ຮູ້ຈັກ! ທ່າເຮືອກ່າຍແມັບຫວຽດນາມ ເຕີບໂຕ ສູງສຸດໃນອາຊຽນ

  ບໍລິສັດ ເຄຊີທີຊີ ບໍລິສັດຂົນສົ່ງສິນຄ້າທາງເຮືອລະຫວ່າງປະເທດຂອງສ.ເກົາຫຼີໄດ້ລົງນາມບັນທຶກຄວາມເຂົ້າໃຈ(ເອັມໂອຢູ)ກັບທ່າເຮືອກ່າຍແມັບ (Cai Mep)ຂອງສສ ຫວຽດນາມ ຮ່ວມມືສົ່ງເສີມການຄ້າການລົງທຶນໃນເຂດພາກໃຕ້ຂອງຫວຽດນາມອ້ອມຮອບບໍລິເວນທ່າເຮືອ.

  ຜູ້ຊ່ຽວຊານລະບຸວ່າລະບົບໂລຈິສຕິກຂອງພື້ນທີ່ອ້ອມຂ້າງທ່າເຮືອກ່າຍແມັບເຕີບໂຕຂຶ້ນ 14% ສູງສຸດໃນອາຊຽນ ແລະແຊງໜ້າອັດຕາການເຕີບໂຕຂອງທ່າເຮືອແຫຼມ ສະບັງຂອງໄທດຶງດູດນັກລົງທຶນຈາກທົ່ວໂລກໃຫ້ເຂົ້າມາລົງທຶນໃນພື້ນທີ່ບໍລິເວນນີ້ຄວາມຮ່ວມມືຂອງສອງຝ່າຍຈະຊ່ວຍອຳນວຍຄວາມສະດວກສ້າງສັກກະຍະພາບໃຫ້ກັບ ທ່າເຮືອ.

 ໂດຍໃນເດືອນກັນຍາທີ່ຜ່ານມາສະຫະພາບເອີຣົບ (ອີຢູ) ໄດ້ນໍານັກລົງທຶນຈາກແບນຊິກ ແລະໂຮນລັງເຂົ້າໄປລົງທຶນໃນກິດຈະການທ່າເຮືອຫວຽດນາມເປັນຈຳນວນເງິນລົງທຶນເຖິງ 1 ຕື້ໂດລາສະຫະລັດ ຊຶ່ງຂໍ້ຕົກລົງການຄ້າເສລີເອີຣົບ-ຫວຽດນາມເປັນຂໍ້ໄດ້ປຽບຂອງຫວຽດນາມເໜືອປະເທດອື່ນໆໃນອາຊຽນທີ່ຊ່ວຍດຶງດູດນັກລົງທຶນທີ່ມີຄຸນນະພາບຈາກເອີຣົບເຂົ້າໄປຮ່ວມພັດທະນາໂຄງສ້າງພື້ນຖານດ້ານໂລຈິສຕິກໂດຍສະເພາະທ່າເຮືອ ແລະເສດຖະກິດມະຫາສະໝຸດທີ່ກຳລັງເຕີບໂຕໃນເວລານີ້. ຫວຽດ ນາມສົ່ງເສີມໃຫ້ນັກລົງທຶນຕ່າງປະເທດເຂົ້າໄປຮ່ວມພັດທະນາທ່າເຮືອກ່າຍແມັບທ່າເຮືອແຫ່ງໃໝ່ທີ່ຢູ່ທາງພາກໃຕ້ບໍ່ໄກຈາກນະຄອນໂຮຈີ່ມິນຢູ່ໃນເຂດເສດຖະກິດພິເສດຂອງຫວຽດນາມທີ່ກຳລັງເຕີບໂຕຢ່າງກ້າວກະໂດດ.

  ຫວຽດນາມເລັ່ງພັດທະນາທ່າເຮືອສົ່ງອອກສິນຄ້າຕາມແນວຊາຍຝັ່ງໂດຍທ່າພາກເໜືອມີທ່າເຮືອຫາຍຟອງທາງພາກໃຕ້ມີທ່າເຮືອໂຮຈີ່ມິນ ແລະ ກ່າຍແມັບສ່ວນພາກ ກາງທີ່ແຂວງກວ້າງນາມກຳລັງພັດທະນາທ່າເຮືອຈູລາຍເຈືອງຫາຍເພື່ອຮອງຮັບການຂົນສົ່ງສິນຄ້າໃນເຂດເສດຖະກິດພິເສດຈູລາຍໂດຍເຊີນຊວນຕ່າງປະເທດໃຫ້ເຂົ້າ ໄປພັດທະນາທ່າເຮືອ ແລະສະໜາມບິນທີ່ຢູ່ໃນແຜນພັດທະນາເສດຖະກິດຂອງລັດຖະບານ.

  ການລົງທຶນຂອງຫວຽດນາມຈະເປັນແບບພີພີພີຄືເອກະຊົນຮ່ວມມືກັບລັດຖະບານໂດຍລັດຖະບານມອງວ່າສະໜາມບິນ ແລະທ່າເຮືອຈູລາຍຈະກາຍເປັນສູນກາງການຂົນສົ່ງທາງອາກາດຂອງອາຊຽນເພາະເຂົ້າເຖິງພື້ນທີ່ໃນລັດສະເໝີ 3.000 ກິໂລແມັດ ໄດ້ຢ່າງວ່ອງໄວໂດຍຄາດວ່າພາຍໃນປີ 2030 ຈະສົ່ງສິນຄ້າທາງອາກາດໄດ້ 4,1 ລ້ານໂຕນ ສ່ວນການຂົນສົ່ງສິນຄ້າທາງເຮືອຈະເຮັດໄດ້ 12,7 ລ້ານໂຕນ.

แชร์