ບົວລະພາ ເຕີບໃຫຍ່ເຂັ້ມແຂງໃຕ້ການນຳພາ ຂອງພັກລັດ

  ພັກແລະລັດຖະບານ ແຫ່ງ ສປປ ລາວ ຍາມໃດກໍໄດ້ໃຫ້ຄວາມສຳຄັນ ແລະໄດ້ຖືເອົາການພັດທະນາເສດຖະກິດເປັນໃຈກາງ, ສ້າງເງື່ອນໄຂອຳນວຍຄວາມສະດວກໃຫ້ແກ່ກຳລັງການຜະລິດຂະຫຍາຍຕົວຢ່າງແຂງແຮງ, ສ້າງເສດຖະກິດຕະຫຼາດຕາມທິດສັງຄົມນິຍົມ,ສິ່ງດັ່ງກ່າວໄດ້ກາຍເປັນແຮງຍູ້ດັນໃຫ້ຫົວໜ່ວຍທຸລະກິດໃນຂະແໜງການຕ່າງໆມີການເຕີບໃຫຍ່ຂະຫຍາຍຕົວຕະຫຼອດມາໃນນີ້ບໍລິສັດບົວລະພາກໍໄດ້ຮັບການສະໜັບສະໜູນຈາກພັກ-ລັດ ເຮັດໃຫ້ທຸລະກິດມີການເຕີບໃຫຍ່ເຂັ້ມແຂງຂຶ້ນເລື້ອຍໆ.

  ທ່ານ ນາງ ສຸໄພວັນ ທ່ຽງຈັນໄຊ ຮອງຜູ້ອຳນວຍການບໍລິສັດບົວລະພາກະສິກຳ-ປ່າໄມ້ຈຳກັດໃຫ້ສຳພາດວ່າ: ບໍລິສັດບົວລະພາກະສິກຳ-ປ່າໄມ້ຈຳກັດ ໄດ້ດຳເນີນກິດ ຈະການມາແຕ່ປີ 1989 ໂດຍການລົງທຶນຮ່ວມກັນລະຫວ່າງນັກທຸລະກິດລາວແລະສະວິເດັນ, ມາຮອດປະຈຸບັນໄດ້ລົງທຶນໄປແລ້ວ 30 ລ້ານກວ່າໂດລາ ແລະຈະສືບຕໍ່ລົງທຶນຕື່ມອີກ, ໂດຍທາງບໍລິສັດໄດ້ມີໂຮງງານເຟີນີເຈີປຸງແຕ່ງໄມ້ຄົບວົງຈອນຢູ່ບ້ານແສນອຸດົມ ເມືອງໄຊທານີ ນະຄອນຫຼວງວຽງຈັນ ໄດ້ປຸງແຕ່ງຜະລິດຕະພັນສຳເລັດຮູບຫຼາຍລາຍການທີ່ຜະລິດຈາກໄມ້ວິກ, ໄມ້ກະຖິນ ແລະ ໄມ້ສັກເພື່ອຈຳໜ່າຍພາຍໃນ ແລະ ສົ່ງອອກຂາຍຕ່າງປະເທດຫຼາຍກວ່າ 20 ປະເທດໃນທົ່ວໂລກ, ນອກນັ້ນບໍລິສັດຍັງໄດ້ເລີ່ມສ້າງຕັ້ງໂຮງງານໄມ້ອັດຄາດວ່າເດືອນເມສາ 2021 ຈະສຳເລັດຊຶ່ງຜະລິດຕະພັນຈາກໂຮງງານດັ່ງກ່າວແມ່ນຈະສົ່ງອອກໄປຕ່າງປະເທດ 95% ແລະ ຈຳໜ່າຍພາຍໃນປະມານ 5% ພວມກຳລັງສຶກສາຕະຫຼາດ ແລະເບິ່ງລະບຽບການເພື່ອຈະສົ່ງຜະລິດຕະພັນໄມ້ປູກອອກຕ່າງປະເທດ, ໄມ້ອັດແມ່ນເປັນຜະລິດຕະພັນໃໝ່ຂອງບໍລິສັດຜ່ານມາໄດ້ສົ່ງອອກແຕ່ເປັນເຟີນີເຈີ.

  ປະຈຸບັນບໍລິສັດບົວລະພາມີສວນປູກ ຢູ່ 4 ແຂວງຄື: ນະຄອນຫຼວງວຽງຈັນ, ແຂວງວຽງຈັນ, ໄຊຍະບູລີ ແລະແຂວງໄຊສົມບູນ, ມີເນື້ອທີ່ສວນປູກທັງໝົດ 5 ພັນເຮັກ ຕາ ໃນຈຳນວນດັ່ງກ່າວມີຈຳນວນໜຶ່ງປູກແບບມີສ່ວນຮ່ວມກັບປະຊາຊົນ, ເປັນດິນທີ່ສຳປະທານຈາກລັດຖະບານ, ດິນບຸກຄົນ ແລະ ດິນຂອງບໍລິສັດເອງຊຶ່ງການປູກໄມ້ອຸດສາຫະກຳແມ່ນໃຊ້ເວລາ 7 ປີ ຈຶ່ງໄດ້ຕັດໂດຍປະຊາຊົນສາມາດປູກເຂົ້າສັບຫວ່າງ ແລະພືດກະສິກຳໄດ້ຊຶ່ງການປູກໄມ້ແມ່ນເປັນການປູກແບບມີຮອບວຽນຊຶ່ງຕາມແຜນຂອງບໍລິສັດແມ່ນຈະປູກໄມ້ອຸດສາຫະກຳໃຫ້ ໄດ້ 60 ພັນເຮັກຕາ.

  ທ່ານ ນາງ ສຸໄພວັນ ທ່ຽງຈັນໄຊ ກ່າວຕື່ມວ່າ: ໃນໄລຍະຜ່ານມາບໍລິສັດໄດ້ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມ ໂດຍສະເພາະການສ້າງພື້ນ ຖານໂຄງລ່າງ,ເພີ່ມພື້ນທີ່ປ່າສີຂຽວ,ສ້າງລາຍຮັບໃຫ້ປະຊາຊົນທີ່ຢູ່ໃກ້ໂຄງການ,ສ້າງວຽກເຮັດງານທຳ, ສ້າງອາຊີບ ແລະອື່ນໆໃຫ້ກັບປະຊາຊົນຊຶ່ງເນື່ອງໃນວັນສະຖາປະ ນາ ສປປ ລາວ ຄົບຮອບ45 ປີ ( 2 ທັນວາ 1975-2 ທັນວາ 2020) ໃນນາມຕາງໜ້າໃຫ້ບໍລິສັດ, ກຳມະກອນຂໍອວຍພອນໃຫ້ການນຳພັກ-ລັດ ຕະຫຼອດຮອດພໍ່ ແມ່ປະຊາຊົນທຸກທົ່ວໜ້າໃນທົ່ວປະເທດຈົ່ງມີສຸຂະພາບແຂງແຮງ, ປະສົບຜົນສຳເລັດໃນໜ້າທີ່ການງານທຸກປະການ.

แชร์