ວິລະບູລີສອບເສັງນັກຮຽນເກັ່ງຂັ້ນເມືອງ

  ວັນທີ 26 ພະຈິກ ຜ່ານມາ ທີ່ສະໂມສອນຂອງໂຮງຮຽນ ມສ ພູຄໍາ ຫ້ອງການສຶກສາທິການ ແລະກີລາເມືອງວິລະບູລີ ໄດ້ຈັດພິທີການສອບເສັງຄັດເລືອກເອົານັກຮຽນ ເກັ່ງຂັ້ນເມືອງຂອງຕົນປະຈໍາສົກປີ 2020–2021 ໂດຍເປັນປະທານ ຂອງທ່ານ ສີຄູນບານ ມະນີວົງ ກໍາມະການພັກເມືອງຮອງເຈົ້າເມືອງ ວິລະບູລີຜູ້ຊີ້ນໍາວຽກງານຂົງເຂດວັດທະນະທໍາ-ສັງຄົມ, ທ່ານນາງ ທູນທະລາ ໄຊຍະສານ ຫົວໜ້າຫ້ອງການສຶກສາທິການ ແລະກີລາເມືອງ, ມີບັນດາທ່ານໃນຄະນະອໍານວຍການໂຮງຮຽນປະຖົມ, ມັດທະຍົມ, ບັນດາຄູ-ອາຈານ, ກໍາມະການຍາມຫ້ອງເສັງພ້ອມດ້ວຍ ນ້ອງນັກຮຽນທີ່ຖືກຄັດເລືອກເຂົ້າສອບເສັງນັກຮຽນເກັ່ງຂັ້ນເມືອງທີ່ມາຈາກໂຮງຮຽນແຫ່ງຕ່າງໆໃນທົ່ວເມືອງວິລະບູລີເຂົ້າຮ່ວມ.

  ຈຸດປະສົງຂອງການຈັດການສອບເສັງນັກຮຽນເກັ່ງຂັ້ນເມືອງ ໃນຄັ້ງນີ້ກໍ່ແມ່ນເພື່ອຄັດເລືອກເອົານັກຮຽນດີ-ຮຽນເກັ່ງໃນແຕ່ລະວິຊາທີ່ຈະເປັນຕົວແທນຂອງເມືອງ ວິລະບູລີ ໄປສອບເສັງໃນຂັ້ນແຂວງຕໍ່ໄປ, ຊຶ່ງວ່າມີນ້ອງນັກຮຽນເຂົ້າ ຮ່ວມສອບເສັງທັງໝົດຈໍານວນ 112 ຄົນ, ຍິງ 67 ຄົນ ທີ່ມາຈາກ ໂຮງຮຽນຊັ້ນປະຖົມຈໍານວນ 13 ກຸ່ມ, ໂຮງຮຽນມັດທະຍົມຕົ້ນຊັ້ນ ມ 4 ຈໍານວນ 12 ແຫ່ງ ແລະໂຮງຮຽນມັດທະຍົມປາຍຊັ້ນມໍ 7 ຈໍານວນ 5 ແຫ່ງໃນທົ່ວເມືອງວິລະບູລີ; ສ່ວນວ່າວິຊາທີ່ໃຊ້ເຂົ້າໃນການສອບເສັງປະກອບມີ: ສໍາລັບຊັ້ນປ 5 ມີວິຊາພາສາລາວ, ຄະນິດສາດ ແລະວິຊາໂລກອ້ອມຕົວ, ສໍາລັບຊັ້ນ ມ 4 ແລະຊັ້ນມ 7 ມີວິຊາພາສາລາວ-ວັນນະຄະດີ, ຄະນິດສາດ, ຟີຊິກສາດ ແລະວິຊາເຄມີສາດ.

  ຜ່ານການສອບເສັງຕົວຈິງສາມາດຄັດເລືອກໄດ້ຜູ້ທີ່ໄດ້ຄະແນນດີອັນດັບທີ 1 ສໍາລັບຊັ້ນປະຖົມປໍ 5 ວິຊາພາສາລາວແມ່ນ ນາງ ລັດສະໝີ ພົມມະຈັກ ໂຮງຮຽນປະຖົມ ໂນນສົມພູ; ຄະນິດສາດ ນາງ ພາວິນີ ແກ້ວມະນີວັນ ໂຮງຮຽນປະຖົມອ່າງຄໍາ ແລະວິຊາໂລກອ້ອມຕົວ ນາງ ສຸກສະດາ ພະໄຊສົມບັດ ໂຮງ ຮຽນປະຖົມນໍ້າມະຮີ; ຊັ້ນມ 4 ວິຊາ ພາສາລາວ-ວັນນະຄະດີນາງກິລາ ພະສີສົມບັດ ໂຮງຮຽນ ມສ ພູຄໍາ; ຄະນິດສາດ ນາງ ດອນລີ້ ບຸນນາລົມ ໂຮງຮຽນ ມສ ພູຄໍາ; ວິຊາເຄ ມີສາດ ທ້າວ ຄໍາຈັນ ອິນທະວົງສາ ຈາກໂຮງຮຽນ ມສ ພູຄໍາ ແລະວິຊາ ຟີກຊິກສາດ ແມ່ນນາງ ໄຊມາລາ ວົງພູໄທ ໂຮງຮຽນ ມສ ພູຄໍາແລະ ຊັ້ນມ 7 ວິຊາພາສາລາວ-ວັນນະຄະດີ ແມ່ນນາງ ເພັດເມສາ ພົມມະສຸກຂະ ໂຮງຮຽນ ມສ ພູຄໍາ,ຄະນິດສາດ ນາງ ຈັນທະວີໄລ ຂັນທະວົງ ໂຮງຮຽນ ມສ ພູຄໍາ, ເຄມີສາດ ທ້າວ ເກດແກ້ວ ຄູນທະວີ ໂຮງຮຽນ ມສ ໂພນສະຫວາງ ແລະວິຊາຟີຊິກສາດແມ່ນນາງ ສຸວັນນີ ແສນຍອດຈາກໂຮງຮຽນ ມສ ພູຄໍາ.

  ຈາກນັ້ນ ກໍ່ໄດ້ມີການມອບຂອງຂວັນລາງວັນໃຫ້ນ້ອງນັກຮຽນຜູ້ທີ່ເສັງໄດ້ຄະແນນດີ ແລະມອບລາງວັນພິເສດເປັນເງິນສົດຈໍານວນ 2 ລ້ານກີບໃຫ້ແກ່ນາງ ຈັນທະວີໄລ ຂັນທະວົງຈາກໂຮງຮຽນ ມສ ພູ ຄໍາ ຊຶ່ງແມ່ນຜູ້ທີ່ເສັງໄດ້ຄະແນນ 8 ຂຶ້ນໄປໃນການສອບເສັງໃນຄັ້ງນີ້ ທັງນີ້ເພື່ອເປັນການຊຸກຍູ້ໃຫ້ເຂົາເຈົ້າມີກໍາລັງໃຈໃນການພັດທະນາການຮຽນຕົນເອງໃຫ້ດີຂຶ້ນກວ່າເກົ່າໃນອະນາຄົດ ແລະນອກຈາກນີ້ກໍ່ຍັງໄດ້ມີການມອບຂອງລາງວັນໃຫ້ແກ່ຄູອາຈານຜູ້ທີ່ສອນດີ ສອນເກັ່ງຊຶ່ງເປັນສ່ວນສໍາຄັນທີ່ເຮັດໃຫ້ນັກຮຽນຂອງຕົນສາມາດຍາດໄດ້ຜົນງານອັນໃຫຍ່ຫຼວງໃນການສອບເສັງໃນຄັ້ງນີ້ ເພື່ອເປັນຕົວແທນຂອງເມືອງໄປສອບເສັງນັກຮຽນເກັ່ງໃນລະດັບຂັ້ນແຂວງ ຕໍ່ໄປ.

----

ໜັງສືພິມ ເສດຖະກິດ-ສັງຄົມ

แชร์