ທ່ານ ກົງຈັກກີ ພັນທະສົມບັດ ປະທານສະມາຄົມທຸລະກິດທ່ອງທ່ຽວຫຼວງພະບາງ

   ສະມາຄົມທຸລະກິດທ່ອງທ່ຽວ ແຂວງຫຼວງພະບາງ ໄດ້ຈັດກອງປະຊຸມໃຫຍ່ຄັ້ງທີ V ຂຶ້ນ ແລະອັດລົງດ້ວຍຜົນສຳເລັດໃນຕອນບ່າຍຂອງວັນທີ 25 ພະຈິກ 2020 ຢູ່ຫ້ອງປະຊຸມພູສີໂດຍການເປັນປະທານຂອງທ່ານ ບຸນທ່ຽງ ສຸລິວັນ ປະທານສະມາຄົມທຸລະກິດທ່ອງທ່ຽວ ແຂວງຫຼວງພະບາງ ເປັນກຽດເຂົ້າຮ່ວມຂອງທ່ານ ນາງ ສຸດາພອນ ຄົມທະວົງ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ, ທ່ານ ສົມພອນ ສີອຸດົມພັນ ຫົວໜ້າພະແນກພາຍໃນແຂວງ, ມີຕາງໜ້າພາກສ່ວນກ່ຽວຂ້ອງ, ພ້ອມດ້ວຍຄະນະ ແລະສະມາຊິກສະມາຄົມທຸລະກິດທ່ອງທ່ຽວພາຍໃນແຂວງເຂົ້າຮ່ວມ.

 ທ່ານ ບຸນທ່ຽງ ສຸລິວັນ ປະທານສະມາຄົມທຸລະກິດທ່ອງທ່ຽວແຂວງຫຼວງພະບາງໄດ້ຂຶ້ນລາຍງານບົດສະຫຼຸບການເຄື່ອນໄຫວວຽກງານຂອງສະມາຄົມທຸລະກິດທ່ອງທ່ຽວແຂວງ 5 ປີຜ່ານມາ ( 2016 ຫາ 2020 ) ແລະວາງທິດທາງແຜນຄາດໝາຍລວມ 2020 ຫາ 2025, ຕະຫຼອດໄລຍະ 5 ປີທີ່ຜ່ານມາທາງສະມາຄົມທຸລະກິດທ່ອງທ່ຽວໄດ້ເປັນສ່ວນໜຶ່ງໃນການຊຸກຍູ້ສົ່ງເສີມໃຫ້ນັກທ່ອງທ່ຽວເຂົ້າມາທ່ຽວຫຼວງພະບາງນັບຫຼາຍແສນຄົນທັງໄດ້ປະກອບສ່ວນຊ່ວຍສ້າງວຽກເຮັດງານທໍາໃຫ້ກັບປະ ຊາຊົນຊາວຫຼວງພະບາງນັບຫຼາຍພັນຄົນລວມເຖິງການປະກອບສ່ວນຊ່ວຍເຫຼືອສັງຄົມກໍຄືການປະກອບສ່ວນວຽກງານວັນສໍາຄັນຕ່າງໆ ຂອງຊາດຊຶ່ງໄດ້ກາຍເປັນສ່ວນໜຶ່ງໃນການປະກອບສ່ວນຊຸກຍູ້ໃຫ້ເສດຖະກິດຂອງແຂວງຫຼວງພະບາງໄດ້ມີບາດກ້າວຂະຫຍາຍຕົວຂຶ້ນໄປເທື່ອລະກ້າວ.

  ພ້ອມນີ້ກອງປະຊຸມຍັງໄດ້ໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາຄະນະບໍລິຫານງານສະມາຄົມທຸລະກິດທ່ອງທ່ຽວແຂວງຊຸດໃໝ່ຜ່ານການປ່ອນບັດ ແລະກອງປະຊຸມຄັ້ງປະຖົມມະລຶກໄດ້ເປັນເອກະພາບກັນເລືອກເອົາ ທ່ານ ກົງຈັກກີ ພັນທະສົມບັດ ເປັນປະທານສະມາຄົມທຸລະກິດທ່ອງທ່ຽວ ແຂວງຫຼວງພະບາງຊຸດໃໝ່, ທ່ານ ທະຫວິນ ມະ ໂນລົດ, ທ່ານ ເພັດຈຳພອນ ຂຸນດາລາ ແລະທ່ານ ຜາສຸກ ວັນສະຫວັດ ເປັນຮອງ ປະທານ, ທ່ານ ບຸນປອນ ຜາສຸກ, ທ່ານ ນາງ ເພັດອານົງ ພົງສະຫວັດ, ທ່ານ ສົມສັກ ປະເສີດໄຊ, ທ່ານ ຄຳສະໝິງ ສຸກຄະວົງ, ທ່ານ ນິນທະລາ ແກ້ວຄຳເພັດ, ທ່ານ ລາວທອງ ໄຊຍະສິດ ແລະທ່ານ ຄົງພະຈິດ ສີບຸນເຮືອງ ເປັນຄະນະເພື່ອສືບຕໍ່ຊີ້ນຳໆພາວຽກງານໃນ 5 ປີຕໍ່ໜ້າໃຫ້ມີຜົນສໍາເລັດ ແລະມີການພັດທະນາດີຂຶ້ນກວ່າເກົ່າ.

--------------------

---------------------

ຂ່າວ: ສີສຸວັນ, ຮູບພາບ: ໜັງສືພິມເສດຖະກິດ-ສັງຄົມ

แชร์