ຮ່ວມມື ຊ່ວຍທຸລະກິດເຂົ້າແຫຼ່ງທຶນ

   ວັນທີ 4 ທັນວາ 2020 ໄດ້ມີພິທີເຊັນບົດບັນທຶກຄວາມເຂົ້າໃຈ (MOU) ລະຫວ່າງສະມາຄົມສົ່ງເສີມຜູ້ປະກອບກິດຈະການວິສາຫະກິດຂະໜາດນ້ອຍ ແລະກາງລາວ ແລະທະນາຄານຫວຽດຕິນລາວທີ່ສຳນັກງານໃຫຍ່ທະນາຄານ ຫວຽດຕິນ ລາວ, ໂດຍຮ່ວມເຊັນບົດບັນທຶກຂອງ ທ່ານ ລິດທິໄກ ພູມມະສັກ, ປະທານສະມາຄົມ  LAOSME ແລະທ່ານ ເລກວັກນາມ ຜູ້ອໍານວຍການໃຫຍ່ທະນາຄານຫວຽດຕິນ ພ້ອມຄະນະ, ສະມາຊິກ ແລະພະນັກງານຂອງທັງສອງຝ່າຍ.

  ຈຸດປະສົ່ງການຮ່ວມມືເພື່ອເສີມຂະຫຍາຍການຮ່ວມມືລະຫວ່າງສອງອົງກອນໃນການຊ່ວຍພັດທະນາເສດຖະກິດຂອງ ສປປ ລາວ ກໍ່ຄືການຊ່ວຍເຫຼືອບັນດາສະມາຊິກຂອງສະມາຄົມໃຫ້ສາມາດເຂົ້າເຖິງແຫຼ່ງທຶນ ແລະການບໍລິການຂອງທະນາຄານຫວຽດຕິນລາວໄດ້ດີຂຶ້ນໂດຍສະເພາະໃນສະພາບຄວາມຫຍຸ້ງຍາກການແຜ່ລະບາດຂອງເຊື້ອພະຍາດຈຸລະໂລກໂຄວິດ-19 ແລະໃນຍຸກສະໄໝທີ່ຕ້ອງຫັນໄປສູ່ເສດຖະກິດດີຈີຕອລ.

   ການຮ່ວມມືໃນຄັ້ງນີ້ແມ່ນເນັ້ນການນໍາໃຊ້ທ່າແຮງທີ່ບົ່ມຊ້ອນຂອງທັງສອງອົງກອນໃນການຊ່ວຍເຫຼືອບັນດາຜູ້ປະກອບກິດຈະການຈຸລະວິສາຫະກິດ, ວິສາຫະກິດຂະ ໜາດນ້ອຍ ແລະກາງ ຫຼືເອີ້ນວ່າMSME ໃນລາວໃຫ້ມີຄວາມອາດສາມາດເຂົ້າສູ່ແຫຼ່ງທຶນໄດ້ສູງຂຶ້ນເພື່ອໃຫ້ສາມາດຂະຫຍາຍທຸລະກິດ ແລະເພີ່ມການບໍລິການໃຫ້ໄດ້ກ້ວາງໄກ, ເຊືອມໂຍງນໍາປະຊາຄົມອາຊຽນ ແລະສາກົນໄດ້.

  ໃນໂອກາດນີ້ສະມາຄົມ LAOSME ກໍ່ໄດ້ຮັບເອົາທະນາຄານ VietinBank ເປັນສະມາຊິກ ແລະ ຜູ້ສະໜັບສະໜູນກິຕິມະສັກໃນຂະແໜງທະນາຄານອົງກອນທຳ ອິດຂອງສະມາຄົມພາຍຫຼັງທີ່ສະມາຄົມໄດ້ສ້າງຕັ້ງແຕ່ວັນທີ 1 ສີງຫາ 2020,ສະມາຄົມ LAOSME ໄດ້ກ່າວຍົກຍ້ອງໃນການປະກອບສ່ວນຂອງທະນາຄານ Vietin Bank ຕໍ່ການພັດທະນາເສດຖະກິດສັງ-ຄົມຂອງລາວຜ່ານມາ ແລະຄວາມຕັ້ງໃຈໃນການຊ່ວຍເຫຼືອບັນດາທຸລະກິດ MSME ໃນອະນາຄົດອັນໃກ້ນີ້.

แชร์