ໂຮງຮຽນເຕັກນິກອັດຕະປືມອບໃບປະກາສະນີຍະບັດໃຫ້ນັກຮຽນ

  ໃນວັນທີ 19 ພະຈິກ 2020 ໂຮງຮຽນເຕັກນິກວິຊາຊີບແບບປະສົມ ແຂວງອັດຕະປື ໄດ້ຈັດພິທີມອບຮັບໃບປະກາສະນີຍະບັດໃຫ້ນັກຮຽນຈັບຊັ້ນຕົ້ນລະດັບ 1 ໄລຍະ 3 ເດືອນ ຂຶ້ນທີ່ໂຮງຮຽນດັ່ງກ່າວ, ໂດຍການເຂົ້າຮ່ວມຂອງທ່ານ ແສງສັກ ຜ່າມະນີວົງ ຮອງຫົວໜ້າຂະແໜງຄຸ້ມຄອງປ່າສະຫງວພະແນກກະສິກຳ ແລະປ່າໄມ້ແຂວງອັດຕະປື,ມີທ່ານ ຖາວອນ ສຸກດາວົງ ອຳນວຍການໂຮງຮຽນເຕັກນິກວິຊາຊີບແບບປະສົມແຂວງອັດຕະປື, ມີຄູ-ອາຈານ ແລະນັກຮຽນພ້ອມດ້ວຍແຂກຖືກເຊີນເຂົ້າຮ່ວມ.

  ພິທີໄດ້ຜ່ານບົດສະຫຼຸບການຮຽນການສອນຫຼັກສູດວິຊາຊີບຊັ້ນຕົ້ນລະດັບ 1 ສົກ 2020–20 21 ຊຶ່ງໃຊ້ເວລາ 3 ເດືອນ ມີນັກຮຽນ 53 ຄົນ ຍິງ 24 ຄົນ ມີ 4 ສາຂາອາຊີບຮຽນຄື: ສາຂາອາຊີບຕັດຫຍິບສິ້ນ ແລະເສື້ອມີນັກຮຽນ 12 ຄົນ, ສາຂາອາຊີບສ້ອມແປງເຄື່ອງຈັກຂະໜາດນ້ອຍມີ  25 ຄົນ ສາຂາອາຊີບປຸງແຕ່ງອາຫານລາວ ມີ 7 ຄົນ, ສາຂາວິຊາປູກຝັງມີ 9 ຄົນ ໄດ້ຜ່ານການຮຽນພາກທິດສະດີ 10% ແລະ ພາກປະຕິບັດຕົວຈິງ 90% ມີຊົ່ວໂມງການຮຽນທັງໝົດ 480 ຊົ່ວໂມງ ພາກທິດສະດີ 48 ຊົ່ວໂມງ, ພາກປະຕິບັດຕົວຈິງ 432 ຊົ່ວໂມງ ຜ່ານການຮຽນການສອນໃນຄັ້ງນີ້ມີນັກຮຽນທີ່ໄດ້ຮັບໃບປະກາສະນີຍະບັດທັງໝົດ 47 ຄົນ, ຍິງ 23 ຄົນ,ຫຼັກສູດການຮຽນຄັ້ງນີ້,ໂດຍໄດ້ຮັບການສະໜັບສະໜູນງົບປະມານຈາກໂຄງການອະນຸລັກຊີວະນາໆ ພັນຕາມແນວທາງເຊື່ອມຕໍ່, ຊຶ່ງທຶນດັ່ງກ່າວແມ່ນໄດ້ນໍາໃຊ້ເຂົ້າໃນການຮຽນການສອນກໍ່ຄືຊື້ວັດຖຸອຸປະກອນຮັບໃຊ້ໃນພາກທິດສະດີ ແລະພາກປະຕິບັດຕົວຈິງການໄປທັດສະນະ, ທີ່ພັກເຊົາ ແລະເບ້ຍລ້ຽງນັກຮຽນ.

  ໃນໂອກາດນີ້ ທ່ານ ແສງສັກ ຜ່າມະນີວົງ ກໍ່ໄດ້ເປັນກຽດກ່າວມອບໃບປະກາສະນີຍະບັດໃຫ້ນັກຮຽນຈຳນວນ 47 ຄົນ ພ້ອມທັງເນັ້ນໜັກໃຫ້ນັກຮຽນທີ່ໄດ້ຈົບຫຼັກສູດການຮຽນຈົ່ງໄດ້ນຳເອົາຄວາມຮູ້ທີ່ໄດ້ສຶກສາຮໍ່າຮຽນໄປຈັດຕັ້ງປະຕິບັດ ແລະນຳໃຊ້ເຂົ້າໃນຊີວິດປະຈຳວັນເພື່ອສ້າງອາຊີບຄົງທີ່ ແລະແກ້ໄຂຊີວິດການເປັນຢູ່ຂອງຄອບຄົວພ້ອມທັງສ້າງເງື່ອນໄຂສ້າງລາຍຮັບໃຫ້ຕົນເອງເພື່ອນຳຄອບຄົວຫຼຸດພົ້ນອອກຈາກຄວາມທຸກຍາກເທື່ອລະກ້າວ.

---------

ຂ່າວ: ວັດທະນາ ຂ.ອັດຕະປື

ຮູບພາບ: ໜັງສືພິມເສດຖະກິດ-ສັງຄົມ

แชร์