ປະຕູຄຳ ສະຖາບັນການເງິນພາຍໃນ-ສາກົນເຊື່ອໜັ້ນ

   ສະຖາບັນການເງິນຈຸລະພາກທີ່ຮັບເງິນຝາກປະຕູຄຳ (ສກຈຮປະຕູຄຳ) ທີ່ໄດ້ຮັບການອະນຸຍາດດຳເນີນທຸລະກິດໃນປີ 2012 ໂດຍມີທຶນຈົດທະບຽນ 3 ພັນລ້ານກີບ ໃນນີ້ມີຜູ້ປະກອບຮຸ້ນແມ່ນຄົນລາວທັງໝົດຊຶ່ງມີໜ່ວຍບໍລິການ 1 ແຫ່ງ ແລະໃຫ້ການບໍລິການໃນ 9 ຕົວ ເມືອງຢູ່ນະຄອນຫຼວງວຽງຈັນ ແລະກໍ່ມີແຜນທີ່ຈະຂະຫຍາຍການໃຫ້ບໍລິການອອກສູ່ຕ່າງແຂວງຕື່ມອີກໃນຕໍ່ໜ້າເພື່ອຊ່ວຍໃຫ້ປະຊາຊົນສາມາດເຂົ້າເຖິງການບໍລິການດ້ານການເງິນຫຼາຍຂຶ້ນ.

  ທ່ານ ນາງ ຂັນມະນີ ສຸທຳມະວົງ ຊຶ່ງເປັນຜູ້ອຳນວຍການຂອງ ສກຈຮ ປະຕູຄຳໃຫ້ຄວາມກະຈ່າງແຈ້ງວ່າ: ເຫດຜົນທີ່ໄດ້ຮັບແຫຼ່ງທຶນຈາກໂຄງການສາກົນແລະການເຂົ້າເປັນສະມາຊິກກອງທຶນປົກປ້ອງຜູ້ເງິນຝາກທີ່ເປັນສະຖາບັນການເງິນຈຸລະພາກແຫ່ງທຳອິດຂອງ ສປປ ລາວກໍ່ເພື່ອຢາກເກັບກ່ຽວປະສົບການຈາກເຈົ້າຂອງທຶນ ແລະມາດຕະຖານໃນການບໍລິຫານງານ; ເພື່ອຮັບເງິນກູ້ຢືມດອກເບ້ຍຕໍ່າທີ່ຊ່ວຍຫຼຸດຜ່ອນຕົ້ນທຶນ ແລະພ້ອມດຽວກັນກໍ່ສາມາດຕອບສະໜອງເງິນກູ້ດອກເບ້ຍຕໍ່າໃຫ້ກັບລູກ ຄ້າໄດ້ເຊັ່ນກັນ,ພ້ອມທັງເປັນການສ້າງຄວາມເຊື່ອໝັ້ນໃຫ້ກັບສັງຄົມໃນການໃຊ້ບໍລິການຂອງສະຖາບັນການເງິນຂອງພວກເຮົາ,ຕໍ່ກັບແຜນການເຂົ້າຮ່ວມກອງທຶນ SME ນີ້ກໍ່ເພື່ອຕ້ອງການຊ່ວຍລູກຄ້າໃຫ້ໄດ້ຮັບໂອກາດໃນການເຂົ້າເຖິງແຫຼ່ງທຶນທີ່ມີອັດຕາດອກເບ້ຍຕໍ່າ,ນອກນັ້ນລູກຄ້າກໍ່ຈະໄດ້ຮັບການຊ່ວຍເຫຼືອດ້ານເຕັກນິກ ແລະວິຊາການຫຼ້າສຸດໃນວັນທີ 3 ທັນວານີ້, ສກຈຮ ປະຕູຄຳ ໄດ້ຮັບແຫຼ່ງທຶນທີ່ມີອັດຕາດອກເບ້ຍຕໍ່າຈາກໂຄງການ SME ໃນວົງເງິນ 505 ລ້ານກີບ ໂດຍມີເປົ້າໝາຍທີ່ຈະສະໜອງເງິນກູ້ໃຫ້ແກ່ຢູ່ 4 ຂະແໜງການທີ່ປະກອບມີ: ຂະແໜງກະສິກຳ, ການປຸງແຕ່ງ, ຫັດຖະກຳ ແລະການຄ້າ-ການບໍລິການ;ສ່ວນອີກວົງເງິນຈຳນວນ 40 ລ້ານກີບ ຈະນຳໃຊ້ເຂົ້າໃນການສົ່ງເສີມວິຊາການທີ່ຈະເຮັດທົດລອງຢູ່ນະຄອນຫຼວງວຽງຈັນ.

  ທ່ານຫົວໜ້າກຸ່ມຫັດຖະກຳຕໍ່າສາດ, ນາຍບ້ານຄວາຍແດງ ເມືອງຫາດຊາຍຟອງ, ນະຄອນຫຼວງວຽງຈັນ ໃນນາມຜູ້ເຕົ້າໂຮມ, ປຸກລະດົມ ແລະຫວ່າງຜູ້ປະສານງານລະຫວ່າງຜູ້ໃຫ້ທຶນ ແລະ ລູກບ້ານໂດຍກຸ່ມຫັດຖະກຳຕໍ່າສາດທີ່ໄດ້ຮັບເງິນກູ້ດອກເບ້ຍຕໍ່າໃນໄລຍະການເກີດພະຍາດໂຄວິດ-19 ຈາກ  ສກຈຮ ປະຕູຄຳໃນເດືອນກັນຍາ 2020 ຊຶ່ງເລີ່ມຕົ້ນກໍ່ສ້າງກຸ່ມມີ 10 ຄອບຄົວ ໃນວົງເງິນ 1-2 ລ້ານກີບ; ຊຶ່ງໃນເບື້ອງຕົ້ນ ສກຈຮ ປະຕູຄຳໄດ້ຊ່ວຍກຸ່ມຫັດຖະກຳຕໍ່າສາດໃຫ້ຮູ້ການຄິດໄລ່ຕົ້ນທຶນການຜະລິດສາດເບື້ອງຕົ້ນ (ການຕັ້ງລາຄາຂາຍ), ການອອກແບບ ແລະຊອກຕະຫຼາດຈຳໜ່າຍ; ໂດຍມີຄວາມຄາດຫວັງວ່າ: ໃນອະນາຄົດຈະສ້າງເປັນໂອດັອບຂອງບ້ານເພື່ອຄວາມຍືນຍົງ ແລະໃຫ້ປະຊາຊົນມີລາຍຮັບໃຫ້ແກ່ຄອບຄົວປະກອບສ່ວນເຂົ້າໃນການພັດທະນາຄຸນນະພາບຊີວິດຂອງຊາວບ້ານເຮົາ.

 ທ່ານຜູ້ອຳນວຍການ ສກຈຮ ປະຕູຄຳກໍ່ຍັງແຈ້ງຕື່ມອີກວ່າແຜນ ແລະທິດທາງໃນຕໍ່ໜ້າໂດຍຍັງຈະສືບຕໍ່ນະໂຍບາຍໃຫ້ກັບລູກຄ້າໃຫ້ໄດ້ຮັບຜົນປະໂຫຍດຫຼາຍທີ່ສຸດ; ສືບຕໍ່ຊ່ວຍລູກຄ້າຂອງ ສກຈຮ ປະຕູຄຳໃຫ້ດຳເນີນທຸລະກິດໄປໄດ້ແບບຍືນຍົງ ແລະສືບຕໍ່ສ້າງໃຫ້ເປັນສະຖາບັນການເງິນໜຶ່ງທີ່ມີສ່ວນຮ່ວມໃນການໃຫ້ບໍລິການດ້ານການເງິນໃນ ສປປ ລາວ.

----------------

ຂ່າວ: ຣັດສະໝີ ດວງສັດຈະ

ຮູບພາບ: ໜັງສືພິມເສດຖະກິດ-ສັງຄົມ

แชร์