ລາວ ແລະຫວຽດນາມເຊັນສັນຍາຮ່ວມມືເກືອບ 20 ສະບັບ 10 ເດືອນການຄ້າ 2 ປະເທດທະລຸ 7,3 ພັນຕື້ກີບ

 ໂດຍຕອບສະໜອງຕາມການເຊື້ອເຊີນຂອງສະຫາຍ ຫງວຽນ ຊວັນ ຟຸກ, ນາຍົກລັດຖະມົນຕີແຫ່ງສາທາລະນະລັດຄົມນິຍົມຫວຽດນາມ, ສະຫາຍ ທອງລຸນ ສີສຸລິດ, ນາຍົກລັດຖະມົນຕີ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍຄະນະຜູ້ແທນຂັ້ນສູງໄດ້ເດີນທາງເຂົ້າຮ່ວມກອງປະຊຸມຄັ້ງທີ 43 ຂອງຄະນະກໍາມະການ ຮ່ວມມືທະວິພາຄີລະຫວ່າງລັດຖະບານ ແຫ່ງ ສປປ ລາວ ແລະລັດຖະບານແຫ່ງ ສສ ຫວຽດນາມ ປະຈໍາປີ 2021, ໃນລະຫວ່າງວັນທີ 5-6 ທັນວາ 2020, ທີ່ນະຄອນຫຼວງຮ່າໂນ້ຍ, ສສ ຫວຽດນາມ.

 ໃນວັນທີ 6 ທັນວາ 2020, ທີ່ສຳນັກງານລັດຖະບານ, ສະຫາຍນາຍົກ ລັດຖະມົນຕີ ທອງລຸນ ສີສຸລິດ ແລະສະຫາຍນາຍົກລັດຖະມົນຕີ ຫງວຽນ ຊວັນ ຟຸກ ໄດ້ເປັນປະທານຮ່ວມຊີ້ນຳກອງປະ ຊຸມ ຄັ້ງທີ 43 ຂອງຄະນະກໍາມະການ ຮ່ວມມືທະວິພາຄີລະຫວ່າງລັດຖະບານ ແຫ່ງ ສປປ ລາວ ແລະລັດຖະບານແຫ່ງ ສສ. ຫວຽດນາມ ປະຈໍາປີ 2021.

  ໃນກອງປະຊຸມ, ສອງຝ່າຍໄດ້ຮ່ວມກັນຕີລາຄາຜົນຂອງການຈັດຕັ້ງປະຕິບັດບົດບັນທຶກກອງປະຊຸມຄັ້ງທີ 42 ກໍຄືຂໍ້ຕົກລົງວ່າດ້ວຍການຮ່ວມມືປະຈໍາປີ 2020 ແລະພ້ອມກັນປຶກສາຫາລືກ່ຽວກັບທິດທາງການຮ່ວມມືໃນປີ 2021, ໂດຍສອງຝ່າຍໄດ້ຕີລາຄາສູງຕໍ່ບັນດາຜົນສຳເລັດຂອງການຈັດຕັ້ງປະຕິບັດຂໍ້ຕົກລົງວ່າດ້ວຍການຮ່ວມມືໃນປີ 2020 ທີ່ຜ່ານມາ, ຊຶ່ງສາມາດບັນລຸຜົນສຳເລັດໃນຫຼາຍດ້ານເປັນຕົ້ນແມ່ນການຮ່ວມມືດ້ານການເມືອງ-ການຕ່າງປະເທດ; ດ້ານປ້ອງກັນຊາດ-ປ້ອງກັນຄວາມສະຫງົບແມ່ນສືບຕໍ່ໄດ້ຮັບການຈັດຕັ້ງປະຕິບັດເປັນຢ່າງດີ, ມີການເຄື່ອນໄຫວແລກປ່ຽນຄະນະຜູ້ແທນຂັ້ນສູງຂອງສອງພັກ, ສອງລັດຢ່າງເປັນປົກກະຕິ; ດ້ານເສດຖະກິດ-ການຄ້າ ແລະການລົງທຶນ.

  ມາຮອດປະຈຸບັນ, ການລົງທຶນຂອງບັນດາວິສາຫະກິດຂອງຫວຽດນາມຢູ່ລາວລວມມູນຄ່າມີເຖິງ 4,1 ຕື້ໂດລາ ຫຼືປະມານ 36,9 ພັນຕື້ກີບ, ຈັດຢູ່ໃນອັນດັບ 3 ໃນຈໍານວນການລົງທຶນຂອງຕ່າງປະເທດຢູ່ ສປປ ລາວ ແລະມູນຄ່າການຄ້າສອງຝ່າຍໃນ 10 ເດືອນປີ 2020 ບັນລຸໄດ້ 815 ລ້ານໂດລາ ຫຼືປະມານ 7,3 ພັນຕື້ກີບ; ການຮ່ວມມື ໃນຂົງເຂດການສຶກສາ-ບຳລຸງສ້າງກໍໄດ້ຮັບເປີດກວ້າງດ້ວຍຫຼາຍຮູບການ, ປະຈຸບັນຈໍານວນນັກສຶກສາລາວທີ່ກໍາລັງຄົ້ນຄວ້າຮໍ່າຮຽນ ຢູ່ ສສ. ຫວຽດນາມ ມີຫຼາຍ ກວ່າ 16.000 ຄົນ.

  ສຳລັບທິດທາງແຜນການຮ່ວມມືໃນປີ 2021, ສອງຝ່າຍໄດ້ຕົກລົງເຫັນດີເປັນເອກະພາບສືບຕໍ່ຈັດຕັ້ງຜັນຂະຫຍາຍບັນດາເນື້ອໃນຖະແຫຼງການຮ່ວມ ແລະ ຂໍ້ຕົກລົງລະຫວ່າງການນໍາຂັ້ນສູງຂອງສອງປະເທດໃຫ້ເປັນຮູບປະທຳ,ສືບຕໍ່ຮ່ວມມືຢ່າງແໜ້ນແຟ້ນໃນການຮັກສາສະຖຽນລະພາບທາງດ້ານການເມືອງ,ການປ້ອງກັນຊາດ-ປ້ອງ ກັນຄວາມສະຫງົບ ແລະຄວາມເປັນລະບຽບຮຽບຮ້ອຍໃນສັງຄົມຂອງແຕ່ລະປະເທດ;ສ້າງເສັ້ນຊາຍແດນລາວ-ຫວຽດນາມ ໃຫ້ເປັນຊາຍແດນແຫ່ງສັນຕິພາບ, ສະຖຽນລະພາບ, ການຮ່ວມມື ແລະພັດທະນາຮອບດ້ານ, ສະໜັບສະໜູນ ແລະສ້າງຄວາມເຊື້ອໝັ້ນເຊິ່ງກັນ ແລະກັນໃນເວທີພາກພື້ນ ແລະສາກົນ;

  ເຖິງແມ່ນວ່າມູນຄ່າການຄ້າສອງຝ່າຍໃນປີນີ້ບໍ່ສາມາດບັນລຸໄດ້ຕາມຄາດໝາຍທີ່ສອງລັດຖະບານໄດ້ຕົກລົງກັນຍ້ອນການແຜ່ລະບາດຂອງເຊື້ອພະຍາດໂຄວິດ-19, ໃນຊຸມປີຕໍ່ໜ້າ,ສອງຝ່າຍເຫັນດີສູ້ຊົນຊຸກຍູ້ເປົ້າໝາຍມູນຄ່າການຄ້າສອງຝ່າຍໃຫ້ເພີ່ມຂຶ້ນ 10-15% ທຽບໃສ່ປີຜ່ານມາ;ສືບຕໍ່ຜັນຂະຫຍາຍການບົດບັນທຶກຄວາມເຂົ້າໃຈກ່ຽວກັບການຮ່ວມມືດ້ານຄົມມະນາຄົມ ແລະຂົນສົ່ງ, ການຮ່ວມມືພັດທະນາບັນດາໂຄງການໄຟຟ້າຢູ່ລາວ, ເຊື່ອມຕໍ່ລະບົບໄຟຟ້າ ແລະການຊື້-ຂາຍໄຟຟ້າ.

  ຄຽງຄູ່ກັນນີ້, ສອງຝ່າຍກໍຈະພ້ອມກັນສືບຕໍ່ເພີ່ມທະວີການຮ່ວມມື ແລະສ້າງເງື່ອນໄຂເພື່ອເອື້ອອໍານວຍຄວາມສະດວກໃຫ້ແກ່ການຮ່ວມມືດ້ານການຄ້າ, ການລົງທຶນ, ການສຶກສາກໍຄືການພັດທະນາຊັບພະຍາກອນມະນຸດຂອງສອງປະເທດ ແລະການຮ່ວມມືໃນບັນດາຂົງເຂດທີ່ສອງຝ່າຍມີທ່າແຮງບົ່ມຊ້ອນ.

  ພາຍຫຼັງກອງປະຊຸມສອງນາຍົກລັດຖະມົນຕີລາວ ແລະຫວຽດນາມ ໄດ້ຖະແຫຼງຂ່າວຮ່ວມ ແລະຮ່ວມເປັນສັກຂີພິຍານໃນການລົງນາມເອກະສານຮ່ວມມືຂອງສອງປະ ເທດຈຳນວນ 18 ສະບັບ ສອງຝ່າຍໄດ້ຕີລາຄາສູງຕໍ່ຜົນຂອງກອງປະຊຸມຄັ້ງນີ້ຊຶ່ງຈະປະກອບສ່ວນອັນສຳ ຄັນເຂົ້າໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລາວ-ຫວຽດນາມ ທີ່ຢູ່ໃນລະດັບສູງຢູ່ແລ້ວໃຫ້ນັບມື້ນັບກ້າວສູ່ລວງເລິກຫຼາຍຂຶ້ນຊຶ່ງເປັນຂີດໝາຍອັນໃໝ່ໃນປີ 2021.

แชร์