ຫາລືສົ່ງເສີມລົງທຶນໃນລາວ

ກອງປະຊຸມກ່ຽວກັບການລົງທຶນຮ່ວມລະຫວ່າງພາກລັດ ແລະພາກເອກະຊົນ ເພື່ອປຶກສາຫາລືໃນການສົ່ງເສີມການລົງທຶນໃນຂະແໜງການທີ່ສຳຄັນໃນ ສປປ ລາວ ໄດ້ຈັດຂຶ້ນໃນວັນທີ 22 ກຸມພາ 2019 ທີ່ນະຄອນຫຼວງວຽງຈັນ ໂດຍກະຊວງແຜນການ  ແລະ ການລົງທຶນຮ່ວມກັບອົງການເງິນສາ ກົນ IFC.

  ທ່ານ ມະໂນທອງ ວົງໄຊ ຫົວໜ້າ ກົມສົ່ງເສີມການລົງທຶນ, ກະຊວງແຜນ ການ ແລະການລົງທຶນກ່າວວ່າ: ການຈັດກອງປະຊຸມຄັ້ງນີ້, ແມ່ນເພື່ອສົ່ງເສີມການລົງທຶນໃນຂະແໜງການທີ່ສຳຄັນໃນ ສປປ ລາວ ແລະປຶກສາຫາລືແລກປ່ຽນດ້ານນະໂຍບາຍກ່ຽວກັບວຽກງານ PPP ລະຫວ່າງລັດຖະບານ, ຄູ່ຮ່ວມພັດ ທະນາ, ພາກເອກະຊົນ ແລະພາກສ່ວນອື່ນໆ. ສໍາລັບການສົ່ງເສີມຮູບແບບການລົງທຶນ ຮ່ວມລະຫວ່າງພາກລັດ ແລະເອກະຊົນໃນເງື່ອນໄຂທີ່ລັດຖະບານມີຂໍ້ຈຳກັດດ້ານທຶນຮອນຈະສາມາດຊ່ວຍຫຼຸດຜ່ອນພາ ລະແບກຫາບດ້ານງົບປະມານຂອງພາກລັດໄດ້ຢ່າງຫຼວງຫຼາຍເຂົ້າໃນການກໍ່ສ້າງພື້ນຖານໂຄງລ່າງ ແລະການສະ ໜອງການບໍລິການຂອງພາກລັດ. ນອກ ຈາກນັ້ນ, ການລົງທຶນຮ່ວມລະຫວ່າງ ພາກລັດ ແລະເອກະຊົນຍັງສາມາດຍົກປະສິດທິພາບ, ປະສິດທິຜົນຂອງການລົງທຶນໃຫ້ສູງຂຶ້ນຢ່າງເດັ່ນຊັດ, ພ້ອມຫຼຸດຜ່ອນຄວາມຮັບຜິດຊອບຕໍ່ຄວາມສ່ຽງຂອງພາກລັດໃນຕະຫຼອດວົງຈອນໂຄງການຊຶ່ງຈະສາມາດປະກອບສ່ວນເຂົ້າໃນການພັດທະນາເສດຖະກິດ-ສັງຄົມຕາມທິດທາງພັດທະນາແບບຍືນຍົງ ແລະເຕີບໂຕສີຂຽວຢ່າງເປັນຮູບປະທຳ.

  ທ່ານ ທີມມໍທີ ເອດເວີດ ອຸປະທູດ ສະຖານທູດການນາດາປະຈຳລາວກ່າວວ່າ: ຕະຫຼອດໄລຍະ 30 ປີຜ່ານມາການາດາເປັນປະເທດຜູ້ບຸກເບີກໃນການນຳໃຊ້ຮູບແບບຄູ່ຮ່ວມງານລະຫວ່າງພາກລັດ-ເອກະຊົນ. ພວກເຮົາມີຄວາມພູມໃຈທີ່ຈະແລກປ່ຽນການຈັດຕັ້ງປະຕິບັດທີ່ດີທີ່ສຸດຂອງພວກເຮົາເພື່ອໃຫ້ຜູ້ເຂົ້າຮ່ວມຂອງ ສປປ ລາວ ສາມາດນຳໃຊ້ກົນໄກການເງິນທີ່ມີຄວາມຍືນຍົງນີ້ຕໍ່ກັບບັນດາໂຄງການໂຄງລ່າງພື້ນຖານ ແລະໂຄງການພະລັງງານທີ່ສຳຄັນຊຶ່ງຈະສົ່ງເສີມການເຕີບໂຕເສດຖະກິດຂອງປະເທດໃຫ້ຍືນຍົງ.

  ໃນກອງປະຊຸມດັ່ງກ່າວຍັງໄດ້ນໍາເອົາບັນດາຜູ້ຊ່ຽວຊານຈາກການາດາ ແລະ IFC ຜູ້ຕາງໜ້າອາວຸໂສຂອງລັດຖະບານ, ຜູ້ດຳເນີນວຽກງານ  PPP ແລະຜູ້ອອກນະໂຍບາຍ ເພື່ອແລກປ່ຽນ ຄວາມຮູ້ກ່ຽວກັບວິທີການປະຕິບັດວຽກ ງານ PPP ສາມາດເຮັດໃຫ້ວຽກງານນີ້ເປັນເຄື່ອງມືທີ່ມີປະສິດທິພາບໃນການລະ ດົມທຶນຮອນຈາກພາກສ່ວນເອກະຊົນ. ພວກເຂົາໄດ້ນຳສະເໜີການສຶກສາກໍລະນີ ຈາກເສດຖະກິດທີ່ກຳລັງພັດທະນາໃນ ລະດັບສູງກ່ຽວກັບການຈັດໂຄງສ້າງ ແລະການຈັດຕັ້ງປະຕິບັດລະບົບ PPP ໃນຂະແໜງການທີ່ກ່ຽວຂ້ອງ, ນັບແຕ່ ຂະແໜງການຂົນສົ່ງ ແລະພື້ນຖານໂຄງ ລ່າງສາຍສົ່ງໄຟຟ້າໄປຮອດຂະແໜງການທ່ອງທ່ຽວ ແລະການບໍລິການສຸຂະພາບ. ສິ່ງດັ່ງກ່າວນີ້, ຈະສະໜອງຂໍ້ມູນເຂົ້າໃນຂັ້ນຕອນຕໍ່ໄປຂອງລັດຖະບານຊຶ່ງຈະໃຊ້ເປັນບ່ອນອີງໃນການສ້າງແບບ ແຜນ ກ່ຽວກັບ PPP ຂອງຕົນເອງ.

ຂ່າວ: ວົງມະນີ-ນສພ ເສດຖະກິດ-ສັງຄົມ     

แชร์