ໂຮມຊຸມນຸມໃຫຍ່ ສະຫຼອງວັນຊາດ 2 ທັນວາ ຄົບຮອບ 45 ປີ

  ຂປລ. ບັນດາການນຳ, ອະດີດການນຳພັກ-ລັດ, ພະເຖລະນຸເຖລະ, ພ້ອມດ້ວຍອົງການຈັດຕັ້ງມະຫາຊົນຕ່າງໆຈຳນວນ 700 ກວ່າທ່ານ ໄດ້ມາເຕົ້າໂຮມກັນຢູ່ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນໃນຕອນເຊົ້າວັນທີ 2 ທັນວາ 2020 ເພື່ອສະເຫຼີມສະຫຼອງວັນສະຖາປະນາສາທາລະນະລັດປະຊາທິປະໄຕ ປະຊາຊົນລາວ ຄົບຮອບ 45 ປີ (2/12/ 1975-2/12/ 2020) ແລະວັນເກີດຂອງປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປະຊາຊົນລາວທັງຊາດຄົບ ຮອບ100 ປີ, ທັງນີ້ກໍເພື່ອເປັນການສະແດງເຖິງຄວາມເຄົາລົບຮັກ, ຄວາມກະຕັນຍູ-ຮູ້ບຸນຄຸນ, ຄຸນງາມຄວາມດີ ແລະຜົນງານອັນໃຫຍ່ຫຼວງຂອງບັນພະບູລຸດລາວທີ່ໄດ້ອຸທິດຕົນເພື່ອປະເທດຊາດ ແລະການປະຕິວັດໃນໄລຍະຜ່ານມາຈົນສາມາດປົດປ່ອຍປະເທດຊາດໄດ້ຢ່າງສົມບູນ ແລະ ສະຖາປະນາເປັນສາທາລະນະລັດ ປະຊາທິປະໄຕປະຊາຊົນລາວ ຈົນເທົ່າທຸກວັນນີ້.

  ໃນໂອກາດດຽວກັນນີ້, ສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານສູນກາງພັກປະທານປະເທດ ແຫ່ງ ສປປ ລາວ ໄດ້ກ່າວສຸນທອນພົດໂດຍມີເນື້ອໃນບາງຕອນສຳຄັນວ່າ: ໃນມື້ນີ້ເປັນມື້ທີ່ມີຄວາມໝາຍຄວາມສຳຄັນຢ່າງຍິ່ງພວກເຮົາຮູ້ສຶກອາໄລອາວອນ ແລະຄິດຄະນຶງຫາປະທານໄກສອນ ພົມວິຫານ ຜູ້ນຳທີ່ແສນເຄົາລົບຮັກ, ລູກຫຼານຜູ້ປະເສີດຂອງປະຊາຊົນລາວ, ຜູ້ນຳພາກໍ່ຕັ້ງ, ຖະນຸບຳລຸງ, ກໍ່ສ້າງພັກ ແລະນຳພາພາລະກິດຕໍ່ສູ້ກູ້ຊາດຜູ້ນຳພາສ້າງຕັ້ງລະບອບໃໝ່ລະບອບປະ ຊາທິປະໄຕ ປະຊາຊົນ ຊຶ່ງໄດ້ຂຽນໄວ້ໃນໜ້າປະຫວັດສາດຍຸກໃໝ່ຂອງຊາດລາວວິລະຊົນ, ພ້ອມກັນນີ້ກໍມີຄວາມອາໄລອາວອນ ແລະ ຈົດຈຳລໍ້າລຶກເຖິງວິລະກຳອັນລໍ້າເລີດ, ຄຸນງາມຄວາມດີ ແລະການເສຍສະຫຼະອັນໃຫຍ່ຫຼວງຂອງບັນດາຜູ້ນຳແຕ່ລະຮຸ່ນ. ພະນັກງານນັກຮົບປະຕິວັດ, ຜູ້ຮັກຊາດ ແລະປະຊາຊົນລາວບັນດາເຜົ່າທີ່ໄດ້ອຸທິດຊີວິດ, ເລືອດເນື້ອ, ເຫື່ອແຮງ, ສະຕິປັນຍາ ແລະວັດຖຸຊັບສິນເພື່ອພາລະກິດປະຕິວັດຕະຫລອດໄລຍະແຫ່ງການປະຕິວັດຊາດ ປະຊາທິປະໄຕ ກໍ່ຄືພາລະກິດແຫ່ງການປົກປັກຮັກສາ ແລະສ້າງສາພັດທະນາປະເທດຊາດເພື່ອຄວາມເປັນເອກະລາດແຫ່ງຊາດ ແລະຄວາມສົມບູນພູນສຸກຂອງລູກຫຼານລາວ.

   ກ່ອນໜ້ານີ້ 45 ປີ ພາຍໃຕ້ກະແສຟອງການລຸກຮື້ຂຶ້ນຂອງປະຊາຊົນລາວພາຍໃຕ້ການນໍາພາຂອງພັກປະຊາຊົນປະຕິວັດລາວ, ອຳນາດການປົກຄອງເກົ່າທີ່ເປັນລູກສະ ໝຸນຂອງພວກລ່າເມືອງຂຶ້ນ ແລະກົງຈັກຂອງລະບອບສັກດີນາຂາຍຊາດໃນລະດັບທ້ອງຖິ່ນຮາກຖານ ທົ່ວປະເທດໄດ້ຖືກທັບມ້າງ,

  ອຳນາດການປົກຄອງໃໝ່ຂອງປະຊາຊົນໄດ້ຮັບການຈັດຕັ້ງຂຶ້ນ, ສ້າງສະພາບແວດລ້ອມ ແລະເງື່ອນໄຂອັນສຸກງອມ “ພັນປີມີເທື່ອໜຶ່ງ” ໃຫ້ແກ່ການຍຶດອຳນາດການປົກຄອງຢ່າງສົມບູນມາສູ່ກຳມືຂອງປະຊາຊົນຜູ້ອອກແຮງງານ, ຈາກນັ້ນ, ພາຍໃຕ້ການນຳພາໂດຍກົງຂອງສູນກາງພັກຊຶ່ງມີປະທານ ໄກສອນພົມ ວິຫານເປັນຫົວໜ້າ, ກອງປະຊຸມໃຫຍ່ຜູ້ແທນປະຊາຊົນທົ່ວປະເທດໄດ້ໄຂຂຶ້ນຢ່າງສະຫງ່າຜ່າເຜີຍໃນວັນທີ 2 ທັນວາ 1975 ເພື່ອປະກາດລົບລ້າງອຳນາດການປົກຄອງເກົ່າ, ສະຖາປະນາສາທາລະນະລັດ ປະຊາທິປະໄຕ ປະຊາຊົນລາວ, ເປີດສັງກາດໃໝ່ແຫ່ງເອກະລາດ, ອິດສະຫຼະພາບ ແລະ ຄວາມເປັນເຈົ້າອັນແທ້ຈິງຂອງປະຊາຊົນລາວບັນດາເຜົ່າຕິດພັນກັບເສັ້ນທາງກ້າວຂຶ້ນສູ່ຈຸດໝາຍສັງຄົມນິຍົມ.

  ປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປະຊາຊົນລາວໄດ້ຢືນຢັນຕະຫຼອດວ່າ: “ວັນທີ 2 ທັນວາ ເປັນວັນໄຊຊະນະປະຫວັດການທີ່ມີຄວາມໝາຍຍຸກສະໄໝອັນເລິກເຊິ່ງ, ເປັນໝາກຜົນລວມຍອດແຫ່ງການຕໍ່ສູ້ປະຕິວັດທີ່ເຕັມໄປດ້ວຍຄວາມເສຍສະຫຼະ, ຄວາມທຸກຍາກລຳບາກຕະຫຼອດຫຼາຍສິບປີຂອງປະຊາຊົນເຮົາພາຍໃຕ້ການນຳພາຂອງພັກກອມມູນິດອິນດູຈີນໃນເມື່ອກ່ອນ ແລະພັກປະຊາຊົນ ປະຕິວັດລາວ ໃນປະຈຸບັນ”. ພວກເຮົາເອກອ້າງ ແລະພາກພູມໃຈທີ່ເຫັນວ່າການພັດທະນາພື້ນຖານວັດຖຸ-ເຕັກນິກໄດ້ບັນລຸໝາກຜົນທີ່ສຳຄັນອັນໃຫຍ່ຫຼວງເປັນຕົ້ນດ້ານພື້ນຖານໂຄງລ່າງເສດຖະກິດ-ສັງຄົມທີ່ສ້າງຄວາມອາດສາມາດຕົວຈິງໃຫ້ປະ ເທດເຮົາເຊື່ອມຈອດກັບບັນດາປະເທດໃກ້ຄຽງ ແລະເຊື່ອມໂຍງເສດຖະກິດເຂົ້າກັບພາກພື້ນ ແລະສາກົນ, ຊຶ່ງສາມາດປົດປ່ອຍປະເທດເຮົາທີ່ເປັນປະເທດບໍ່ມີຊາຍແດນຕິດຈອດກັບທະເລກາຍເປັນປະເທດເຊື່ອມຈອດ-ເຊື່ອມໂຍງກັບປະເທດເພື່ອນບ້ານ ແລະສາກົນ, ອັນພົ້ນເດັ່ນແມ່ນການເຊື່ອມຈອດເສັ້ນທາງລົດ ແລະທາງລົດໄຟລະຫວ່າງ ສປປ ລາວ ກັບປະເທດໃກ້ຄຽງຕາມເລວທາງເສດຖະກິດເໜືອ-ໃຕ້,ຕາເວັນອອກ-ຕາເວັນຕົກຊຶ່ງຖືເປັນທ່າແຮງໃນການບໍລິການທາງຜ່ານຢູ່ປະເທດເຮົາ,ພ້ອມນີ້ພື້ນຖານອຸດສາຫະກຳຂະແໜງພະລັງງານ, ບໍ່ແຮ່, ກະສິກຳ-ປ່າໄມ້, ວິທະຍາສາດ-ເຕັກນິກ-ເຕັກ ໂນໂລຊີຮັບໃຊ້ການຜະລິດ-ການບໍລິການ ແລະບໍລິຫານຄຸ້ມຄອງລັດຕາມທິດຫັນເປັນທັນສະໄໝກໍມີໜໍ່ແໜງ ແລະໄດ້ຮັບການພັດທະນາພົ້ນເດັ່ນຂຶ້ນ.

  ສະຫາຍ ບຸນຍັງ ວໍລະຈິດ ໄດ້ກ່າວຕື່ມວ່າ: ເພື່ອສືບຕໍ່ເສີມຂະຫຍາຍເຂົ້າໃນການປົກປັກຮັກສາ ແລະສ້າງສາພັດທະນາປະເທດຊາດພວກເຮົາຈົ່ງພ້ອມກັນຍຶດໝັ້ນແນວທາງການປ່ຽນແປງໃໝ່ຮອບດ້ານ ແລະ ມີຫຼັກການຂອງພັກຢ່າງເດັດດ່ຽວໜຽວແໜ້ນ; ຍຶດໝັ້ນຖືເອົາການພັດທະນາເສດຖະກິດເປັນໃຈກາງໂດຍຕິດພັນກັບການພັດ ທະນາສັງຄົມ, ການອະນຸລັກຮັກສາວັດທະນະທຳອັນດີງາມຂອງຊາດ ແລະ ການປົກປັກຮັກສາສິ່ງແວດລ້ອມຕາມທິດຍືນຍົງ; ການຫັນລົງກໍ່ສ້າງຮາກຖານການເມືອງ ແລະພັດທະນາຊົນນະບົດຮອບດ້ານຢ່າງແຂງແຮງຕໍ່ເນື່ອງຕາມ 4 ເນື້ອໃນ 4 ຄາດ ໝາຍເປັນມາດຕະຖານຍຸດທະສາດຍາວນານແນໃສ່ປັບປຸງລະບົບການເມືອງຢູ່ຂັ້ນຮາກຖານໜັກແໜ້ນເຂັ້ມແຂງ, ສຸມໃສ່ແກ້ໄຂຄວາມທຸກຍາກຂອງປະຊາຊົນ; ພ້ອມກັນນີ້, ພ້ອມກັນເພີ່ມທະວີຄວາມສາມັກຄີເປັນປຶກແຜນແໜ້ນໜາຂອງທົ່ວປວງຊົນລາວບັນດາເຜົ່າພາຍໃຕ້ການນຳພາຂອງພັກ; ເພີ່ມທະວີຄວາມສາມາດນຳພາ ແລະກຳລັງແຮງຂອງພັກແຕ່ລະຂັ້ນ; ເຊີດຊູບົດບາດ ແລະຄວາມສາມາດນຳພາຂອງພັກໄປຄຽງຄູ່ກັບການຍົກສູງຄວາມເປັນແບບຢ່າງນຳໜ້າຂອງຖັນແຖວສະມາຊິກພັກເດັດດ່ຽວແກ້ໄຂປະກົດການຫຍໍ້ທໍ້ທີ່ເກີດຂຶ້ນຢູ່ໃນການຈັດຕັ້ງຂອງພັກ-ລັດກໍຄືຖັນ ແຖວສະມາຊິກພັກ-ພະນັກງານຢ່າງທັນການ; ແລະຢຶດໝັ້ນແນວທາງການຕ່າງປະເທດສັນຕິພາບ, ເອກະລາດ, ມິດຕະພາບ ແລະການຮ່ວມມືຢ່າງສະເໝີຕົ້ນສະເໝີປາຍ, ເປັນເຈົ້າການ ແລະຕັ້ງໜ້າເຊື່ອມໂຍງກັບພາກພື້ນ ແລະສາກົນ, ເປີດກວ້າງການພົວພັນຮ່ວມມືກັບບັນດາປະເທດໃກ້ຄຽງກໍຄືບັນດາປະເທດປະຊາຄົມອາຊຽນ, ປະເທດ ເພື່ອນມິດໃນໂລກ ແລະອົງການຈັດຕັ້ງສາກົນພິເສດແມ່ນເສີມຂະຫຍາຍສາຍພົວພັນອັນເປັນມູນເຊື້ອ, ຄວາມສາມັກຄີຖານສະຫາຍຮ່ວມອຸດົມການສັງຄົມນິຍົມກັບບັນ ດາປະເທດເພື່ອນມິດຍຸດທະສາດ.

--------------

ຂ່າວ: ມະນີທອນ

ຮູບພາບ: ໜັງສືພິມເສດຖະກິດ-ສັງຄົມ

แชร์