ເມືອງວັງວຽງ ເປີດຂະບວນວັນໃຫ້ວັກຊິນກັນພະຍາດ

ໃນວັນທີ 3 ທັນວາ 2020 ເມືອງວັງວຽງ ແຂວງວຽງຈັນ ໄດ້ຈັດພິທີເປີດຂະບວນການຈັດຕັ້ງປະຕິບັດວັນໃຫ້ວັກຊິນກັນພະຍາດໂປລິໂອ ແລະພະຍາດໝາກແດງໃຫ່ຍ-ໜາກແດງນ້ອຍພ້ອມຂະບວນການຕະລຸມບອນໃຫ້ວັກຊິນກັນພະຍາດຮອບປົກກະຕິສຳລັບເດັກນ້ອຍອາຍຸລຸ່ມ 5 ປີ ຂຶ້ນທີ່ໂຮງຮຽນອະນຸບານໂພນເພັງເມືອງວັງວຽງ ພາຍໃຕ້ການເປັນປະທານຂອງທ່ານ ບຸນຈັນ ມາລາວົງ ເຈົ້າເມືອງໆວັງວຽງ, ມີ ທ່ານ ດຣ ເພັດສະໝອນ ບູລົມມະວົງ ຫົວໜ້າຫ້ອງການສາທາລະນະສຸກເມືອງ, ມີທ່ານ ອານັນໄຊ ຜູ້ປະສານຈາກອົງການອະນາໄມໂລກ, ມີບັນດາທ່ານກຳມະການພັກເມືອງ, ຫົວໜ້າ-ຮອງ ຫ້ອງການ, ພະນັກງານແພດໝໍ, ຄູ-ອາຈານ, ນັກຮຽນ ແລະຫຼານນ້ອຍເຂົ້າຮ່ວມ.

   ທ່ານ ດຣ ເພັດສະໝອນ ບູລົມມະວົງ ກ່າວວ່າ: ໃນສົກປີຜ່ານມາ, ພັກ ແລະລັດຖະບານໄດ້ເອົາໃຈໃສ່ຊຸກຍູ້ວຽກງານສັກຢາກັນພະຍາດຢ່າງຈິງຈັງ ແລະ ສາມາດປະ ກາດເປັນແຂວງທີ່ປອດພະຍາດໂປລິໂອໄດ້ ໃນປີ 2000 ສໍາລັບເມືອງວັງວຽງເອງກໍ່ໄດ້ປະກອບສ່ວນຢ່າງຕັ້ງໜ້າເຂົ້າໃນການມີສ່ວນຮ່ວມໃນການຫຼຸດຜ່ອນການເຈັບເປັນ ແລະການຕາຍຂອງແມ່ ແລະເດັກຈາກຜົນການຕິດຕາມໃນປີ 2019 ອັດຕາການຕາຍຂອງເດັກ 1 ປີ ຢູ່ເມືອງໄດ້ຫຼຸດລົງເຫຼືອພຽງ ແຕ່ 4 ສ່ວນພັນ, ເດັກ 5 ປີ ຕາຍ ພຽງ 1 ສ່ວນພັນ ແລະແມ່ຕາຍ 89 ສ່ວນແສນຂອງເດັກເກີດມີຊີວິດ, ສໍາລັບການສັກຢາກັນພະຍາດດ້ວຍວັກຊິນທຸກຊະນິດຢູ່ໃນເມືອງ ແມ່ນສາມາດບັນລຸໄດ້ 98% ໃນນັ້ນອັດຕາການສັກຢາກັນພະຍາດໝາກແດງໃນຮອບປົກກະຕິປີ 2019 ບັນລຸ 94%. ສໍາລັບຮອບພິເສດວັນສັກຢາກັນພະຍາດແຫ່ງຊາດໃນປີ 2019 ເພື່ອກໍາຈັດພະຍາດໝາກແດງໃຫ້ລູກຫຼານໃນກຸ່ມ ອາຍຸ 9 ເດືອນເຖິງ 10 ປີຈຳນວນ 11.015 ຄົນ (ບັນລຸ 99%) ພິເສດໃນປີ 2020 ນີ້ເມືອງວັງວຽງ ຂອງພວກເຮົາໄດ້ຮັບການສະໜັບສະໜູນຈາກອົງການກາວີ (GAVI) ໄດ້ມີຂະບວນການສັກວັກຊິນກັນມະເຮັງປາກມົດລູກ (HPV) ໃຫ້ນັກຮຽນຍິງອາຍຸແຕ່ 10 ປີ ຫາ 15 ປີ ລວມມີ 2.607 ຄົນ (ບັນ ລຸ 99%), ຄຽງຄູ່ກັນນັ້ນກໍ່ໄດ້ແຈກຢາຍວິຕາ ມິນ A ແລະຢາຂ້າແມ່ທ້ອງ 2 ຄັ້ງ/ປີ (ບັນລຸ 95%).

 ສໍາລັບແຜນການໃຫ້ວັກຊິນກັນພະຍາດໂປລິໂອແລະພະຍາດໝາກແດງໃຫ່ຍໝາກແດງນ້ອຍ ຢູ່ເມືອງວັງວຽງ ປີ 2020 ໃນລະຫ່ວາງວັນທີ 3-15 ທັນວາ 2020 ນີ້ຢູ່ໃນ 61 ບ້ານທົ່ວເມືອງຮ່ວມກັບໂຮງໝໍນ້ອຍຈະໄດ້ຈັດກິດຈະກໍາສັກວັກຊິນກັນພະຍາດໝາກແດງ ແລະຢອດວັກຊິນກັນພະຍາດໂປລິໂອຢູ່ຕາມໂຮງໝໍເມືອງ, ໂຮງ ໝໍນ້ອຍ ແລະໜ່ວຍແພດເຄື່ອນທີ່ ລົງໄປໃຫ້ການບໍລິການຢູ່ໃນແຕ່ລະບ້ານ, ມີເປົ້າໝາຍເດັກອາຍຸ 0 ມື້ ຫາ 5 ປີ ຈໍານວນ 4.485 ຄົນ, ໃນນັ້ນເປົ້າໝາຍຢູ່ໂຮງຮຽນກວມເອົາ 41 % (2.236 ຄົນ), ຊຶ່ງມີຈຸດສັກຢາທັງໝົດ 128 ຈຸດ, ຈະໄດ້ນໍາໃຊ້ແພດໝໍຈໍານວນ 26 ຄົນ ໃນໂຮງໝໍເມືອງ 1 ແຫ່ງ, ໂຮງໝໍນ້ອຍ 5 ແຫ່ງ.

แชร์