ຖວທ ໄຊຍະບູລີລົງຊຸກຍູ້ວຽກງານຮອບດ້ານ

  ໃນວັນທີ 25 ພະຈິກ 2020, ທ່ານ ນາງ ບົວຈັນ ພັນທະວົງຫົວໜ້າພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງ ໄຊຍະບູລີ ພ້ອມດ້ວຍຄະນະໄດ້ລົງຊຸກຍູ້ວຽກງານຮອບດ້ານຢູ່ຫ້ອງການຖະແຫຼງຂ່າວ, ວັດທະນະທຳ ແລະທ່ອງທ່ຽວ ເມືອງໄຊຍະບູລີ, ໂດຍໃຫ້ການຕ້ອນຮັບຢ່າງອົບອຸ່ນຈາກຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະທ່ອງທ່ຽວເມືອງໄຊຍະບູລີພ້ອມພະນັກງານພາຍໃນຫ້ອງການດັ່ງກ່າວ.

 ທ່ານ ພອນພິລຸນ ປີ່ນທິບ ຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະທ່ອງທ່ຽວເມືອງ ໄຊຍະບູລີ ໄດ້ຂຶ້ນຜ່ານບົດສະຫຼຸບວຽກງານຮອບດ້ານໃນໄລຍະ ຜ່ານມາໃຫ້ຮູ້ວ່າ: ຫ້ອງການຖະແຫຼງຂ່າວ, ວັດທະນະທໍາ ແລະທ່ອງທ່ຽວເມືອງໄຊຍະບູລີ ປະກອບມີ 1 ໜ່ວຍພັກ, ມີສະມາຊີກ ພັກ 11 ສະຫາຍ, ຍິງ 5 ສະຫາຍ, ມີພະນັກງານ-ລັດຖະກອນທັງໝົດ15 ທ່ານ, ຍິງ 7 ທ່ານ, ປະກອບມີ 4 ໜ່ວຍງານຄື: ໜ່ວຍງານ ຖະແຫຼງຂ່າວ; ໜ່ວຍງານວັດທະນະທໍາ; ໜ່ວຍງານທ່ອງທ່ຽວ ແລະໜ່ວຍງານບໍລິຫານ, ໃນໄລຍະຜ່ານມາຄະນະໜ່ວຍພັກໄດ້ຖືເອົາ ວຽກງານການເມືອງ-ແນວຄິດເປັນກົກທັງເປັນວຽກທີ່ສຳຄັນສອດຫ້ອຍເຂົ້າໃນທຸກຂົງເຂດວຽກງານແຕ່ລະໜ່ວຍງານ, ໄດ້ເອົາໃຈໃສ່ ຢ່າງຕັ້ງໜ້າໃນການສຶກສາອົບ ຮົມການເມືອງ-ແນວຄິດໃຫ້ສະມາຊິກພັກ, ພະນັກ ງານພາຍໃນຫ້ອງການໄດ້ເຊື່ອມຊຶມ ແລະກໍາແໜ້ນ ເນື້ອໃນນະໂຍບາຍລະບຽບກົດໝາຍມີແນວຄິດອຸ່ນອ່ຽນທຸ່ນທ່ຽງ, ມີຄວາມເຊື່ອໝັ້ນຕໍ່ການນໍາພາຂອງພັກມີຄວາມຫ້າວຫັນຕໍ່ໜ້າທີ່ວຽກງານ, ສາມາດເຮັດໜ້າທີ່ຕາມພາລະບົດບາດຂອງຕົນ ແລະເຮັດສຳເລັດໜ້າທີ່ວຽກງານທີ່ການຈັດຕັ້ງມອບໝາຍໃຫ້ສະ ແດງອອກຄື: ໄດ້ລົງເກັບຂ່າວວຽກດີຄົນເດັ່ນ ແລະເຫດການທີ່ ເກີດຂຶ້ນພາຍໃນເມືອງເປັນປະຈຳ, ສຳເລັດການເກັບກຳສະຖິຕິພາ ຫະນະສື່ມວນຊົນສົ່ງໃຫ້ພະແນກ ຖວທ ແຂວງ, ທົ່ວເມືອງມີລະບົບໂທລະໂຄ່ງນຳໃຊ້ແລ້ວ 77 ບ້ານ ເທົ່າກັບ 98,71% ຂອງບ້ານ ໃນທົ່ວເມືອງ, ສາມາດປະກາດບ້ານວັດທະນະທໍາ ໄດ້ແລ້ວ 73 ບ້ານ ເທົ່າກັບ 93,58%, ມີຄອບຄົວວັດທະນະທຳ 11.476 ຄອບຄົວ ເທົ່າກັບ 75,65%, ປະກາດກົມກົມກອງວັດທະນະທຳໄດ້ແລ້ວ 13 ກົມກອງ ເທົ່າກັບ 44,82%, ທົ່ວເມືອງມີແຫຼ່ງທ່ອງທ່ຽວທັງ ໝົດມີ 27 ແຫ່ງ ໃນນີ້ແຫຼ່ງທ່ອງ ທ່ຽວດ້ານວັດທະນະທໍາມີ 6  ແຫ່ງ, ແຫຼ່ງທ່ອງທ່ຽວທໍາມະຊາດມີ 20 ແຫ່ງ.

  ຈາກນັ້ນຜູ້ເຂົ້າຮ່ວມຍັງໄດ້ພ້ອມກັນຂຶ້ນແລກປ່ຽນບົດຮຽນເຊິ່ງກັນ ແລະກັນເພື່ອເຮັດໃຫ້ວຽກງານຖະແຫຼງຂ່າວ, ວັດທະນະທຳ ແລະທ່ອງທ່ຽວເມືອງໄຊຍະບູລີໄດ້ຮັບການພັດທະນາດີຂຶ້ນ.

----

ຂ່າວ: ສົມພົງ ສີສະຫວັດ 

แชร์