ເຊັນສັນຍາສ້າງຕັ້ງບໍລິສັດທີ່ປືກສາດ້ານການທ່ອງທ່ຽວ

   ວັນທີ 25 ພະຈິກ 2020 ທີ່ໂຮງແຮມ 36 ນະຄອນຫຼວງວຽງຈັນ ໄດ້ມີພິທີເຊັນບົດບັນທຶກຄວາມເຂົ້າໃຈ (MOU) ວ່າດ້ວຍການຮ່ວມມືສ້າງຕັ້ງບໍລິສັດທີ່ປຶກສາດ້ານການທ່ອງທ່ຽວລະຫວ່າງກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວ ແລະບໍລິສັດ ອາເມັດຊີ້ງລາວ ຈໍາກັດຜູ້ດຽວ ລົງນາມສັນຍາໂດຍທ່ານ ບົວໄລ ພານຸວົງ ວ່າການຫົວໜ້າຫ້ອງການກະຊວງຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວ ແລະ ທ່ານ ZHOU YAO ຜູ້ອໍານວຍການບໍລິສັດ ອາເມັດຊີ້ງລາວ ຈໍາກັດຜູ້ດຽວ,ໂດຍເຂົ້າຮ່ວມຂອງທ່ານ ກິແກ້ວ ໄຂຄໍາພິທູນ ລັດຖະມົນຕີກະຊວງຖະແຫຼງຂ່າວ,ວັດທະນະທໍາ ແລະທ່ອງທ່ຽວ, ມີທ່ານ ປີຊາໄຊ ແກ້ວໄຊຍະຈັກ ປະທານກຸ່ມບໍລິ ສັດ IHC ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ZHOU YAO ໃຫ້ຮູ້ວ່າ: ການເຊັນບົດບັນທຶກຄັ້ງນີ້ເພື່ອຊຸກຍູ້ ແລະສົ່ງເສີມການພັດທະນາການທ່ອງທ່ຽວທາງທໍາມະຊາດ,ວັດທະນະທໍາ,ປະຫວັດສາດ ແລະກະສິກໍາຕາມທິດສີຂຽວ ແລະຍືນຍົງຕາມນະໂຍບາຍຂອງລັດຖະບານ ສປປ ລາວ,ສ້າງຄວາມເຂັ້ມແຂງໃຫ້ແກ່ບຸກຄະລາກອນໃນຂະແໜງການທ່ອງທ່ຽວຂອງ ສປປ ລາວ ໃຫ້ມີປະສິດທິພາບ ແລະທັນສະໄໝ, ເພື່ອດຶງດູດນັກລົງທຶນເຂົ້າໃນການພັດທະນາທ່ອງທ່ຽວຂອງ ສປປ ລາວ.

 ບໍລິສັດ ອາເມັດຊີ້ງລາວ ແມ່ນບໍລິສັດພາຍໃນຂອງ ສປປ ລາວ ທີ່ເປັນບໍລິສັດກວມລວມບໍລິສັດໜຶ່ງຊຶ່ງດຳເນີນທຸລະກິດກ່ຽວກັບຂະແໜງການທ່ອງທ່ຽວເຊັ່ນ: ການພັດ ທະນາການທ່ອງທ່ຽວ, ກໍ່ສ້າງແຫຼ່ງທ່ອງທ່ຽວ, ໃຫ້ຄໍາປຶກສາການລົງທຶນດ້ານການທ່ອງທ່ຽວ ແລະ ເປັນສື່ເພື່ອເຜີຍແຜ່ຂໍ້ມູນວັດທະນະທໍາ ແລະ ທ່ອງທ່ຽວ, ນັບແຕ່ບໍລິສັດໄດ້ສ້າງຕັ້ງມາຮອດປະຈຸບັນແມ່ນໄດ້ດໍາເນີນທຸລະກິດກ່ຽວກັບຂະແໜງການທ່ອງທ່ຽວພາຍໃນຂອງ ສປປ ລາວ ແລະ ໄດ້ເຜີຍແຜ່ຂໍ້ມູນຊັບພະຍາກອນທ່ອງທ່ຽວຂອງ ສປປ ລາວ ອອກສູ່ພາຍນອກ.

แชร์