ອຳມະຕະ-ທຄຕລ ກຽມຮ່ວມມືໃຫ້ບໍລິການແກ່ໂຄງການເມືອງໃໝ່

    ທະນາຄານການຄ້າຕ່າງປະເທດລາວມະຫາຊົນ (ທຄຕລ) ແລະບໍລິສັດ ອຳມະຕະຊິດຕີ້ລາວ ຈຳກັດຜູ້ດຽວ ໄດ້ຈັດພິທີເຊັນບົດບັນທຶກຄວາມເຂົ້າໃຈວ່າດ້ວຍການບໍລິ ການທະນາຄານໃຫ້ແກ່ໂຄງການເມືອງໃໝ່ທັນສະໄໝອຳມະຕະຊິດຕີ້ໃນວັນທີ 27 ພະຈິກ 2020 ທີ່ໂຮງແຮມເມືອງແທ່ງ ນະຄອນຫຼວງວຽງຈັນ ໂດຍໃຫ້ກຽດເຂົ້າ ຮ່ວມເປັນສັກຂີພະຍານຂອງທ່ານ ບຸນເຫຼືອ ສິນໄຊວໍຣະວົງ ຮອງລັດຖະມົນຕີກະຊວງການເງິນ, ປະທານສະພາບໍລິຫານ ທຄຕລ; ທ່ານ ວິກົມ ກົມມະດິດ ປະທານກຸ່ມບໍລິສັດອຳມະຕະປະເທດໄທ (ເຂົ້າຮ່ວມແບບທາງໄກ); ຕາງໜ້າ ທຄຕລ ລົງນາມໂດຍທ່ານ ພູຂົງ ຈັນທະຈັກ ຜູ້ອໍານວຍການໃຫຍ່ ທຄຕລ ແລະທ່ານ ວະຣົງ ຕັງປະ ພຶດກູນ ຜູ້ອໍານວຍການໃຫຍ່ບໍລິສັດອຳມະຕະຊິດຕີ້ລາວໂດຍມີພາກສ່ວນກ່ຽວຂ້ອງຂອງທັງ 2 ຝ່າຍເຂົ້າຮ່ວມ.

  ທຄຕລ ເປັນທະນາຄານທີ່ຫຼາກຫຼາຍການບໍລິການເພື່ອອຳນວຍຄວາມສະດວກສະບາຍດ້ານການບໍລິການທະນາຄານໃຫ້ແກ່ສັງຄົມແລະບັນດາຫົວໜ່ວຍທຸລະກິດ, ໃນນີ້ການບໍລິການເພື່ອການເບີກຈ່າຍ-ເງິນໂຄງການເປັນອີກໜຶ່ງການບໍລິການຂອງ ທຄຕລ ທີ່ຜ່ານມາກໍ່ໄດ້ໃຫ້ບໍລິການແກ່ຫຼາຍພາກສ່ວນໃນປະຈຸບັນ, ທຄຕລ ມີເຄື່ອຄ່າຍການບໍລິການທັງໝົດ 20 ສາຂາ, 94 ໜ່ວຍບໍລິການ, 15 ໜ່ວຍແລກປ່ຽນ,ມີຖານລູກຄ້າຜູ້ຊົມໃຊ້ mobile ban king ກວມປະມານ 70% ຂອງທຸລະກຳທັງ ໝົດໃນລາວ.

   ການຮ່ວມມືໃນຄັ້ງນີ້, ທຄຕລ ຈະເປັນຜູ້ໃຫ້ບໍລິການທະນາຄານໃຫ້ແກ່ໂຄງການພັດທະນາເມືອງໃໝ່ທັນສະໄໝອຳມະຕະຊິດຕີ້ທີ່ເປັນໂຄງການລົງທຶນຂະໜາດໃຫຍ່ອີກໂຄງການໜຶ່ງຂອງກຸ່ມບໍລິສັດອຳມະຕະ, ບໍລິສັດທີ່ດຳເນີນທຸລະກິດອະສັງຫາລິມມະຊັບທີ່ມີຊື່ສຽງທີ່ສຸດຂອງປະເທດໄທ ແລະພາກຜື້ນອາຊີຊຶ່ງການໃຫ້ບໍລິການຂອງ ທຄຕລ ໃນໂຄງການດັ່ງກ່າວປະກອບມີການບໍລິການເປີດບັນຊີເງິນຝາກ; ການບໍລິການໂອນເງິນຊຳລະສາມາດປະຕິບັດໄດ້ທາງອີເລັກໂທຼນິກໂດຍຜ່ານຊ່ອງທາງຂອງ ທຄຕລ; ການໃຫ້ບໍລິການໂອນເງິນທັງພາຍໃນ ແລະຕ່າງປະເທດສຳລັບໂຄງການ; ການເບີກຈ່າຍເງິນທົດແທນໃຫ້ແກ່ຜູ້ໄດ້ຮັບຜົນກະທົບຈາກໂຄງການ ແລະລວມໄປເຖິງຄວາມເປັນໄປໄດ້ໃນການສະໜອງແຫຼ່ງທຶນອີງຕາມຄວາມອາດສາມາດ ແລະເງື່ອນໄຂຕົວຈິງຂອງ ທຄຕລ.

ໂຄງການພັດທະນາເມືອງໃໝ່ທັນສະໄໝອຳມະຕະຊິດຕີ້ເປັນໂຄງການໜຶ່ງທີ່ມີຄວາມສຳຄັນໃນການສ້າງແຜນຜັງເມືອງຕາມເຂດລ່ອງທາງລົດໄຟລາວ-ຈີນໂດຍສະເພາະທີ່ແຂວງອຸດົມໄຊ ແລະຫຼວງນໍ້າທາໃຫ້ກາຍເປັນເຂດເສດຖະກິດ ແລະສົ່ງເສີມການລົງທຶນທັງພາຍໃນ ແລະຈາກຕ່າງປະເທດ,ໂຄງການນີ້ຈະຊ່ວຍໃນການພັດທະນາເສດ ຖະກິດ ແລະສັງຄົມໃຫ້ມີຄວາມຈະເລີນຮຸ່ງເຮືອງຂຶ້ນໃນຕໍ່ໜ້າຊຶ່ງເປັນປະໂຫຍດໂດຍລວມຕໍ່ປະເທດ ແລະພໍ່ແມ່ປະຊາຊົນລາວໃນຂອບເຂດທົ່ວປະເທດ.

----------------

ຂ່າວ: ຣັດສະໝີ  ດວງສັດຈະ

ຮູບພາບ: #ຫນັງສືພິມເສດຖະກິດສັງຄົມ

แชร์