ພີທິທິ ລາວ ຄືນທຶນສູ່ສັງຄົມດ້ວຍການຮັກສາສຶ່ງແວດລ້ອມໃນສະຫວັນນະເຂດ

  ໃນວັນທີ 3 ທັນວາ 2020 ທີ່ສວນສາທາລະນະວົງວຽນໄດໂນເສົາ ບ້ານໂພນສະຫວ່າງເໜືອ ນະຄອນໄກສອນ ພົມວິຫານ ແຂວງສະຫວັນນະເຂດ, ທາງບໍລິສັດ ພີທີທີ ລາວຈຳກັດ ໄດ້ມອບຕົ້ນໄມ້ເພື່ອຕົບແຕ່ງສວນສາທາລະນະໄດໂນເສົາຈຳນວນ 1.000 ກວ່າຕົ້ນ ແລະຖັງຂີ້ເຫຍື້ອເພື່ອສົ່ງເສີມການຖິ້ມຂີ້ເຫຍື້ອໃຫ້ຖືກວິທີ, ພ້ອມ ກັນນີ້ຍັງໄດ້ຕິດຕັ້ງປ້າຍຫ້ອຍເສົາໄຟຟ້າໃນການເຜີຍແຜ່ກົດລະບຽບຈະລາຈອນ ແລະເຜີຍແຜ່ຄຳຂວັນກອງປະຊຸມໃຫຍ່ຜູ້ແທນອົງຄະນະພັກແຂວງສະຫວັນນະເຂດຄັ້ງທີ IX ໂດຍມີທ່ານ ແສງທອງ ວັງແກ້ວມະນີ ເຈົ້ານະຄອນໄກສອນ ພົມວິຫານ, ມີຮອງເຈົ້ານະຄອນ, ຫົວໜ້າຫ້ອງການຄຸ້ມຄອງພັດທະນາ ແລະບໍລິການນະຄອນເຂົ້າ ຮ່ວມ.
  ທ່ານ ແສງທອງ ວັງແກ້ວມະນີໄດ້ກ່າວວ່າ: ຂ້າພະເຈົ້າຮູ້ສຶກດີໃຈເປັນຢ່າງຍິ່ງທີ່ທາງບໍລິສັດ ພີທີທີ ລາວ ຈຳກັດໄດ້ມອບຕົ້ນໄມ້ ແລະຖັງຂີ້ເຫຍື້ອໃຫ້ກັບແຂວງສະຫວັນນະເຂດກໍ່ຄືນະຄອນໄກສອນ ພົມວິຫານ ໄດ້ນຳໃຊ້ພ້ອມນີ້ທາງບໍລິສັດຍັງໄດ້ຕິດຕັ້ງປ້າຍຫ້ອຍເສົາໄຟຟ້າເພື່ອເຜີຍແຜ່ຄຳຂວັນກອງປະຊຸມໃຫຍ່ຜູ້ແທນອົງຄະນະພັກ ແຂວງສະຫວັນນະເຂດຄັ້ງທີ IX ແລະປ້າຍດັ່ງກ່າວຈະປ່ຽນເປັນການສົ່ງເສີມການຂັບຂີ່ປອດໄພໃນອະນາຄົດ ແລະຫວັງຢ່າງຍິ່ງວ່າທາງບໍລິສັດ ພີທີທີ ລາວ ຈະມີກິດຈະກຳດີໆແບບນີ້ຕະຫຼອດໄປ.
 ໂອກາດນີ້ ທ່ານ ມົນໄຊ ບຸນອີ່ມ ຜູ້ອຳນວຍການບໍລິສັດ ພີທີທີ ລາວ ຈຳກັດ ກໍ່ໄດ້ມີຄຳເຫັນວ່າ: ຂ້າພະເຈົ້າມີຄວາມພາກພູມໃຈທີ່ໄດ້ເປັນສ່ວນໜຶ່ງໃນການປະກອບສ່ວນຊ່ວຍໂຄສະນາໃນວຽກງານຂະ ບວນການຕ້ອນຮັບກອງປະຊຸມ ໃຫຍ່ອົງຄະນະພັກແຂວງສະຫວັນນະເຂດໃນຄັ້ງນີ້ ແລະ ໄດ້ມີສ່ວນຮ່ວມໃນການເຜີຍແຜ່ກົດລະບຽບຈະລາຈອນຈຳນວນ 100 ປ້າຍ, ມີສ່ວນຮ່ວມໃນການຕົບແຕ່ງສວນສາທາລະນະດ້ວຍການມອບຕົ້ນໄມ້ຈຳນວນ 1.000 ກວ່າຕົ້ນນີ້ ແລະຖັງໃສ່ຂີ້ເຫຍື້ອຈຳນວນ 12 ຖັງ, ລວມມູນຄ່າເປັນເງິນທັງໝົດ 128 ລ້ານກີບ ທັງນີ້ກໍ່ເພື່ອເປັນການຮັກສາສິ່ງແວດລ້ອມ ແລະຄວາມສະອາດພາຍໃນແຂວງສະຫວັນນະເຂດ.

ບໍລິສັດ ພີທີທີ ລາວ ຈຳກັດ ສ້າງຕັ້ງຂຶ້ນໃນວັນທີ 11 ພະຈິກ 1993 ພາຍໃຕ້ຊື່ບໍລິສັດຫົວຂອງການຄ້າຈຳກັດ ແລະໄດ້ປ່ຽນຊື່ມາເປັນບໍລິສັດ ພີທີທີ ລາວ ຈຳກັດ ໃນປີ 2011 ເປັນຕົ້ນມາ, ໂດຍທັງໝົດມີ 51 ສາຂາທົ່ວປະເທດ ແລະຢູ່ແຂວງສະຫວັນນະເຂດມີທັງໝົດ 5 ສາຂາ ແລະຄາເຟ່ ອາເມຊອນທັງໝົດ 6 ສາຂາ.

---------------

ຂ່າວ ສະຫວັນ

ຮູບພາບ: ໜັງສືພິມເສດຖະກິດ-ສັງຄົມ

แชร์