ວິຣະຖາວອນ ເປີດລະດູການແຂ່ງຂັນກິລາ-ສີລະປະ​

 ໂຮງຮຽນວິຣະຖາວອນໄດ້ຈັດພິທີເປີດລະດູການແຂ່ງຂັນກິລາ-ສີ​ລະ​ປະຄັ້ງທີ 5 ປະຈຳສົກຮຽນ 2020-2021 ຂຶ້ນໃນວັນທີ 25 ພະຈິກຜ່ານມາທີ່ໂຮງຮຽນດັ່ງກ່າວ, ໂດຍການເຂົ້າຮ່ວມຂອງທ່ານ ຄຳສິງ ດວງດາລາ ຫົວໜ້າຫ້ອງການສຶກສາທິການ ແລະກີລາ ເມືອງສີສັດຕະນາກ ນະຄອນຫຼວງວຽງຈັນ ມີບັນດາຜູ້ອຳນວຍການໂຮງຮຽນອ້ອມຂ້າງພ້ອມທັງບັນດາຄູ-ອາຈານ ພໍ່ແມ່ຜູ້ປົກຄອງ ແລະນ້ອງນັກຮຽນເຂົ້າຮ່ວມຢ່າງຄຶກຄື້ນ.

  ທ່ານນາງ ນີລາວັນ ວິຣະຖາວອນ ຜູ້ອຳນວຍການໂຮງຮຽນວິຣະຖາວອນກ່າວວ່າ: ວຽກງານກິລາ-ສີລະປະເປັນວຽກງານໜຶ່ງທີ່ນອນໃນວຽກງານ 5 ຫຼັກມູນການສຶກ ສາເປັນການເສີມສ້າງທັກສະສ້າງຄວາມສາມັກຄີໃນໝູ່ຄະນະທີ່ສໍາຄັນເປັນການຝຶກສະມາທິຮູ້ເສຍຮູ້ຊະນະໃຫ້ອະໄພມີນໍ້າໃຈນັກກິລາສົ່ງເສີມສີລະປະວັດທະນະທໍາອັນດີງາມຂອງຊາດປະສົມປະສານກັບຍົກສະໄໝໃຊ້ເວລາຫວ່າງໃຫ້ເປັນປະໂຫຍດຫ່າງໄກສິ່ງເສບຕິດໂດຍທາງໂຮງຮຽນໄດ້ຖືເປັນວຽກງານສໍາຄັນເພື່ອປະຕິບັດຕາມແຜນກິດ

ຈະກໍາແະຈໍາປີຮຽນທີ່ເຄີຍປະຕິບັດຜ່ານມາໃນແຕ່ລະປີ ແລະເພື່ອເປັນການສ້າງຂະບວນຂໍ່ານັບຊົມເຊີຍວັນຊາດທີ 2 ທັນວາ ຄົບຮອບ 45 ປີ ແລະຄົບຮອບວັນຄ້າຍວັນ ເກີດປະທານໄກສອນ ພົມວິຫານ ຄົບຮອບ 100 ປີ ທັງເປັນການຈັດຕັ້ງປະຕິບັດຕາມເນື້ອໃນຈິດໃຈຂອງ 5 ຫຼັກມູນການສຶກສາປະກອບສ່ວນສ້າງບັນຍາກາດຂອງການຮຽນ-ການສອນພາຍໃນໂຮງຮຽນຊ່ວຍເສີມພັດທະນາການຮອບດ້ານໃນການເຄື່ອນໄຫວຂອງຮ່າງຫາຍທັກສະດ້ານສັງຄົມ-ດ້ານຈິດໃຈ ແລະ ທັກສະມະນຸດສໍາພັນສົ່ງ ເສີມສຸຂະພາບໃຫ້ແກ່ນັກຮຽນ ແລະ ຊ່ວຍເພີ່ມພັດທະນາທາງດ້ານສະໝອງ, ດັ່ງນັ້ນໂຮງຮຽນວິຣະຖາວອນຈຶ່ງຈັດກິດຈະກໍາແຂ່ງຂັນກິລາ-ສີ​ລະ​ປະ ຄັ້ງທີ 5 ຂຶ້ນ ຊຶ່ງຈະດໍາເນີນໄປຮອດວັນທີ 27 ພະຈິກ 2020 ຈຶ່ງສໍາເລັດ.

 ການແຂ່ງຂັນປະກອບມີ​ນັກກິລາທັງໝົດ 730 ຄົນ ຍິງ 376 ຄົນ ຊຶ່ງແບ່ງ 3 ລະດັບ​ ຄື: ລະດັບຊັ້ນປະຖົມ ມີ 5 ທີມ, ມັດທະຍົມ​ຕົ້ນ 3 ທີມ ແລະ​ມັດທະຍົມປາຍ 3 ທີມ, ສ່ວນນັກຮຽນຊັ້ນມໍ 7 ແມ່ນເປັນຜູ້ບໍລິຫານຈັດການ ແລະ ເປັນຜູ້ຊີ້ນໍາແຕ່ລະທີມໃນຖານະລຸ້ນອ້າຍ-ເອື້ອຍ; ສໍາລັບກິດຈະກໍາຄັ້ງນີ້ ມີຂະບວນການຍ່າງ, ການແຂ່ງຂັນເຕັ້ນປະກອບເພງ ແລະການແຂ່ງຂັນກິລາ 19 ຊະນິດຄື: ການເຊຍ, ການລຽນຄໍາສັບ, ດຶງເຊືອກ, ຕີດອກປີກໄກ່, ແຊ່ງກາໂລ້, ຕີບານ, ບານບ້ວງ, ແລ່ນ, ຂີ່ມ້າ, ຕັກນໍ້າໃສ່ແອ່ງມື, ເກມງູຂັ້ນໄດ, ປັກທໍ່, ໝາກພ້າວໂບລິງ, ກິ້ງຕີລົດ, ບານສົ່ງ, ຕີປິ່ງປ່ອງ, ແລ່ນໄຖ່, ໝາກດ້າມ, ເຕະບານ, ແລະມີການປະກວດ Miss and Mr VIRATHAVONE ນໍາອີກ.

ນອກຈາກນີ້, ຍັງມີການແຂ່ງຂັນຮ້ານວາງສະແດງຊຶ່ງທຸກກິດຈະກຳລ້ວນແຕ່ສ້າງຄວາມສາມັກຄີເປັນໝູ່ຄະນະສົ່ງເສີມທັກສະກ້າຄິດກ້າສະແດງອອກຂອງນັກຮຽນພ້ອມກັບການພັດທະນາຮຽນຮູ້ສຶກສາຄົ້ນຄວ້າປຶກສາຫາລືນໍາໄປສູ່ການພັດທະນາຄວາມຮູ້ໃໝ່ສາມາດນໍາໄປໝູນໃຊ້ເຂົ້າໃນການຮຽນການດໍາລົງຊີວິດປະຈໍາວັນ ແລະ ສົ່ງເສີມພັດທະນາທັກສະການຮຽນຮູ້ໃນຮູບແບບຕ່າງໆ.

#ຫນັງສືພິມເສດຖະກິດສັງຄົມ

แชร์