ຮັບຮອງ 7 ບ້ານພັດທະນາດ້ານແຮງງານ

 ວັນທີ 25 ພະຈິກ 2020 ຫ້ອງການແຮງງານ ແລະສະຫວັດດີການສັງຄົມ ເມືອງຫົງສາ ແຂວງໄຊຍະບູລີ ໄດ້ຈັດພິທີປະກາດຮັບຮອງເອົາ 7 ບ້ານເປັນບ້ານ ພັດທະ ນາດ້ານແຮງງານ ແລະສະຫວັດດີການສັງຄົມທີ່ສະໂມສອນຂອງເມືອງເຂົ້າຮ່ວມຂອງທ່ານ ນາງ ດາວວິນ ລາດຊະກິດ ຮອງເລຂາພັກເມືອງຫົງສາ, ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າ-ຮອງຫົວໜ້າ ຫ້ອງການອ້ອມຂ້າງເມືອງ, ມີພະນັກງານຂອງເມືອງ, ຂະແໜງການທີ່ກ່ຽວຂ້ອງພ້ອມດ້ວຍນາຍບ້ານ 7 ບ້ານຄື: ບ້ານຈອມແຈ້ງ, ບ້ານໂພນໄຊ, ບ້ານໂພນສູງ, ບ້ານສີບຸນເຮືອງ, ບ້ານແທ່ນຄຳ, ບ້ານນາປຸ່ງ ແລະ ບ້ານປາກຫ້ວຍຍາງເຂົ້າຮ່ວມ.

  ໃນພິທີ ທ່ານ ແພງ ຫົງຄຳ ນາຍບ້ານໆ ສີບຸນເຮືອງ ຕາງໜ້າອົງການປົກຄອງບ້ານ ແລະປະຊາຊົນບັນດາເຜົ່າ 7 ບ້ານດັ່ງກ່າວກໍ່ໄດ້ຂຶ້ນຜ່ານບົດລາຍງານການປະເມີນ ແລະ ແຜນການສ້າງຄອບຄົວບ້ານພັດທະນາດ້ານແຮງງານ ແລະສະຫວັດດີການສັງຄົມໃນຕໍ່ໜ້າ, ຊຶ່ງຜົນການຕີລາຄາຕາມມາດຖານປະເມີນຄອບຄົວ, ບ້ານພັດທະນາດ້ານແຮງງານ ແລະ ສະວັດດີການສັງຄົມຢູ່ 7 ບ້ານໄດ້ດັ່ງນີ້: ສະມາຊິກຄອບຄົວທີ່ມີອາຍຸແຕ່ 14-60 ປີ ໄດ້ຮັບການຝຶກອົບຮົມ, ຮຽນຮູ້ລະບຽບກົດໝາຍດ້ານແຮງ ງານ ແລະ ສະຫວັດດີການສັງຄົມກວມອັດຕາ 80% ຂຶ້ນໄປມີ 5.720 ຄົນ, ຍິງ 3.133 ຄົນ ກວມເອົາ 98%; ກຳລັງແຮງງານພາຍໃນຄອບຄົວທີ່ມີອາຍຸ 14-60 ປີ ມີວຽກເຮັດງານທຳໃດໜຶ່ງທີ່ຖືກຕ້ອງຕາມລະບຽບກົດໝາຍມີ 2.491 ຄົນ, ຍິງ 1.718 ຄົນ ກວມເອົາ 95%; ແຕ່ລະຄອບຄົວໄດ້ເຂົ້າເປັນສະມາຊິກກອງທືນຊ່ວຍເຫຼືອເຊີ່ງກັນ ແລະກັນເປັນຕົ້ນແມ່ນການຊ່ວຍເຫຼືອຜູ້ເສຍຊີວີດຢູ່ພາຍໃນບ້ານ, ກອງທຶນຊ່ວຍເຫຼືອຄອບຄົວທີ່ປະສົບກັບໄພພິບັດ,ກອງທຶນພັດທະນາບ້ານ, ເປັນສະມາຊິກກອງທຶນປະກັນສັງຄົມ 1.234 ຄົນ, ຍິງ 603 ຄົນ, ພາກວິສາຫະກິດ 2.634 ຄົນ ຍິງ 903 ຄົນ ກວມເອົາ 97%; ປະເມີນບ້ານພັດທະນາດ້ານແຮງ ງານ ແລະສະຫວັດດີການສັງຄົມຕາມ 6 ມາດຖານ ໄດ້ດັ່ງນີ້: ປະຊາຊົນພາຍໃນບ້ານມີອາຍຸແຕ່ 14-60ປີ ໄດ້ຮັບການຝຶກອົບຮົມ,ຮຽນຮູ້ລະບຽບກົດໝາຍດ້ານແຮງ ງານ ແລະສະຫວັດດີການສັງຄົມກວມເອົາອັດຕາ 80% ຂຶ້ນໄປມີ 8.529 ຄົນ, ຍິງ 4.040 ຄົນ ກວມເອົາ 98%; ມີຜູ້ຮັບຜິດຊອບວຽກງານແຮງງານ ແລະສະຫວັດດີການສັງຄົມກວມເອົາ 99%; ມີປຶ້ມບັນທຶກສະຖິຕິດ້ານແຮງງານ ແລະສະຫວັດດີການສັງຄົມທີ່ເປັນລະບົບໄດ້ 95%; ກຳລັງແຮງງານພາຍໃນບ້ານທີ່ມີອາຍຸ 14-60 ປີ ມີວຽກເຮັດງານທໍາຕາມຄວາມຮູ້ຄວາມສາມາດ ແລະຝຶກອົບຮົມວິຊາຊີບໃດໜຶ່ງ ຫຼືຜ່ານລະບົບກໍ່ສ້າງຕໍ່າສຸດ 25% ຂຶ້ນໄປ ແລະຖືກຕ້ອງຕາມລະບຽບກົດ ໝາຍມີ 5.720 ຄົນ ຍິງ 3.133 ຄົນ; ມີການຄຸ້ມຄອງແຮງງານພາຍໃນ ແລະແຮງງານຕ່າງປະເທດອາໄສຢູ່ພາຍໃນບ້ານທີ່ຖືກຕ້ອງຕາມລະບຽບກົດໝາຍປະຕິບັດໄດ້ 95%; ປະຊາຊົນພາຍໃນບ້ານມີຊີວີດການເປັນຢູ່ທີ່ດີມີປະກັນສັງຄົມໃດໜຶ່ງເພື່ອຮັບຮອງການພັດທະນາບ້ານ ແລະຊ່ວຍເຫຼືອເຊິ່ງກັນ ແລະກັນປະຕິບັດໄດ້ 97%, ໃນໂອກາດນີ້ທ່ານນາງ ດາວວິນ ລາດຊະກິດ ຍັງໄດ້ໃຫ້ກຽດມອບໃບຢັ້ງຢືນໃຫ້ຄອບຄົວ ແລະບ້ານພັດທະນາດ້ານແຮງງານ ແລະສະຫວັດດີການສັງຄົມຈຳນວນ 7 ບ້ານທີ່ໄດ້ປະກາດຮັບຮອງໃນຄັ້ງນີ້.

----------------

ຂ່າວ: ກິດຕິສັກ ບົວໄລ       

ຮູບພາບ: #ຫນັງສືພິມເສດຖະກິດສັງຄົມ

แชร์