ຄຸ້ມຄອງຂໍ້ມູນ ແລະປ້ອນຂໍ້ມູນອາຫານທ່ຽງໃນໂຮງຮຽນ

  ວັນທີ 25 ພະຈິກ ຜ່ານມານີ້ ທີ່ຫ້ອງປະຊຸມພະແນກສຶກສາທິການ ແລະ ກີລາແຂວງສາລະວັນໂຄງການອາຫານໂລກໄດ້ຈັດກອງປະຊຸມກ່ຽວກັບການຄຸ້ມຄອງຂໍ້ມູນ ແລະປ້ອນຂໍ້ມູນອາຫານທ່ຽງໃນໂຮງຮຽນໃຫ້ແກ່ 20 ໂຮງຮຽນປະຖົມຕົວແບບເປົ້າໜາຍຂອງໂຄງການອາຫານໂລກໂດຍການເປັນປະທານຂອງທ່ານ ສີລິສັກ ຖະໜອມຮັກຫົວໜ້າພະແນກສຶກສາທິການ ແລະກີລາແຂວງ,ມີທ່ານ ຫຸມພັນ ແກ້ວອຸ່ນຄຳຮອງຫົວໜ້າສູນຮຽນຮ່ວມກະຊວງສຶກສາ ທິການ ແລະກີລາ, ມີບັນດາຮອງຫົວໜ້າຂະແໜງສະຖິຕິ ແລະແຜນທີ່ສູນສະຖິຕິກະຊວງສຶກສາທິການ ແລະກີລາ, ຕາງໜ້າອົງການອາຫານໂລກປະຈຳ 3 ແຂວງພາກໃຕ້, ຕາງໜ້າຫ້ອງການສຶກສາທິການ ແລະກີລາເມືອງ 4 ເມືອງຄື ເມືອງເລົ່າງາມ, ສະໜ້ວຍ, ຕະໂອ້ຍ ແລະເມືອງຕຸ້ມລານເຂົ້າຮ່ວມ.

  ທ່ານ ສີລິສັກ ຖະໜອມຮັກ ໃຫ້ຮູ້ວ່າ: ການນຳໃຊ້ແອັບ (App) ວຽກງານອາຫານທ່ຽງໃນໂຮງຮຽນຖືກພັດທະນາຂຶ້ນດ້ວຍເຕັກໂນໂລຊີໃໝ່ຊຶ່ງສາມາດຮອງຮັບການຄຸ້ມຄອງຂໍ້ມູນຂະແໜງການ ແລະການປ້ອນຂໍ້ມູນໂດຍສະຖານການສຶກສາຕາມຄວາມຕ້ອງການໄລຍະຍາວ, ເປັນເຄື່ອງມືທີ່ອໍານວຍຄວາມສະດວກໃນການຄຸ້ມຄອງຂໍ້ມູນທັງສ້າງເງື່ອນໄຂໃຫ້ໂຮງຮຽນທີ່ມີຄວາມພ້ອມສາມາດປ້ອນຂໍ້ມູນເຂົ້າໃນແທັບເລັດ, ມືຖື ຫຼືອຸປະກອນອື່ນໆຜ່ານອອນລາຍ ແລະນຳໃຊ້ຂໍ້ມູນເພື່ອແກ້ໄຂບັນຫາແຕ່ລະໄລ ຍະໃຫ້ທັນການ,ໃນໂອກາດດັ່ງກ່າວຍັງໄດ້ມອບແທັບເລັດຈຳນວນ 25 ເຄື່ອງໃຫ້ຜູ້ຮັບຜິດຊອບຂັ້ນແຂວງ,ຂັ້ນເມືອງ ແລະໂຮງຮຽນເປົ້າໜາຍລວມມູນຄ່າທັງໜົດ 62,5 ລ້ານກີບ ເພື່ອນຳໃຊ້ເຂົ້າໃນການປ້ອນຂໍ້ມູນຜ່ານແອັບ.

  ໃນກອງປະຊຸມຜູ້ເຂົ້າຮ່ວມຈະໄດ້ຮຽນຮູ້ກ່ຽວກັບຂັ້ນຕອນປະຕິບັດໃນການຕິດຕັ້ງລະບົບຖານຂໍ້ ມູນອາຫານທ່ຽງໃນໂຮງຮຽນ, ການລົງທະບຽນເຂົ້ານຳໃຊ້ລະບົບຖານຂອງຂໍ້ມູນອາຫານທ່ຽງ, ການປ່ຽນລະຫັດຜ່ານຂອງຕົນເອງ, ການປ້ອນຂໍ້ມູນຕິດຕໍ່ພົວພັນ, ການເກັບກໍາຂໍ້ມູນໃນແອັບອາຫານທ່ຽງຊຶ່ງມີ 3 ພາກສ່ວນຄື: ການເກັບຂໍ້ມູນຕາມສົກຮຽນ, ເກັບຂໍ້ມູນໃນແຕ່ລະເດືອນ ແລະເກັບຂໍ້ມູນລາຍວັນ, ການຄົ້ນຫາຂໍ້ມູນ ແລະການລາຍງານຕົວຊີ້ບອກ.

แชร์