ສ້າງຄວາມສາມາດປັບຕົວຜ່ານບໍລິການດ້ານການເງິນ

  ກົມຄຸ້ມຄອງສະຖາບັນການເງິນທະນາຄານແຫ່ງ ສປປ ລາວ (ທຫລ) ຮ່ວມກັບສະມາຄົມການເງິນຈຸລະພາກ ແລະຮັບການສະໜັບສະໜູນຈາກຄູ່ຮ່ວມມືກໍ່ຄືອົງການ ADA ປະເທດລຸກຊຳບວກໄດ້ຈັດຕັ້ງກອງປະຊຸມການເຂົ້າເຖິງການບໍລິການທາງດ້ານການເງິນປະຈຳປີ 2020 ພາຍໃຕ້ຫົວຂໍ້:“ການສ້າງຄວາມສາມາດໃນການປັບຕົວຜ່ານການບໍລິການທາງດ້ານການເງິນທີ່ມີຄວາມຮັບຜິດຊອບ ແລະ ມີຄວາມຍືນຍົງ” ຊຶ່ງຈັດຂຶ້ນວັນທີ 25 ພະຈິກ 2020 ທີ່ນະຄອນຫຼວງວຽງຈັນໂດຍການໃຫ້ກຽດເຂົ້າຮ່ວມຂອງ ທ່ານ ພຸດທະ ໄຊສີວິໄລ ຮອງຜູ້ວ່າການ ທຫລ; ທ່ານ ອາລຸນ ບຸນຍົງ ຫົວໜ້າກົມຄຸ້ມຄອງສະຖາບັນການເງິນ; ພ້ອມດ້ວຍບັນດາຜູ້ຕາງໜ້າຈາກກົມພາຍໃນ ທຫລ, ຂະແໜງການຕິດພັນ, ບັນດາສະຖາບັນການເງິນ, ນັກວິທະຍາກອນຈາກກະຊວງ-ອົງການທີ່ກ່ຽວຂ້ອງເຂົ້າຮ່ວມ.

 ກອງປະຊຸມຄັ້ງນີ້ເປັນຊ່ອງທາງໃນການພັດທະນາຂະແໜງການເງິນຈຸລະພາກໃນ ສປປ ລາວ ແລະປະກອບສ່ວນຢ່າງຕັ້ງໜ້າໃນການຈັດຕັ້ງປະຕິບັດວຽກງານການເຂົ້າ ເຖິງການບໍລິການທາງດ້ານການເງິນໃນ ສປປ ລາວ ຊຶ່ງວຽກງານດັ່ງກ່າວໄດ້ຮັບການພັດທະນານັບແຕ່ທ້າຍຊຸມປີ 1980 ໃນໄລຍະຕົ້ນເປັນຍຸກເລີ່ມຕົ້ນດ້ວຍການສ້າງກຸ່ມທ້ອນເງິນ ແລະປ່ອຍເງິນກູ້ຍ່ອຍວົງເງິນໜ້ອຍ ແລະປະຈຸບັນເອີ້ນວ່າການເງິນຈຸລະພາກຍຸກ 4.0 (ຍຸກທີ່ໃຊ້ເຄຶ່ອງມືດິຈີຕອລ-ເຕັກໂນໂລຊີທາງການເງິນເຂົ້າໃນການບໍລິການທາງການເງິນ) ກ້າວສູ່ການເຂົ້າເຖິງການບໍລິການທາງດ້ານການເງິນ (Financial inclusion) ແລະ ການເງິນທີ່ທົ່ວເຖິງ (Inclusive Finance) ແລະໃນນັ້ນກວມເອົາການເຂົ້າເຖິງຜະລິດຕະພັນສິນເຊື່ອໂດຍສະເພາະສິນເຊື່ອຂະໜາດຍ່ອຍ, ເງິນຝາກ, ການປະກັນໄພຍ່ອຍ ແລະພາຫະນະໃນການຊຳລະ (ນັບທັງເຄື່ອງ ມືຊຳລະໂດຍຜ່ານລະບົບດິຈີຕອລ), ສະນັ້ນໃນຍຸກປະຈຸບັນຈຶ່ງມີບົດບາດສຳຄັນໃນການຈັດຕັ້ງປະຕິບັດເປົ້າໝາຍພັດທະນາແບບຍືນຍົງ, ບົດບາດຍິງ-ຊາຍ ແລະການສົ່ງເສີມແມ່ຍິງໃນການສ້າງສາເສດຖະກິດ, ການຫຼຸດຜ່ອນຄວາມທຸກຍາກໃນເຂດຊົນນະບົດ ແລະກ່າວໄປເຖິງຂອບເຂດທົ່ວປະເທດ.

   ກອງປະຊຸມຄັ້ງນີ້ໄດ້ເນັ້ນໜັກເຖິງຫົວຂໍ້ໃນການຮັບມື ແລະແກ້ໄຂບັນຫາຂອງສະຖາບັນການເງິນໂດຍສະເພາະໃນໄລຍະທີ່ໄດ້ຮັບຜົນກະທົບຈາກການລະບາດຂອງພະ ຍາດ Covid-19ບັນຫາດັ່ງກ່າວມີຄວາມສຳຄັນຫຼາຍຊຶ່ງທີ່ທຸກພາກສ່ວນລວມເຖິງສະຖາບັນການເງິນທຸກຮູບແບບຕ້ອງເອົາໃຈໃສ່ເປັນພິເສດເພື່ອຜ່ານຜ່າວິກິດການຄັ້ງນີ້ໄປພ້ອມກັນ, ສະນັ້ນເມື່ອກ່າວເຖິງການຮັບມືກັບຜົນກະທົບດ້ານລົບທີ່ເກີດຈາກພະຍາດ Covid-19, ລັດຖະບານກໍ່ຄື ທຫລ ກໍ່ໄດ້ມີການກໍານົດແຜນງານກ່ຽວກັບນະໂຍບາຍ ແລະມາດຕະການທາງດ້ານເງິນຕາໄລຍະສັ້ນເພື່ອຫຼຸດຜ່ອນຜົນກະທົບຈາກ Covid-19 ແລະໄລຍະກາງ-ຍາວ ປະກອບສ່ວນຟື້ນຟູເສດຖະກິດ, ໃນນັ້ນໄດ້ມີການຈັດຕັ້ງປະຕິບັດນະໂຍບາຍສິນເຊື່ອເພື່ອແກ້ໄຂຜົນກະທົບຈາກສະພາບການລະບາດຂອງພະຍາດດັ່ງກ່າວຂອງບັນດາທະນາຄານທຸລະກິດ ແລະສະຖາບັນການເງິນຕາມຂໍ້ຕົກລົງເລກທີ 238/ ທຫລ ໂດຍມີມາດຕະການໃນການປັບປຸງໂຄງສ້າງໜີ້ຄືນໃໝ່ໃຫ້ແກ່ລູກໜີ້ທີ່ໄດ້ຮັບຜົນກະທົບໂດຍກຳນົດອາຍຸສັນຍາ ຫຼືງວດຊຳລະຕົ້ນທຶນ ແລະດອກເບ້ຍ, ອັດຕາດອກເບ້ຍຄືນໃໝ່ໃຫ້ສອດຄ່ອງກັບຄວາມສາມາດໃນການຊຳລະໜີ້ຕົວຈິງຂອງລູກໜີ້,ໃນນັ້ນໃຫ້ມີໄລຍະເວລາປອດໜີ້ຕົ້ນທຶນ ແລະດອກເບ້ຍເປັນເວລາ 1 ປີ ຫຼືຕາມການຕົກລົງລະຫວ່າງເຈົ້າໜີ້ ແລະລູກໜີ້; ສະໜອງເງິນກູ້ບ້ວງໃໝ່ໃຫ້ແກ່ລູກໜີ້ ແລະຜູ້ທີ່ໄດ້ຮັບຜົນກະທົບຈາກພະຍາດດັ່ງກ່າວ;ນຳໃຊ້ມາດຕະການອື່ນໆທີ່ສອດຄ່ອງກັບຂໍ້ຕົກລົງສະບັບນີ້ ແລະນິຕິກຳທີ່ກ່ຽວຂ້ອງ ແລະໃນທີ່ປະຊຸມຍັງໄດ້ສົນທະນາກ່ຽວກັບຄວາມສາມາດໃນການປັບຕົວ ແລະການບໍລິການທາງດ້ານເງິນທີ່ມີຄວາມຮັບຜິດຊອບແບບຍືນຍົງ ແລະສຸດທ້າຍແມ່ນຫົວຂໍ້ການສົ່ງເສີມຄວາມຮູ້ພຶ້ນຖານທາງດ້ານການເງິນ, ໃນການໃຫ້ບໍລິການທາງດ້ານການເງິນທີ່ມີຄວາມຮັບ ຜິດຊອບແມ່ນເປັນບັນຫາໜຶ່ງທີ່ ທຫລ ໄດ້ໃຫ້ຄວາມສຳຄັນໂດຍການສ້າງດຳລັດການປົກປ້ອງຜູ້ຊົມໃຊ້ທາງດ້ານການເງິນທີ່ໄດ້ຮັບການຮັບຮອງໂດຍລັດຖະບານໃນເດືອນເມສາ 2020 ທີ່ຜ່ານມານີ້, ໃນນັ້ນໄດ້ກຳນົດຫຼັກການ, ລະບຽບການ ແລະມາດຕະການກ່ຽວກັບການຄຸ້ມຄອງ-ກວດກາ ແລະການປົກປ້ອງຜູ້ຊົມໃຊ້ການບໍລິການທາງດ້ານການເງິນເພື່ອເຮັດໃຫ້ການບໍລິການທາງດ້ານການເງິນມີຄຸນນະພາບ, ຖືກຕ້ອງ, ໂປ່ງໃສ ແລະຍຸຕິທຳ, ແນໃສ່ການສ້າງຄວາມເຊື່ອໝັ້ນໃຫ້ແກ່ລະບົບການເງິນ.

  ທ່ານ ພຸດທະໄຊ ສີວິໄລ, ຮອງຜູ້ວ່າການ ທຫລ ໄດ້ເນັ້ນບາງຕອນສໍາຄັນວ່າ: ໃຫ້ບັນດາສະຖາບັນການເງິນຈົ່ງເປັນເຈົ້າການຮ່ວມກັນໃນການແກ້ໄຂບັນຫາເສດຖະກິດໂດຍລວມຮ່ວມກັນກັບພາກລັດເນື່ອງຈາກການຊ່ວຍກັນແກ້ໄຂບັນຫາເປັນບັນຫາສຳຄັນທີ່ສຸດທີ່ຈະຊ່ວຍໃຫ້ປະເທດຊາດສາມາດຫຼຸດພົ້ນຈາກຜົນກະທົບຂອງພະຍາດ Covid-19, ພາຍຫຼັງເສດຖະກິດໂດຍລວມມີການຂະຫຍາຍຕົວໃນຕໍ່ໜ້າແລ້ວທຸກຂະແໜງການຈຶ່ງຈະສາມາດກັບຄືນສູ່ການດຳເນີນງານທີ່ເປັນປົກກະຕິໄດ້ ແລະ ເຮັດໃຫ້ສາມາດຂະຫຍາຍຕົວໃນລວງດຽວກັນໄດ້; ສ້າງຜະລິດຕະພັນໃໝ່ທາງດ້ານການເງິນໃຫ້ຫຼາກຫຼາຍ ແລະເໝາະສົມຕິດແທດກັບຄວາມຕ້ອງການຂອງປະຊາຊົນໃນສະພາບການຊ່ວງນີ້ໃຫ້ຫຼາຍຂຶ້ນລວມເຖິງການສະໜອງແຫຼ່ງທຶນໃຫ້ແກ່ຂະແໜງການ MSMEsເນື່ອງຈາກຂະແໜງການຈຸນລະວິສາຫະກິດແມ່ນກວມເອົາເກືອບ 99% ຂອງອັດສ່ວນວິສາຫະກິດທັງໝົດໃນ ສປປ ລາວ; ຫັນການໃຫ້ບໍລິການການຊຳລະໃຫ້ເປັນຮູບແບບດິຈິຕອນຫຼາຍຂຶ້ນການນຳໃຊ້ລະບົບເຕັກໂນໂລຊີເຂົ້າໃນການໃຫ້ບໍລິການແມ່ນຈະເຮັດໃຫ້ຕົ້ນທຶນຫຼຸດລົງ ແລະສາມາດເຂົ້າເຖິງປະຊາຊົນໃນຂອບເຂດທີ່ກວ້າງຂວາງຫຼາຍຂຶ້ນດ້ວຍລາຄາທີ່ສົມເຫດສົມຜົນ ແລະ ສົ່ງເສີມວຽກຄວາມຮູ້ພື້ນຖານທາງດ້ານການເງິນ ແລະ ເຜີຍແຜ່ວຽກງານປົກປ້ອງຜູ້ຊົມໃຊ້ທາງດ້ານການເງິນໂດຍສະເພາະແກ້ໄຂບັນຫາຂໍ້ມູນບໍ່ຈະແຈ້ງລະຫວ່າງສະຖາບັນການເງິນ ແລະລູກຄ້າຂອງຕົນເພື່ອໃຫ້ບັນລຸການເງິນທີ່ມີຄວາມຮັບຜິດຊອບເປັນພື້ນຖານໃນການປັບປຸງການເຂົ້າເຖິງການບໍລິການທາງດ້ານການເງິນຂອງປະຊາຊົນທົ່ວໄປໃຫ້ດີຂຶ້ນ.

ສະໜັບສະໜູນໂດຍ: HONDA

-----------------

ຂ່າວ: ຣັດສະໝີ ດວງສັດຈະ       

ຮູບພາບ: ໜັງສືພິມເສດຖະກິດ-ສັງຄົມ

แชร์