ວາງສະແດງມະຫະກຳບ້ານ, ສິນເຊື່ອ ແລະໄລຟສະໄຕລ

 ວັນທີ 4-6 ທັນວາ 2020 ທີ່ຫໍປະຊຸມແຫ່ງຊາດສະພາການຄ້າ ແລະອຸດສາຫະກຳແຫ່ງຊາດລາວຮ່ວມກັບບໍລິສັດດີຈິຕອລຄລາສສິຟາຍ ຈຳກັດ ຈັດງານວາງສະແດງມະຫະກຳບ້ານສິນເຊື່ອ ແລະໄລຟສະໄຕລ ໂດຍເຂົ້າຮ່ວມທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກຳ ແລະການຄ້າ, ທ່ານ ປອ ຄຳແສນ ສີສະວົງຮອງ ປະທານສະພາການຄ້າ ແລະອຸດສາຫະກຳແຫ່ງຊາດລາວບັນດາຫົວໜ່ວຍທຸລະກິດ ແລະພາກສ່ວນກ່ຽວຂ້ອງເຂົ້າຮ່ວມ.

  ງານມະຫະກຳບ້ານ,ສິນເຊື່ອ ແລະໄລຟສະໄຕລໃນຄັ້ງນີ້ຈະໄດ້ຮວບຮ່ວມເອົາບັນດາບໍລິສັດຫຼາກຫຼາຍຂະແໜງການທີ່ມີຊື່ສຽງທົ່ວປະເທດລາວໄດ້ມາວາງສະແດງເຊັ່ນ: ໂຄງການບ້ານຈັດສັນ, ອຸປະກອນກໍ່ສ້າງ, ຕົບແຕ່ງພາຍໃນ, ທີ່ດິນ, ປະກັນໄພ, ບໍລິການທາງດ້ານການເງິນຮ້ານອາຫານ ແລະອື່ນໆເພື່ອໃຫ້ຜູ້ເຂົ້າຮ່ວມໄດ້ມີທາງເລືອກທີ່ຫຼາກຫຼາຍແລະເປັນເວທີໜຶ່ງທີ່ເປີດໂອກາດໃຫ້ແກ່ຫົວໜ່ວຍທຸລະກິດໄດ້ນຳສະເໜີໂຄງການຂອງຕົນເອງ ແລະຍັງເປັນເວທີອັນດີໃນການປຶກສາຫາລື ແລະແລກປ່ຽນ ຄຳຄິດຄຳເຫັນລະຫວ່າງຜູ້ຊື້ ແລະຜູ້ຂາຍໃນຫຼາຍຂະແໜງການຊຶ່ງຈະເປັນທາງເລືອກທີ່ດີທີ່ສຸດໃຫ້ແກ່ຫົວໜ່ວຍທຸລະກິດ ແລະຜູ້ທີ່ຕ້ອງການຊື້ທີ່ດິນ, ບ້ານ, ສິນເຊື່ອ, ປະກັນໄພ ແລະອື່ນໆພ້ອມດຽວກັນນັ້ນງານດັ່ງກ່າວຍັງຈະມີການຈັດກອງປະຊຸມພົບປະທຸລະກິດ ແລະກອງປະຊຸມສຳມະນາໃນຫົວຂໍ້ຕ່າງໆກ່ຽວກັບບ້ານ,ສິນເຊື່ອ ແລະໄລຟສະໄຕລຊຶ່ງຈະເປັນຜົນດີໃຫ້ແກ່ຫົວໜ່ວຍທຸລະກິດສະໜອງຄວາມຮູ້ໃຫ້ແກ່ຜູ້ປະກອບການ ແລະຍັງເປັນເວທີທີ່ສຳຄັນໃນການສ້າງເຄືອຂ່າຍທຸລະກິດຮ່ວມກັນ, ໄດ້ຮັບຮູ້ເຖິງນະໂຍບາຍຕ່າງໆທີ່ກ່ຽວຂ້ອງໃນຂະແໜງດັ່ງກ່າວ.

  ນອກນັ້ນຍັງເປັນການຊຸກຍູ້ສົ່ງເສີມທຸລະກິດທັງພາຍໃນ ແລະຕ່າງປະເທດທີ່ດຳເນີນທຸລະກິດ ແລະລົງທຶນໃນ ສປປ ລາວ ໃນຫຼາກຫຼາຍຂະແໜງການບໍ່ວ່າຈະເປັນຂະ ແໜງການອະສັງຫາລິມະຊັບ, ການເງິນ, ການພັດທະນາ ແລະການເປັນຢູ່ເພື່ອກະກຽມຮອງຮັບການຂະຫຍາຍຕົວເສດຖະກິດ ແລະສັງຄົມຂອງ ສປປ ລາວ, ທີ່ມີທ່າອ່ຽງນັບມື້ນັບຂະຫຍາຍຂຶ້ນເລື້ອຍໆ.

แชร์