ຜົນກອງປະຊຸມໃຫຍ່ໜ່ວຍພັກພະແນກຄຸ້ມຄອງສຳມະໂນຄົວ ແລະກໍ່ສ້າງຮາກຖານ

  ກອງປະຊຸມໃຫຍ່ຄັ້ງທີ III ຂອງໜ່ວຍພັກພະແນກຄຸ້ມຄອງສຳມະໂນຄົວ ແລະກໍ່ສ້າງຮາກຖານກອງບັນຊາການ ປກສ ເມືອງຄໍາເກີດ ແຂວງບໍລິຄຳໄຊ ໄດ້ຈັດຂຶ້ນໃນວັນທີ 24 ພະຈິກ 2020ທີ່ກອງບັນຊາການ ປກສ ເມືອງຄໍາເກີດພາຍໃຕ້ການເປັນປະທານໂດຍສະຫາຍ ພັທ ດາພອນ ໄພມະນີ ຮັກສາການເລຂາໜ່ວຍພັກພະແນກຄຸ້ມຄອງສຳມະໂນຄົວ ແລະກໍ່ສ້າງຮາກຖານ, ມີສະຫາຍ ວິໄລ ສີສະມຸດ ຄະນະປະຈຳພັກເມືອງ, ປະທານກວດກາພັກ-ລັດເມືອງຄຳເກີດ, ມີຫົວໜ້າກອງບັນຊາການ ປກສ ເມືອງ, ຄະນະປັບປຸງຂັ້ນເມືອງ, ແຂກຖືກເຊີນ ແລະສະມາຊິກພັກສົມບູນ-ສຳຮອງເຂົ້າຮ່ວມ.

 ສະຫາຍ ດາພອນ ໄພມະນີ ກ່າວວ່າ: ໜ່ວຍພັກພະແນກຄຸ້ມຄອງສຳມະໂນຄົວ ແລະກໍ່ສ້າງຮາກຖານເປັນໜ່ວຍພັກໜຶ່ງທີ່ຂຶ້ນກັບຄະນະພັກຮາກຖານກອງບັນຊາການ ປກສ ເມືອງຄຳເກີດ ແລະເປັນເສນາທິການໃຫ້ແກ່ຄະນະພັກຮາກຖານໃນການຄຸ້ມຄອງສຳມະໂນຄົວ ແລະກໍ່ສ້າງຮາກຖານລວມທັງ 8 ກຸ່ມບ້ານ, ພະນັກງານສະມາຊິກພັກສ່ວນຫຼາຍລົງປະຈຳການຢູ່ແຕ່ລະກຸ່ມບ້ານທົ່ວເມືອງເພື່ອເຮັດໜ້າທີ່ການເມືອງ ແລະຮັກສາຄວາມສະຫງົບ, ໜ່ວຍພັກມີສະມາຊິກພັກທັງໝົດ 73 ສະຫາຍ, ຍິງ 8 ສະຫາຍ, ສະມາຊິກພັກຕະຫຼອດຮອດພະນັກງານ-ນັກຮົບທຸກສະຫາຍໄດ້ນຳເອົາແນວທາງນະໂຍບາຍຂອງພັກ, ກົດໝາຍຂອງລັດ, ມະຕິຄໍາສັ່ງ, ຂໍ້ກຳນົດລະບຽບການ ແລະບັນດານິຕິກໍາມາເຜີຍແຜ່ເຊຶ່ອມຊຶມໃຫ້ກໍາລັງປ້ອງກັນຄວາມສະຫງົບ ແລະພໍ່ແມ່ປະຊາຊົນບັນດາເຜົ່າໄດ້ຮັບຮູ້ ແລະເຂົ້າໃຈຈຸດປະ ສົງກໍ່ເພື່ອເດັດດ່ຽວຕໍ່ສູ້ຕ້ານກັບກົນອຸບາຍຂອງພວກສັດຕູ ແລະກຸ່ມຄົນບໍ່ດີຢູ່ບັນດາກຸ່ມບ້ານໃຫ້ມີຄວາມສະຫງົບໂດຍພື້ນຖານ, ສະມາຊິກພັກທຸກສະຫາຍມີຄວາມເຊື້ອໝັ້ນຕໍ່ແນວທາງຂອງພັກ, ມີຄວາມສາມັກຄີເປັນເອກະພາບສູງຕໍ່ການຊີ້ນຳ-ນຳພາຂອງຄະນະພັກ, ໃນໄລຍະ 5 ປີຜ່ານມາໜ່ວຍພັກສາມາດຮັບຮອງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນໃນປີ 2019 ແລະຍັງໄດ້ແກ້ໄຂປາກົດການຫຍໍ້ທໍ້ອື່ນໆອີກ.

  ກອງປະຊຸມຄັ້ງນີ້ໄດ້ເລືອກເອົາຄະນະພັກຊຸດໃໝ່ໃນນີ້ຕົກລົງເລືອກເອົາສະຫາຍ ພັທ ດາພອນ ໄພມະນີ ເປັນເລຂາໜ່ວຍພັກ, ສະຫາຍ ພັຕ ໄພມະນີ ກຸລະວົງສາເປັນຮອງເລຂາ ແລະສະຫາຍ ພັຕ ນາງ ຈັນຫອມ ຍົດບຸນເຮືອງ ເປັນກຳມະການຜູ້ກວດກາໜ່ວຍພັກ.

 ຕອນທ້າຍກອງປະຊຸມສະຫາຍ ວິໄລ ສີສະມຸດ ໄດ້ໂອ້ລົມໂດຍຍ້ອງຍໍຊົມເຊີຍຕໍ່ກັບຜົນງານດີເດັ່ນທີ່ຍາດໄດ້ມາ ແລະຮຽກຮ້ອງມາຍັງຄະນະພັກຊຸດໃໝ່ທີ່ໄດ້ຮັບໜ້າທີ່ອັນໜັກໜ່ວງໃຫ້ມີຄວາມຮັບຜິດຊອບສູງຕໍ່ໜ້າທີ່ການເມືອງຂອງພັກເປັນຕົ້ນໃຫ້ສ້າງຄວາມສາມາດໃນການຊີ້ນຳ-ນຳພາ, ສຶກສາອົບຮົມບັນດາສະມາຊິກພັກ-ສ້າງພະນັກ ງານໃຫ້ມີຄວາມຮັກຊາດ, ສ້າງຄວາມເອກະພາບພາຍໃນຄະນະ, ມີຄວາມໂປ່ງໃສ, ຍຸຕິທຳ, ສ້າງຄວາມເຊື່ອໝັ້ນພາຍໃນພັກ, ເອົາໃຈໃສ່ວຽກງານກວດກາ-ແກ້ໄຂບັນ ຫາຫາງສຽງຂອງສັງຄົມ,ບັນຫາປາກົດການຫຍໍ້ທໍ້ຕ່າງໆ,ເພີ່ມຄວາມສາມັກຄີຊ່ວຍເຫຼືອເຊິ່ງກັນ ແລະກັນ, ຊີ້ນຳ-ນຳພາໜ່ວຍພັກໃຫ້ມີຄວາມເຂັ້ມແຂງຂຶ້ນໄປເລື້ອຍໆ.

 

แชร์