຮັດທຸລະກຳທາງການເງິນທີ່ທັນສະໄໝ, ປອດໄພສາມາດເຊື່ອມໂຍງກັບພາກພື້ນ ແລະສາກົນ.”

   ທ່ານ ສອນໄຊ ສິດພະໄຊ, ຜູ້ວ່າການ ທຫລ ໄດ້ກ່າວວ່າ: ປະຈຸບັນມີ 7 ທະນາຄານທີ່ມີຄວາມພ້ອມໃນການໃຫ້ບໍລິການໂອນເງິນຂ້າມທະນາຄານຢູ່ເທິງມືຖືໄດ້ໃນເບື້ອງຕົ້ນຊຶ່ງສະແດງໃຫ້ເຫັນເຖິງສັກກະຍະພາບ ແລະພະລັງຄວາມສາມັກຄີຂອງບັນດາທ່ານທີ່ພ້ອມພາກັນຈັດຕັ້ງປະຕິບັດແຜນການພັດທະນາໃຫ້ເກີດດອກອອກຜົນ ແລະກ້າຈະສ້າງສິ່ງຫັນປ່ຽນສິ່ງໃໝ່ໆຢ່າງຕັ້ງໜ້າ ແລະດີເດັ່ນ. ຂ້າພະເຈົ້າ, ຂໍຝາກຄວາມຫວັງອັນແຮງກ້າ ແລະ ເຊື່ອໜັ້ນວ່າບໍລິສັດ LAPNet ແລະ ບັນດາທະນາ ຄານທຸລະກິດຈະມີບົດບາດຄວາມສຳຄັນທີ່ຊ່ວຍເຊີດຊູໃຫ້ທຸກຂະແໜງເງິນໃຫ້ມີຊ່ອງທາງການຊຳລະສິນຄ້າເຄື່ອງອຸປະໂພກ-ບໍລິໂພກ ທີ່ຫຼາກຫຼາຍເຮັດໃຫ້ທຸລະກຳທາງ ການເງິນມີຄວາມວ່ອງໄວທັນການອັນເປັນເຄື່ອງມືສຳຄັນໃນການຂັບເຄື່ອນການພັດທະນາເສດຖະກິດ-ສັງຄົມໃຫ້ເຂັ້ມແຂງ.

----------------

ຂ່າວ: ຣັດສະໝີ ດວງສັດຈະ  

ຮູບພາບ: ໜັງສືພິມເສດຖະກິດ-ສັງຄົມ

แชร์