ເປີດໃຊ້ອາຄານໃຫຍ່ໃໝ່ ບໍລິສັດກຸ່ມຄຳໄພຊະນະ

  ບໍລິສັດກຸ່ມຄຳໄພຊະນະ ໄດ້ຈັດພິທີເປີດອາຄານສຳນັກງານໃຫຍ່ຫຼັງໃໝ່ ແລະສະເຫຼີມສະຫຼອງຄົບຮອບ 20 ປີ ຢ່າງເປັນທາງການໃນວັນທີ 22 ກຸມພາ 2019 ທີ່ບ້ານທົ່ງສ້າງນາງ ນະຄອນຫຼວງວຽງຈັນ, ໂດຍການເຂົ້າຮ່ວມຂອງທ່ານ ສິນນະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ມີບັນດາລັດຖະມົນຕີ, ການນຳພັກ-ລັດ ແລະ ນັກທຸລະກິດຫຼາກຫຼາຍສາຂາເຂົ້າຮ່ວມ.

  ທ່ານ ຄໍາໄພ ສົມຊະນະ ປະທານບໍລິສັດກຸ່ມຄໍາໄພຊະນະ ກ່າວວ່າ: ການເປີດສຳນັກງານໃຫຍ່ບໍລິສັດກຸ່ມຄຳໄພ ຊະນະແມ່ນເປັນອາຄານສູງ 11 ຊັ້ນດ້ວຍມູນຄ່າກໍ່ສ້າງປະມານ 16 ລ້ານກວ່າໂດລາສະຫະລັດ ຊຶ່ງເປັນສ່ວນໜຶ່ງຂອງຜົນສຳເລັດຈາກການທຸ້ມເທສະຕິປັນຍາກຳລັງຊັບ ແລະກຳລັງແຮງກາຍຂອງຄອບຄົວສົມຊະນະໃນຕະຫຼອດເວລາ 20 ກວ່າປີຜ່ານມາທີ່ເລີ່ມຕົ້ນຈາກຄອບຄົວທຸກຍາກເປັນພໍ່ຄ້ານ້ອຍໆສູ້ຊົນຊີວິດທີ່ແສນຫຍຸ້ງຍາກລຳບາກປະກອບດ້ວຍຕົ້ນທຶນກໍບໍ່ສູງແຕ່ດ້ວຍຄວາມມີນ້ຳໃຈມານະອົດທົນເຮັດແທ້ທຳຈິງຂອງປະທານຈຶ່ງສາມາດໄຕ່ເຕົ້າທຶນຮອນ ແລະເປີດເປັນບໍລິສັດຄຳ ໄພຊະນະ ໃນວັນທີ 22 ພະຈິກ 1998 ແລະກ້າວເປັນກຸ່ມບໍລິສັດໃນເວລາຕໍ່ມາ.

  ປະຈຸບັນບໍລິສັດກຸ່ມຄຳໄພຊະນະຈຳ ກັດຜູ້ດຽວປະກອບມີ 10 ກວ່າກິດຈະການເປັນຕົ້ນແມ່ນການກໍ່ສ້າງເຄຫາສະຖານຂົວທາງ ແລະຊົນລະປະທານ, ຄອນ ກຣີດແຫຼວ ແລະຜະລິດຕະພັນຄອນກຣີດ, ໂຮງງານຜະລິດເຟີນິເຈີ ແລະຜະລິດຕະພັນໄມ້ຕົກແຕ່ງພາຍໃນ ແລະນອກ, ຕອກເຈາະ ແລະອັດເສົາເຂັມທຸກປະເພດ, ບໍລິສັດຄຳໄພຊະນະປູກໄມ້ ແລະຟາມຄົບວົງຈອນ, ການທ່ອງທ່ຽວ ແລະຣີສອດ, ສະຖາບັນການເງິນຈຸລະພາກ ບໍ່ຄໍາຈະເລີນ ຊັບ SNP ແລະກິດຈະການອື່ນໆອີກ. ໂດຍຜົນການດໍາເນີນທຸລະກິດທີ່ປະສົບຜົນສໍາເລັດດັ່ງກ່າວເຮັດໃຫ້ບໍລິສັດກຸ່ມຄໍາໄພຊະນະໄດ້ຮັບການຍ້ອງຍໍໃນຕ່າງໆຈາກພາກລັດ ແລະ ພາກພື້ນ.

  ປະທານບໍລິສັດກຸ່ມຄໍາໄພຊະນະກ່າວຕື່ມວ່າ: ໂດຍປະຕິບັດຕາມທິດຊີ້ນຳຂອງພັກ ແລະໂດຍສະເພາະແມ່ນທິດຊີ້ນຳຂອງນະຄອນຫຼວງວຽງຈັນ ໃນໄລຍະໃໝ່ທາງບໍລິສັດໄດ້ທຸ່ມເທກຳລັງຊັບ, ກຳລັງກາຍ ແລະສະຕິປັນຍາເພື່ອສະໜັບສະໜູນບັນດາແຜນງານ ແລະໂຄງການໃນຂະແໜງການທີ່ເປັນບູລິມະສິດສົ່ງເສີມຂອງລັດຖະບານເປັນຕົ້ນການທ່ອງທ່ຽວທຳມະຊາດແບບອະນຸລັກປະຊາຊົນມີສ່ວນຮ່ວມ, ກະສິກຳສະອາດ, ອຸດສາຫະກຳປຸງແຕ່ງ ແລະ ໂຄງການກໍ່ສ້າງພື້ນ ຖານໂຄງລ່າງຍຸດທະສາດຢູ່ຫຼາຍແຂວງໃນຂອບເຂດທົ່ວປະເທດ. ປະຈຸບັນບໍລິສັດກຸ່ມຄຳໄພຊະນະ ກຳລັງພັດທະນາທຸລະກິດທຸກດ້ານເປັນຕົ້ນທາງການຄ້າ ແລະການລົງທຶນກັບບໍລິສັດໄຮເທຣາ ຈາກ ສປ ຈີນ ແລະປະເທດອື່ນໆໄດ້ນຳເຕັກໂນໂລຊີ ແລະນະວະຕະກຳໃໝ່ມາພັດທະນາທຸລະກິດໃນທຸກດ້ານ, ຍົກສູງຄຸນນະພາບ ແລະມາດຕະຖານການຜະລິດ, ສ້າງບຸກຄະລາກອນມືອາຊີບ ແລະຍົກສູງຂີດຄວາມສາມາດໃນການບໍລິຫານຈັດການທີ່ທັນສະໄໝ ແລະ ມີປະສິດທິພາບ.

  ນອກຈາກນັ້ນໃນຕອນກາງຄືຍັງມີງານລ້ຽງສະເຫຼີມສະຫຼອງຄົບຮອບ 20 ປີ ໃນການດໍາເນີນທຸລະກິດຂອງບໍລິສັດກຸ່ມຄໍາໄພຊະນະ ໂດຍເປັນກຽດເຂົ້າຮ່ວມ ຂອງທ່ານ ທອງລຸນ ສີສຸລິດ ນາຍົກລັດຖະມົນຕີ,  ພ້ອມດ້ວຍການນໍາພັກ-ລັດ ແລະບັນດານັກທຸລະກິດ.

ຂ່າວ: ກິ່ງລັດຕະນະ-ນສພ ເສດຖະກິດ-ສັງຄົມ 

แชร์