ລັດສຸມທຶນ 3,5 ພັນຕື້ກີບ ໃສ່ 202 ໂຄງການໄຊສົມບູນ

   ໄຊສົມບູນ ຖືກສ້າງຕັ້ງຂຶ້ນໃນທ້າຍປີ 2013 ດ້ວຍເປັນແຂວງນ້ອງໃໝ່ໃນຕະຫຼອດໄລຍະຜ່ານມາພັກ ແລະລັດຖະບານໄດ້ສຸມທຸກກຳລັງແຮງເພື່ອເຮັດແນວໃດໃຫ້ແຂວງດັ່ງກ່າວໄດ້ຮັບການພັດທະນາຢ່າງກ້າວກະໂດດທຽບທັນກັບແຂວງອື່ນໆໃນລາວໂດຍຕະຫຼອດ 5 ປີ ມານີ້ມີທັງໝົດ 202 ໂຄງການລົງທຶນຂອງລັດລວມມູນຄ່າ 3,5 ພັນຕື້ກີບ.
  ທ່ານ ພົນຕີ ຄຳລຽງ ອຸທະໄກສອນ ເຈົ້າແຂວງໄຊສົມບູນກ່າວເມື່ອບໍ່ດົນມານີ້ວ່າ: ນັບແຕ່ແຂວງໄຊສົມບູນໄດ້ຮັບການສ້າງຕັ້ງຂຶ້ນແມ່ນໄດ້ຄວາມເອົາໃຈໃສ່ຈາກພັກ ແລະລັດຖະບານຕະຫຼອດມາເພື່ອເພື່ອພັດທະນາໃຫ້ທຽບທັນກັບແຂວງອື່ນໆໃນລາວໂດຍໃນ 5 ປີມານີ້ ໄດ້ຮັບໂຄງການລົງທຶນຂອງລັດທີ່ຢູ່ໃນຂັ້ນຄຸ້ມຄອງຂອງແຂວງທີ່ສະພາແຫ່ງຊາດ ແລະສະພາປະຊາຊົນແຂວງຮັບຮອງທັງໝົດ 202 ໂຄງການມູນຄ່າ 3.542 ຕື້ກີບ ໃນນີ້ໂຄງການສືບຕໍ່ ແລະໜີ້ສິນກ່ອນປີ 2016 ມີ 142 ໂຄງ ການມູນຄ່າ 2,6 ພັນຕື້ກີບ ແລະອີກ 60 ໂຄງການມູນຄ່າ 903,03 ຕື້ກີບ ແມ່ນໂຄງການທີ່ອະນຸ ມັດເລີ່ມແຕ່ປີ 2016 ເປັນຕົ້ນມາ.

  ນອກຈາກນີ້ຍັງມີໂຄງການທີ່ສູນກາງທີ່ມາຈັດຕັ້ງປະຕິບັດຢູ່ແຂວງທັງໝົດ 116 ໂຄງການ ມູນຄ່າ 1,9 ພັນຕື້ກີບ ສ່ວນການຊ່ວຍເຫຼືອເພື່ອພັດທະນາສາມາດຂົນ ຂວາຍ ແລະຍາດແຍ່ງທຶນຊ່ວຍເຫຼືອເພື່ອການພັດທະນາ (ODA ) ໄດ້ທັງໝົດ 13 ໂຄງການມູນຄ່າ 9,2 ແສນໂດລາ ພ້ອມນີ້ຍັງມີ 1 ໂຄງການມູນຄ່າ 1,1 ລ້ານໂດລາຈາກອົງການຈັດຕັ້ງສາກົນທີ່ບໍ່ຂຶ້ນກັບລັດຖະບານ ແລະ 5 ໂຄງການມູນຄ່າ 5,9 ຕື້ດົງ ຈາກການຊ່ວຍເຫຼືອຂອງ ສສ ຫວຽດນາມ.

  ຈາກການສຸມທຶນຮອນຄືດັ່ງກ່າວນັ້ນໄດ້ມີສ່ວນເປັນຜົນເຮັດໃຫ້ແຂວງໄຊສົມບູນໄດ້ມີໃບໜ້າໃໝ່ເສດຖະກິດຂະຫຍາຍຕົວດີຂຶ້ນເລື້ອຍໆ ແລະ ປະຊາຊົນກໍຫຼຸດພົ້ນອອກຈາກຄວາມທຸກຍາກຕາມລຳດັບໂດຍປະຈຸບັນຍັງ 7,12% ເທົ່າກັບ 1.098 ພັນຈາກຄອບຄົວທຸກໝົດທົ່ວແຂວງ.

แชร์