ໂລມາຄຳ ກັບການຜະລິດທີ່ມີຄຸນນະພາບມາດຕະຖານສາກົນ ISO 22000

  ໃນວາລະກອງປະຊຸມໃຫຍ່ ຄັ້ງທີ IX ຜູ້ແທນອົງຄະນະພັກແຂວງສະຫວັນນະເຂດທີ່ໄດ້ຈັດຂຶ້ນໃນລະຫວ່າງວັນທີ 20-21 ພະຈິກ 20 20, ທ່ານ ເກຍ ອູ໊ສິດທິເດດ ເຈົ້າ ຂອງໂຮງງານຜະລິດນໍ້າດື່ມ ແລະນໍ້າກ້ອນໂລມາຄຳທັງເປັນນັກພັດ ທະນາດີເດັ່ນແຫ່ງຊາດປະຈຳປີ 2019 ໄດ້ປະກອບຄຳເຫັນໃນທີ່ປະຊຸມໂດຍທ່ານໄດ້ກ່າວໃຫ້ຮູ້ວ່າ: ຂ້າພະເຈົ້າເກີດທີ່ບ້ານທ່າໂຂ່ງ ເມືອງເຊໂປນ ແຂວງສະຫວັນນະເຂດ, ປະຈຸບັນຢູ່ບ້ານລັດຕະນະລັງສີເໜືອ, ນະຄອນໄກສອນ ພົມວິຫານ, ລະດັບການສຶກສາຈົບຊັ້ນ ປ.4 ສະໄໝສົງຄາມ;ໃນປີ 1978 ໄດ້ລິເລີ່ມເຮັດທຸລະກິດຈາກໝໍ້ຂົ້ວກາເຟນ້ອຍໆເປັນຂອງຕົນເອງຈາກນ້ອຍກໍ່ຄ່ອຍໆຂະຫຍາຍຕົວຂຶ້ນມາຊຶ່ງເຮັດຕາມເງື່ອນ ໄຂ ແລະທ່າແຮງທີ່ຕົນມີໃນແຕ່ລະໄລຍະ; ມາຮອດປະຈຸບັນນີ້, ໄດ້ສ້າງຫຼາຍທຸລະກິດແບບຄອບຄົວເປັນຂອງຕົນເອງໃນນັ້ນໂຮງງານຜະລິດນໍ້າດື່ມ ແລະນໍ້າ ກ້ອນໂລມາຄຳກໍ່ແມ່ນກິດຈະການໜຶ່ງຜ່ານມາການຄຸ້ມຄອງບໍລິຫານຈັດການໄດ້ອີງໃສ່ກົດໝາຍແຮງງານເປັນຫຼັກ, ມີອົງການຈັດຕັ້ງມະຫາຊົນເຊັ່ນ: ກໍາມະບານ, ແມ່ຍິງ ແລະມີກົດລະບຽບຢູ່ພາຍໃນເປັນຂອງຕົນເອງ, ໃນ 5 ປີ ຜ່ານມາໂຮງງານແຫ່ງນີ້ຍັງໄດ້ມີສ່ວນຮ່ວມໃນການປະກອບສ່ວນຜັນຂະຫຍາຍມະຕິຂອງກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງຈຶ່ງໄດ້ສືບຕໍ່ສູ້ຊົນພັດທະນາກິດຈະການໃຫ້ມີການຂະຫຍາຍຕົວ, ເຂັ້ມແຂງສາມາດຜະລິດເປັນສິນຄ້າໄດ້ຄື: ຜະລິດໄດ້ຫຼາຍ, ຜະລິດມີຄຸນນະ ພາບ, ລາຄາເໝາະສົມ, ບໍລິການດີ ແລະ ຍັງເປັນທາງເລືອກໃຫ້ຜູ້ບໍລິໂພກ, ຂ້າພະເຈົ້າຢຶດຖືວັດທະນະທຳທາງດ້ານເຕັກນິກເພື່ອການພັດທະນາໄປສູ່ອັນດີກວ່າເກົ່າ, ຖືເອົາໂຮງງານເປັນເໝືອນຄອບຄົວໃຫຍ່ທຳການຜະລິດເພື່ອຜົນປະໂຫຍດລວມໝູ່, ເປັນທີ່ເພິ່ງໄດ້ເຊິ່ງກັນແລະກັນ, ເອົາໂຮງງານເປັນບ່ອນສ້າງສີມືແຮງງານຕົວຈິງ, ຢູ່ກັບທີ່, ໂດຍເນັ້ນໃສ່ຜູ້ໜຶ່ງຕ້ອງຮູ້ຫຼາຍໜ້າວຽກ, ຍົກລະດັບພະນັກງານກໍາມະກອນໃຫ້ມີທັກສະກາຍເປັນຜູ້ຊຳນານງານ, ໄດ້ຄັດ ເລືອກເອົາຜູ້ທີ່ດີເດັ່ນ, ມີຄວາມສາ ມາດສູງເປັນຜູ້ບໍລິຫານຈັດການຢູ່ ພາຍໃນໂຮງງານຂອງຕົນໃຫ້ເຮັດວຽກຄ້າຍຄືຄົນໃນຄອບຄົວໃຫຍ່, ມີຄວາມສາມັກຄີກັນ, ເປັນເຈົ້າການ, ມີຄວາມຮັບຜິດຊອບສູງ, ຖືເອົາປະສິດທິຜົນເປັນຫຼັກສາມາດທົດແທນກັນໄດ້ໃນຍາມມີຄວາມຈຳເປັນພ້ອມກັນນັ້ນກໍ່ຫຼີກເວັ້ນການຳໃຊ້ແຮງງານເຫຼືອບໍ່ພໍ.

 ມາຮອດມື້ນີ້, ຕົນເອງກໍ່ຍັງໄດ້ຮັກສາສິດເປັນເຈົ້າຂອງທຸລະກິດຈຶ່ງໄດ້ມີຄວາມພະຍາຍາມສະແຫວງຫາເຕັກນິກ, ນະວັດຕະກຳອັນໃໝ່ເຂົ້າມານຳໃຊ້ໃນຂະບວນການຜະ ລິດຈຶ່ງເຮັດໃຫ້ໂຮງງານຜະລິດນໍ້າດື່ມ ແລະ ນໍ້າກ້ອນໂລມາຄຳແຫ່ງນີ້ໄດ້ຮັບການຢັ້ງຢືນຂະບວນການຜະລິດທີ່ດີ ແລະ ປອດໄພຈາກອົງການທີ່ກ່ຽວຂ້ອງເປັນຕົ້ນ: ອຢ ມາດຕະຖານແຫ່ງຊາດ, ໄດ້ຈົດ ທະບຽນຊັບສິນທາງປັນຍາ, ມາດຕະຖານສາກົນ ISO 22000 ວ່າດ້ວຍລະບົບການຈັດການຄວາມປອດໄພໃນອາຫານ ແລະນໍ້າດື່ມຊຶ່ງເປັນໂຮງງານແຫ່ງທຳອິດ ແລະແຫ່ງດຽວໃນປະຈຸບັນຢູ່ ສປປ ລາວ ທີ່ໄດ້ຮັບການຢັ້ງຢືນຈາກມາດຕະຖານສາກົນນີ້; ກ່ອນຈະໄດ້ການຮັບຮອງ ແລະ ຢັ້ງຢືນ, ທາງໂຮງງານໄດ້ຈັດຕັ້ງທີມງານເຂົ້າຮັບການຝຶກອົບຮົມເປັນເວລາ 6 ເດືອນ ຈຶ່ງໄດ້ລົງຈັດຕັ້ງປະຕິບັດຕົວຈິງ,ຈາກນັ້ນໄດ້ສະເໜີຂໍການຮັບຮອງໂດຍມີຜູ້ກວດສອບຈາກບໍລິສັດລອຍສຳນັກງານໃຫຍ່ຕັ້ງຢູ່ປະເທດອັງກິດເຂົ້າມາກວດສອບຜ່ານ ແລ້ວ, ບໍລິສັດ ຢູແຄັດ ຈຶ່ງເປັນຜູ້ຮັບຮອງ ອອກໃບຢັ້ງຢືນເລກທີ: ບີຈີເຄ 60 19186 ຕັ້ງແຕ່ວັນທີ 6 ກຸມພາ 2014 ເປັນຕົ້ນມາ, ຈາກນັ້ນທາງໂຮງງານກໍ່ໄດ້ມີການຄວບຄຸມຂະບວນການຜະລິດໃຫ້ສອດຄ່ອງກັບ ຂໍ້ກຳນົດຂອງມາດຕະຖານສາກົນນີ້ຢ່າງເຂັ້ມງວດ, ສະໝໍ່າສະເໝີ ແລະຕໍ່ເນື່ອງ, ໄດ້ມີການກວດສອບໃຫຍ່ປະຈຳປີລະ 1 ຄັ້ງຜະລິດຕະພັນທີ່ໄດ້ມາຈາກຂະບວນການຜະລິດ ແລະ ການຮັບຮອງດັ່ງກ່າວນັ້ນ, ແມ່ນມີຄວາມປອດໄພຕໍ່ຜູ້ບໍລິໂພກ.

  ການລົງທຶນທັງໝົດມາຮອດປີ 2020 ເປັນມູນຄ່າລວມ 80 ຕື້ກີບ ໃນນັ້ນລົງທຶນໃສ່ສິ່ງປຸກສ້າງ ແລະອຸປະກອນການຜະລິດ 50 ຕື້ກີບ, ທີ່ດິນ30 ຕື້ກີບ, ລະບົບການຜະລິດຄົບວົງຈອນຈຶ່ງເຮັດໃຫ້ໂຮງງານແຫ່ງນີ້ມີການຂະຫຍາຍຕົວ ເພີ່ມຂຶ້ນເປັນຕົ້ນໃນປີ 2015 ການຜະລິດນໍ້າດື່ມໄດ້500.000 ລິດ/ວັນ, ປະຈຸບັນຜະລິດນໍ້າດື່ມໄດ້ 7,5  ແສນລິດ/ວັນ, ລາຍຮັບປີ 2015 ປະມານ 8 ຕື້ກວ່າກີບ, ລາຍຮັບໃນໄລຍະ 10 ເດືອນ ປີ2020 ປະມານ 10 ຕື້ກີບ, ໄດ້ມອບພັນທະພາສີ-ອາ ກອນໃຫ້ລັດແລ້ວ 589 ລ້ານກວ່າກີບ, ໄດ້ສ້າງວຽກເຮັດໃຫ້ແກ່ພະ ນັກງານ-ກຳມະກອນທາງກົງໄດ້ 168 ຄົນ, ມີວຽກເຮັດເປັນປະຈຳ, ໄດ້ຮັບເງິນເດືອນພື້ນຖານ, ເງິນ ແຮງງານ, ເງິນອຸດໜູນນະໂຍບາຍຕ່າງໆຈາກເມື່ອກ່ອນ ມີລາຍໄດ້ຂັ້ນຕໍ່າ 1,5 ລ້ານກີບຕໍ່ຄົນຕໍ່ເດືອນ, ປະຈຸບັນນີ້, ມີລາຍໄດ້ຂັ້ນຕໍ່າ 2 ລ້ານ ກີບຕໍ່ຄົນຕໍ່ເດືອນຂຶ້ນໄປ, ໄດ້ເບີກຈ່າຍເງິນເດືອນ, ເງິນແຮງງານໃນ ວັນທີ 1 ຂອງແຕ່ລະເດືອນໂດຍບໍ່ໄດ້ຍົກເວັ້ນວັນເສົາອາທິດ ຫຼືວັນພັກອື່ນໆຈ່າຍຖືກຕາມກຳນົດເວລາ ແລະຄົບຖ້ວນ. ນອກຈາກນັ້ນ, ທາງໂຮງງານຍັງມີນະໂຍບາຍໃຫ້ຢືມເງິນເດືອນ, ເງິນແຮງງານລ່ວງໜ້າ 3 ຄັ້ງໃນເດືອນ, ອະນຸຍາດໃຫ້ຢືມເງິນຊື້ລົດຈັກເພື່ອມາເຮັດວຽກແລ້ວຄ່ອຍຜ່ອນສົ່ງຄືນ, ໄດ້ປະຕິບັດນະໂຍບາຍຕໍ່ພະນັກງານກຳມະກອນໃນເວລາເຈັບເປັນ ຫຼືພັກປິ່ນປົວເປັນຕົ້ນ: ພັກເກີດລູກທາງໂຮງງານໃຫ້ພັກຕາມລະບຽບຂອງກອງທຶນປະ ກັນສັງຄົມ,ແລ້ວຍັງຈ່າຍເງິນອຸດໜູນຕື່ມໃຫ້ອີກ 1-2 ເດືອນຂອງເງິນເດືອນພື້ນຖານຜູ້ກ່ຽວ, ໃຫ້ກວດສຸຂະພາບປະຈຳປີ, ໃນເວລາປະຕິບັດໜ້າທີ່ຖ້າເກີດອຸບັດຕິເຫດ, ເຈັບເປັນ ຫຼືເສຍຊີວິດໃນໜ້າທີ່, ທາງໂຮງງານກໍ່ໄດ້ຮັບຜິດຊອບຄ່າປິ່ນປົວຄ່າໃຊ້ຈ່າຍໃຫ້ທັງໝົດ, ຖ້າເຈັບເປັນພະຍາດຂອງຜູ້ກ່ຽວປິ່ນປົວຍາວນານ, ໂຮງງານກໍ່ຈ່າຍເງິນເດືອນພື້ນຖານໃຫ້ 1-6 ເດືອນ ເພື່ອການປິ່ນປົວ, ພະນັກງານ, ກຳມະກອນມີສິດພັກໄດ້ 4 ວັນ/ເດືອນ ແລະວັນພັກທາງລັດຖະການອື່ນໆຖ້າວ່າພະນັກງານ, ກຳມະ ກອນມີຄວາມສະໝັກໃຈມາເຮັດວຽກໃນມື້ພັກດັ່ງກ່າວ, ທາງໂຮງງານກໍ່ໄດ້ຈ່າຍເງິນລ່ວງເວລາໃຫ້ຕາມທີ່ໄດ້ກຳນົດໄວ້ໃນກົດລະບຽບຂອງໂຮງງານເຮັດໃຫ້ພະນັກງານ, ກຳມະກອນມີຄວາມເພິ່ງພໍໃຈໃນການອອກແຮງງານຢູ່ບ່ອນນີ້, ຊີວິດການເປັນຢູ່ດີຂຶ້ນຢູ່ພາຍໃນໂຮງງານມີຄວາມອົບອຸ່ນ ແລະສະຫງົບສູງ, ນອກນັ້ນຍັງໄດ້ສ້າງວຽກເຮັດໃຫ້ຕົວແທນຜູ້ຈໍາໜ່າຍຜະລິດຕະພັນໄດ້ຫຼາຍຮ້ອຍຄົນມີອາຊີບ, ມີລາຍຮັບເປັນປົກກະຕິ.

ມາຮອດມື້ນີ້, ຕົນເອງມີຄວາມຮູ້ສຶກພາກພູມໃຈທີ່ສຸດທີ່ຍັງຮັກສາສິດເປັນເຈົ້າຂອງທຸລະກິດເຮັດການຜະລິດແບບຄອບຄົວຫຼາຍບ່ອນເປັນຂອງຕົນເອງໄດ້ດັ່ງຄວາມຕັ້ງໃຈ, ໃນຈຸດນີ້,ຂ້າພະເຈົ້າຄິດວ່າ, ເປັນເງື່ອນໄຂໜຶ່ງທີ່ພາໃຫ້ໄດ້ມີສ່ວນເຂົ້າຮ່ວມນຳອົງການຈັດຕັ້ງພັກ-ລັດຂັ້ນຕ່າງໆໃນການຊ່ວຍເຫຼືອສັງຄົມບ່ອນເລັກບ່ອນໜ້ອຍຢູ່ຕະຫຼອດມາ, ພ້ອມຍັງໄດ້ຮັບການ ຍ້ອງຍໍສັນລະເສີນຈາກອົງການ ຈັດຕັ້ງຂອງພັກລັດຫຼາຍຂັ້ນ, ໄດ້ຮັບ ລາງວັນດີເດັ່ນຫຼາຍລາງວັນຢູ່ພາຍ ໃນປະເທດ ແລະຢູ່ຕ່າງປະເທດເປັນຕົ້ນ: ໃນປີ 2015 ໄດ້ຮັບກຽດຈາກທ່ານປະທານປະເທດປະດັບຫຼຽນນາມມະຍົດພັດທະນາດີເດັ່ນແຫ່ງຊາດ ແລະໄດ້ຮັບປະດັບຫຼຽນໄຊຫຼາຍປະເພດ, ຫຼາຍຊັ້ນ, ໃບ ຍ້ອງຍໍ, ໃບສັນລະເສີນຈາກອົງການຈັດຕັ້ງຂອງພັກລັດ, ຈາກມື້ນັ້ນມາຮອດມື້ນີ້ເປັນເວລາ 5 ປີແລ້ວ, ຕົນເອງຍາມໃດກໍ່ໄດ້ຍົກສູງຮູ້ສຶກສຳນຶກໃນກຽດແຫ່ງນາມມະຍົດອັນສູງສົ່ງດັ່ງກ່າວຢູ່ສະເໝີມາໂດຍບໍ່ໄດ້ລົດລະໃນການພັດທະນາທຸລະກິດຂອງຕົນເອງ ແລະຍັງມີນໍ້າໃຈເສຍສະຫຼະຕາມທ່າແຮງທີ່ຕົນມີຢູ່ເຂົ້າໃນການປະກອບສ່ວນຊ່ວຍ ເຫຼືອສ້າງສາພັດທະນາຮ່ວມກັບອົງການຈັດຕັ້ງຂອງພັກ-ລັດ ແລະສັງຄົມ.

  ຜົນງານລວມທັງໝົດທີ່ໄດ້ກ່າວມາຂ້າງເທິງນີ້, ຂ້າພະເຈົ້າຂໍຢັ້ງຢືນດ້ວຍຄວາມບໍລິສຸດໃຈວ່າ: ໄດ້ມາຍ້ອນແນວທາງຂອງພັກ, ນະໂຍບາຍການຄຸ້ມຄອງຂອງລັດທີ່ມີປະ ສິດທິຜົນໃນແຕ່ລະໄລຍະ, ເປັນເງື່ອນໄຂພື້ນຖານທີ່ອຳນວຍຄວາມສະດວກໃນການເຄື່ອນໄຫວດຳເນີນທຸລະກິດຂອງຂ້າພະເຈົ້າໄດ້ມີການຂະຫຍາຍຕົວດ້ວຍດີຕະຫຼອດມາ; ຜົນປະໂຫຍດລວມທີ່ກ່າວມານັ້ນຂ້າພະເຈົ້າໃນນາມຜູ້ດໍາເນີນທຸລະກິດການຜະລິດເປັນສິນຄ້າ, ສ້າງວຽກເຮັດງານທຳ, ຊ່ວຍຫຼຸດຜ່ອນຄວາມທຸກຍາກ, ເປັນການປະກອບສ່ວນເຂົ້າໃນວຽກງານການພັດທະນາເສດຖະກິດສັງຄົມຂອງແຂວງ, ໃນຕໍ່ໜ້າຫວັງຢ່າງຍິ່ງວ່າຈະໄດ້ຮັບການຊີ້ນຳ-ນຳພາ ຈາກອົງການຈັດຕັ້ງພັກ-ລັດ; ເວົ້າ ສະເພາະອົງຄະນະພັກສະໄໝທີ IX ຂອງແຂວງສະຫວັນນະເຂດ.

---------------

ຂຽນໂດຍ: ຂ່າວສະຫວັນ

ຮູບພາບ: #ຫນັງສືພິມເສດຖະກິດສັງຄົມ

แชร์