ໜ່ວຍງານດ້ານການປົກຄອງ ສະຫຼຸບວຽກງານຜ່ານມາ

 ກອງປະຊຸມປະຈໍາປີ, ກອງປະຊຸມປະທານ ແລະປະທານຮ່ວມຂອງໜ່ວຍງານດ້ານການປົກຄອງໄດ້ຈັດຂຶ້ນໃນວັນທີ 3 ທັນວາ 2020 ໂດຍການເປັນປະທານຮ່ວມຂອງທ່ານ ທອງຈັນ ມະນີໄຊ ລັດຖະມົນ ຕີກະຊວງພາຍໃນ, ທ່ານ ໄຊສີ ສັນຕິວົງ ລັດຖະມົນຕີກະຊວງຍຸຕິທໍາ, ທ່ານ ນາງ ຣິຄາດາ ຣິດເຈີ ຜູ້ຕາງໜ້າອົງການສະຫະປະຊາຊາເພື່ອການພັດທະນາ ແລະທ່ານ ຊອນ ຝຣັງຊົວ ຄູໂນດ ຫົວໜ້າອົງການຮ່ວມມືເພື່ອການພັດທະນາຂອງປະເທດສະວິດເຊີແລນ,ມີຫົວໜ້າພະແນກພາຍໃນແຂວງອັດ ຕະປື, ຜູ້ຕາງໜ້າຈາກສະພາປະຊາຊົນ ແຂວງອັດຕະປື, ຜູ້ຕາງໜ້າຈາກບັນດາອົງການຈັດຕັ້ງຂອງລັດ, ຄູ່ຮ່ວມພັດທະນາ ແລະອົງການຈັດຕັ້ງທາງສັງຄົມເຂົ້າຮ່ວມ.

  ທ່ານ ທອງຈັນ ມະນີໄຊ ໄດ້ກ່າວວ່າ: ການຈັດກອງປະຊຸມໃນຄັ້ງນີ້ເພື່ອເປີດໂອກາດໃຫ້ບັນດາສະມາຊິກຈາກທຸກໆພາກສ່ວນໄດ້ມີໂອກາດມາທົບທວນນໍາກັນຄືນເຖິງຜົນສໍາເລັດ ແລະສິ່ງທ້າທາຍຕ່າງໆກ່ອນຈະນໍາສະເໜີໃນກອງປະຊຸມໂຕະມົນທີ່ຈະຈັດຂຶ້ນໃນໄວໆນີ້ລວມທັງການພິຈາລະນາຮັບຮອງແຜນການຈັດຕັ້ງປະຕິບັດວຽກງານຂອງໜ່ວຍງານດ້ານການປົກຄອງໃນປີ 2021, ສໍາລັບປີ 2020 ນີ້ ໜ່ວຍງານດ້ານການປົກຄອງກໍຄືທັງສອງໜ່ວຍງານຍ່ອຍເຊັ່ນ: ໜ່ວຍງານຍ່ອຍດ້ານການບໍລິ ການລັດຖະການ ແລະໜ່ວຍງານຍ່ອຍດ້ານນິຕິກໍາ ກໍໄດ້ຈັດຕັ້ງປະຕິບັດແຜນການຂອງຕົນພ້ອມທັງມີການກະກຽມຄໍາ ເຫັນຂອງຂະແໜງການປົກຄອງເພື່ອສະເໜີເຂົ້າໃນແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ຊຶ່ງລັດຖະບານໄດ້ກໍານົດເອົາວຽກງານການປົກຄອງເປັນເປົ້າໝາຍທີ 6 ໃນນີ້ມີການຄຸ້ມຄອງ-ບໍລິຫານລັດມີປະສິດທິພາບ,ສັງຄົມມີຄວາມສະເໝີພາບ, ຍຸຕິທຳ ແລະໄດ້ຮັບການປົກປ້ອງຕາມທິດການປົກຄອງດ້ວຍກົດໝາຍທີ່ສັກສິດ ແລະເຂັ້ມງວດໂດຍໄດ້ເນັ້ນໜັກໃນວຽກງານການສ້າງຂີດຄວາມສາມາດຂອງອົງການຈັດຕັ້ງໂດຍສະເພາະຢູ່ຂັ້ນທ້ອງຖິ່ນໃຫ້ສາມາດປະຕິບັດໜ້າທີ່ໃນການສະໜອງການບໍລິການແກ່ປະຊາຊົນ ແລະການພັດທະນາທ້ອງຖິ່ນໃຫ້ມີປະສິດທິພາບສູງຂຶ້ນສອດຄ່ອງກັບການມອບສິດ ແລະມອບຄວາມຮັບຜິດຊອບໃຫ້ແກ່ອຳນາດການປົກຄອງທ້ອງຖິ່ນຕາມທິດນຳ 3 ສ້າງນອກຈາກນີ້ຍັງໄດ້ສືບຕໍ່ສ້າງລະບົບການມີສ່ວນຮ່ວມຂອງປະຊາຊົນໃນວຽກງານການປັບປຸງ ການບໍລິຫານລັດຖະການຢ່າງມີລະບົບໂດຍການຂະຫຍາຍລະບົບການສໍາຫຼວດຄໍາຄິດເຫັນຂອງປະຊາຊົນນີ້ອອກໄປອີກ 4 ເມືອງ ຕື່ມ ໃນສົກປີ 2020-2021.
  ໃນກອງປະຊຸມຜູ້ເຂົ້າຮ່ວມໄດ້ຮັບຟັງການສະຫຼຸບລາຍງານຜົນການຈັດຕັ້ງປະຕິບັດກິດຈະກໍາທີ່ຜ່ານມາລວມທັງຂໍ້ສະດວກ,ຂໍ້ຫຍຸ້ງຍາກ,ສິ່ງທ້າທາຍ ແລະວາງທິດທາງແຜນການໃນຕໍ່ໜ້າຂອງໜ່ວຍງານດ້ານການປົກຄອງ ແລະສົນທະນາແລກປ່ຽນຄຳຄິດຄຳເຫັນທີ່ສຳຄັນຕໍ່ກັບຮ່າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ IXທີ່ຕິດພັນກັບໜ່ວຍງານດ້ານການປົກຄອງພ້ອມທັງແຈ້ງໃຫ້ຮູ້ເຖິງແຜນການສໍາຫຼວດຄໍາຄິດເຫັນຂອງປະຊາຊົນຕໍ່ກັບການບໍລິການຂອງລັດທີ່ກະຊວງພາຍໃນຈະໄດ້ເລີ່ມຈັດຕັ້ງປະຕິບັດໃນຕົ້ນປີ 2021 ນີ້ອີກດ້ວຍ.

 

แชร์